Read Saluan 2 TOMU-TOMUNDO' 1 Bible Online

2 TOMU-TOMUNDO' 1 - Saluan bible

2 TOMU-TOMUNDO' 1

¹Salatan sinilakamo na i Ahab tomundo' nu Israel, lipu' Moab notomuhukmo hi aha Israel.

²Daagi' kino sansinaan i Tomundo' Ahazia anu nolengkat mae i Israel nanabu'mo aita' mae i salipi' nu laigan nu tomundo' anu kajo-kajojoongannyo kiijo' i Samaria, lantas ia binelaonmo talalo daka' hondo. Sahingga ia nonsaimo mian da'isan da mamba mompokilawa hi Baal-Zebub pilogot nu aha kota Ekron kiijo' i Filistin, pa' ia daagi' ma'alin kabai madi'mo.

³Panyo malaikat nu Tumpu nonsaimo i Elia, nabi anu nolengkat mae i Tisbe, namba siningkabot to mia-mian anu sinai mae i Tomundo' Ahazia nompokilawa “Pa' i Israel madi'mo ko Tumpu Allah, sahingga belemiu nambamo nomoita pokinde' hi Baal-Zebub pilogot nu kota Ekron aijo'?

⁴Poto'iakon hi tomundo' saba' Tumpu notataemo sumo uuka, ‘Beleyum madi'mo ma'alin, beleyum silakamo!’ ” Salatan pinoto'imo i Elia na palentah nu Tumpu aijo',

⁵ninsusule'mo na to mia-mian anu sinai mae aijo' namba hi tomundo' lantas pinokilawamo i tomundo' “Kadaka' belemiu ninsusule' mo mae?”

⁶Tinaaman nu aha, “Samian na mo'ane tinoka nonsingkaboti mae kami, ka' nonsai mae kami ninsusule' ka' mompotokakon hi belento Tomundo' kalana Tumpu notatae sumo uuka hi belento Tomundo'. 'Pa' Israel madi'mo ko Tumpu Allah, lantas beleyum nonsaimo mian nompoita pokinde' hi Baal Zebub pilogot nu kota Ekron? Beleyum madi'mo ma'alin, beleyum silakamo!’ ”

⁷“Mosia na balu-balu'nyo nu mian aijo'?” na koonyo i Tomundo'.

⁸ “Juba'nyo ka' pombutu'nyo kilit na binau,” na koonyo nu aha. “O, itina' i Elia!” na koonyo i tomundo'.

⁹Lantas ia nonsaimo samian na suludadu anu matangkas na pangkatnyo ka' aha limampulu' na to sulu-suludadu da mamba mohakop i Elia. Suludadu anu matangkas na pangkatnyo aijo' nambamo lantas siningkabotmo i Elia hau-haunyo suha-suhang i sa'angu' na puge'nyo. “He, posaihon nu Tumpu Allah,” na koonyo nu suludadu anu ko pangkatnyo aijo', “beleyum pinalentahmo i tomundo' da mintudunmo mae!”

¹⁰ Tinaaman i Elia, “De aku aiya memang posaihon nu Tumpu Allah,” “apu lengkat mae i langit mompapuimo beleyum ka' iwi-iwi' na suludadu nu beleyum!” Tempo'nyo aitu mule' apu lengkat mae hi Tumpu Allah nompapuimo suludadu anu matangkas na pangkatnyo aijo' ka' limampulu' na mian sangko suludadunyo aijo'.

¹¹Lantas i tomundo' nonsaimo mule' samian na suludadu anu matangkas na pangkatnyo sangga'at tiba aha limampulu' suele na mian to sulu-suludadunyo. Aha nambamo ka' notatae hi Elia, “He posaihon nu Tumpu Allah, i tomundo' nompalentahmo beleyum da mintudunmo uuka aiya!”

¹²Tinaaman i Elia, “De aku aiya memang posaihon nu Tumpu Allah,” apu lengkat mae i langit mompapuimo beleyum tempo'nyo aitu mule' apu lengkat mae hi Tumpu Allah nompapuimo suludadu anu matangkas na pangkatnyo aijo' ka' limampulu' na mian sangko suludadunyo aijo'.

¹³Po'ule' mule' sinai i tomundo' na samian na suludadu anu matangkas na pangkatnyo tiba aha limampulu' na to sulu-suludadu sangga'at. Suludadu anu matangkas na pangkatnyo nindakomo i bungkutnyo ka' salatan tinokamo i ahop i Elia, ia tinolodadupumo ka' notatae, “Ampuniakon mae na kami, o pos posaihon nu Tumpu Allah! Kalibosiakon mae na aku ka' iwi-iwi' sangko suludadungku aiya. Boli opatei mae na kami.

¹⁴Ohua' na suludadu anu matangkas na pangkatnyo sangga'at tiba to sulu-suludadu nu aha sinilakamo kinaan nu apu anu le lengkat mae i langit, panyo' ku poita, kalibosi mae na aku!”

¹⁵Tempo'nyo aitu malaikat nu Tumpu nompoto'imo hi Elia, “Boli mabuhuk batukimo na ia mintudun lengkat i bungkutnyo aiya.” Kalana aijo' nambamo na i Elia tiba suludadu haha aijo anu matangkas na pangkatnyo hi tomundo'.

¹⁶Lantas pinoto'imo i Elia hi tomundo', “Koonyo nu Tumpu, 'Beleyum nonsaimo mian momoita pokinde' hi Baal-Zebub pilogot nu kota Ekron, au'aitu kiijo' i Israel madi'mo ko Tumpu Allah-nyo anu timbali pompokilawan. Kalana aijo' beleyum madi'mo ma'alin, beleyum silakamo!’ ”

¹⁷Sahingga sinilakamo ma i Ahazia susumo anu pinoto'imo nu Tumpu hi Elia. Kalana i Ahazia madi' ko anak mo'ane, sahingga i Yoram, utusnyo binaumo tomundo' nombolosi ia, aijo' jinadi i taun anu ko ohua'nyomo na i Yohoram anak i Yosafat tomundo' nu Yehuda.

¹⁸Sisikon sangga'at mongkona apaa na anu binaumo i Tomundo' Ahazia tinulismo i kitab nu to Tomu-tomundo' Israel.