Read Saluan 2 TOMU-TOMUNDO' 10 Bible Online

2 TOMU-TOMUNDO' 10 - Saluan bible

2 TOMU-TOMUNDO' 10

¹I Tomundo' Ahab ko makumpunyo aha pitumpulu' i kota' Samaria. Kalana aijo' i Yehu nompakatumo sulat namba i Samaria hi mian anu nompotuu' makumpu i Ahab ka' hi anu balakuasa' ka' mule' hi to tu'a-tu'anyo i kota aijo'. Sulat aijo' sumo uuka na isinyo,

²“Makumpu i Ahab i uno nu ponjaga'an nu belemiu ka' belemiu ko kareta bau pahampate, ajahan, toongon bau pahampate, ka' kota' anu ko bentengnyo. Mokonyo' aijo' sampa lia-lia' de belemiu montalimamo sulat aiya,

³pile'i na anu mingkaliangan na aha atina' makumpu i Ahab ka' hangkat na ia bau tomundo', lantas pagala ahi' osangaja'i na ia.”

⁴Anu balakuasa' i Samaria nabuhukmo. Koonyo nu aha, “I Tomundo' Yoram ka' i Tomundo' Ahazia madi' suele moko ala mongewa i Yehu, ka' kitaje aiya, tantu madi' ahi' moko ala.”

⁵Kalana aitu kapala nu laigan nu tomundo' ka' anu mongkuasai kota' aijo' tiba to tu'a-tua'nyo nu mian da'isan ka' mian anu nompotuu' anak makumpu i Ahab nompakatumo lele aiya sumo uuka, hi Yehu, “Kami ta'alukmo hi belento Tuan, ka' apaa na anu opokauhakon hi kami nu belento Tuan tionyo ahi' obau mami. Kami madi' mohangkat bau tomundo' maumo pa' ihe. Bau ahi' mae apaa na anu ma'ima' anu nukahanda'i nu belento Tuan.”

⁶Lantas i Yehu nompakatumo mule' sulat hi aha, isinyo, “De belemiu monsangaja'i mae aku, ka' montuluti iwi-iwi' na palentah-ngku, pateimo na makumpu i Ahab aijo', ka' dodop tempo'nyo sumo uuka boamo mae na ubak nu aha haha itina' i Yizreel.” Pitumpulu' na makumpu i Tomundo' Ahab aijo' pinojoong hi to tu'a-tu'anyo i kota nu Samaria, ka' kinalesangmo nu aha.

⁷Salatan aha nohumpakmo sulat i Yehu, to tu'a-tu'anyo nu kota Samaria aijo' nompateimo makumpu i Ahab aha pitumpulu' lantas ubak nu aha haha aijo' pinolinsonmo i uno nu kalanjang ka' pinakatu i Yehu i Yizreel.

⁸Salatan pinoto'imo na han aijo' hi Yehu, ia nompalentahkonmo da ubak haha aijo' otambun ka' obagi ohua' i sabatan nu kota' ka' opojohok i kiijo' sampe toka dodop subu.

⁹Daagi' subu-subu nosabatmo na i Yehu nokiijo' i sabatan daka' nu kota', lantas notataemo hi mian haha aijo' anu binalagombu'mo i kiijo'. “Akumo na monsangaja'i mongewa i Tomundo' Yoram ka' mompatei ia; belemiu madi' ko sala'nyo i uno nu han aiya. Panyo' iwi-iwi' na mian haha aiya misa' aku na mompatei.

¹⁰Aiyamo na bukuti'nyo saba' apaa na anu tinaloakonmo nu Tumpu mongkona makumpu i Ahab tionyo ahi' jadi. Tumpu mompojadimo apaa na anu pinoto'i-Nyo hi Elia posaihonnyo.”

