Read Saluan 2 TOMU-TOMUNDO' 12 Bible Online

2 TOMU-TOMUNDO' 12 - Saluan bible

2 TOMU-TOMUNDO' 12

¹I taun ko popitu'nyomo na i Yehu nompalentah Israel, i Yoas tinimbalimo tomundo' nu Yehuda. Ia nompalentah Yerusalem 40 taun na kinopinnyo. Tinanyo sanggonyo i Zibya mian nu kota' Bersyeba.

²Balakat i Imam Yoyada lewa'mo nongajan i