¹¹ Lapas aitu i Yehu nompateimo iwi-iwi' na to utu-utusnyo mae i Ahab anu jojoong i Yizreel, ka' iwi-iwi' na anu ko pangkatnyo anu mokalaja hi ia, to sanga-sangalunyo anu mompaha kona ka' to ima-imamnyo; madi' kino samian pe'e anu pinotumuu'.

¹²I Yehu nompala'imo Yizreel lantas nambamo nokiijo I Samaria. I totonga' nu jalan lengkat mae i Yizreel nokiijo' i Samaria, tampat aijo' anu osa-osanggohi, “Binakampngan nu to pola-polaya'”,

¹³ia nompahakabot pa' aha sangkuka na utus mae i Ahazia tomundo' nu Yehuda, pinokilawanyo, “Belemiu aiya ihe?” “Kami aiya to utu-utus mae i Ahazia,” tinaaman nu aha. “Kami mamba mokiijo' i Yizreel molenga aha iwi-iwi' sampoto utusan mae i tomundo' ka' makumpu i Tomundo' boune Izebel.”

¹⁴“Hakop na aha boli pe'e opatei!” na pinalentah i Yehu hi aha suludadunyo. Sahingga mian haha aijo' i hakopmo, lantas pinateanmo koko sa'angu' na bubung anu madi' ko ueenyo, iwi-iwi' aha patumpulu' ka' ohua' na mian. Mau samian madi' ko anu pinotumuu'.

¹⁵I Yehu nolausakonmo lumambanannyo. Hau-haunyo i lumajang ia i lalabotmo i Yonadab anak i Rekhab. I Yehu nonsalando'aimo ia ka' notatae, “Te misa' kita aiya mompaha kona ahi'? Beleyum mongka' oho' montulungi aku?” “Ii',” na koonyo i Yonadab. “De sumo itina', imbo' da kita mompaha kawa,” na pinombalosi i Yehu. Aha nompaha kawamo ka' i Yehu nontulungimo i Yonadab sinumake' i karetanyo, ka' notatae,

¹⁶“Batuki mae na aku ka' oposi toaje pa' mosia na langkasku palesaya hi Tumpu.” Lantas aha hingga-hinggat sinumake'mo namba i Samaria.

¹⁷Sinaintoka kiijo' mae i Yehu nompateimo iwi-iwi' na aha sampo utusan i Ahab madi' kino samian pe'e na tinumuu'. Han aijo' jinadimo susumo apaa na anu tinaloakonmo nu Tumpu hi Elia.

¹⁸I Yehu nompalentahmo mian anu jojoong i Samaria da sihuk mae lantas pinoto' inyomo, “I Tomundo' Ahab madi'mo talalo ma'ima' na langkasnyo hi Baal; langkaskumo na lebe molingkudui ia.

¹⁹Kalana aijo' posihuk mae na nabi Baal iwi-iwi' ka' anu lewa' monsombah tiba to ima-imamnyo; madi' ko samian pe'e na anu madi' toka. Ku ponjoo'mo na monsombahkon koloban hi Baal. Ihe na anu madi' toka hukumannyo opatei.” Panyo aijo' ola sa'angu' na kapandean i Yehu da nu pateimo iwi-iwi' na anu lewa' monsombah Baal.

²⁰I Yehu nompalentahkonmo sumo uuka: “Osanggo na sinaa sa'angu' bau samata-mata ponsombah Baal!” Sahingga tinantukanmo nu mian na sinaanyo aijo',

²¹ka' binebakonmo i Yehu hi songko-songko na Israel. I sinaa aijo' tinokamo iwi-iwi' na anu lewa' monsombah Baal sahingga nanjoo'mo hon do na mian i kuil aijo', lengkat pe'e aijo' i kasubahannyo toka-toka isasu padutnyo.

²²I Yehu nompalentahmo da anu mongkalesang baju' anu opopusok de monsombahmo Baal i kuil aijo', da obagi-bagiakonmo hi mian anu tinokamo mae monsombah Baal. Salatan palentahnyo aijo' binaumo,

²³I Yehu ninsoopmo i kuil nu Baal aijo' tiba i Yonadab anak i Rekhab, ka' pinoto'inyomo hi to mia-mian haha aijo', “Soba toa ima-ima' pa' iwi-iwi' na mian anu sinihukmo aiya ola anu monsombah Baal. Boli-boli daagi' ko anu uutu na mian anu monsombah Tumpu.”

²⁴Lantas i Yehu ka' i Yonadab nonsombahkonmo koloban hi Baal. I sambiha'nyo nu laigan aijo' kino anumo monjagai aha 80 na mian ka' suludadu anu toto tangka-tangkas na pangkatnyo pinalentah i Yehu monjagai i kiijo'. Ka' ia mule' nompalentahmo aha sumo uuka. “Tionyo ahi' opatei nu belemiu iwi-iwi' na mian haha aijo'. Ihe na mompolapas mian haha aijo' mau ola samian, ia suele opatei!”

²⁵Salatan noko sombahkonmo koloban na i Yehu, sampamo ia nosabat ka' nompoto'imo hi to mia-mian anu monjagai ka' suludadu anu toto tangka-tangkas na pangkatnyo haha aijo', “Pinsoopmo ka' pateimo na aha iwi-iwi'. Boli opotumuu' mau ola samian!” Sahingga pininsoopanmo nu aha ka' bajak pinaha keatmo nu aha ka' pinateanmo nu aha iwi-iwi' na mian anu kiijo', lantas lewa'mo i hela' sinabatakon nu aha na bangke' nu mian haha aijo'. Lapas aijo' aha nompinsoopimo uno nu kuil,

²⁶ka' nosabatakonmo patong nu Baal lantas pinapuanmo nu aha.

²⁷Patong aijo' i hansunan nu aha tiba laigannyo, lantas tampat aijo' binaumo nu aha pibodo'an nu aha sampe sinaa aiya.

²⁸Sumo aijo' na i Yehu nongingkoti iwi-iwi' anu lewa' monsombah Baal i Israel.

²⁹ Kalana aitu koonyo nu Tumpu hi Yehu sumo uuka, “Iwi-iwi' na anu pinalentahkon-Kumo hi beleyum mongkona lee' i Ahab binaumo nu beleyum. Kalana aijo' Aku balajanji' to maku-makumpu nu beleyum sampe toka-toka i lapisan anu ko opatnyomo na lee' nu beleyum aijo' na timbali bau tomundo' nu Israel.” Panyo i Yehu madi' talalo buke-buke na kinyonyoanyo montuluti atulan nu Tumpu, Tumpu Allah nu Israel. Ia nontulutimo apaa na anu binaumo i Yerobeam anu nonsaduakon mian nu Israel binaladosa'mo kalana nonsombahmo sapi' mosoni' anu pinotinjonyo i Betel tiba kiijo' i Dan.

³²Tempo'nyo aitu Tumpu nongga'aimo da'erah nu Israel, sahingga madi'mo dinaka'. I Hazael tomundo' nu Siria nongalamo iwi-iwi' na da'erah nu Israel,

³³sasu kabete'an Kaunyo Yordan toka-toka i kota' Aroer i sasu salatan koko Kaunyo nu Armon tiba da'erah Gilead tiba Basan, kajojoongan nu aha lee' mae i Gad, Ruben ka' Manasye sasu kabete'an.

³⁴Sisikon sangga'at mongkona i Yehu, tiba hahan anu ma'ima', mongkona kabaaniannyo tinulismo i Kitab sisikon nu to Tomu-Tomundo' Israel.

³⁵I Yehu nompalentahmo salaku tomundo' i Israel 28 na taun na kinopinnyo. Ia sinilakamo ka' i lamun i Samaria. Lantas i Yoahasmo anaknyo na tinimbali tomundo' nombolosakon ia.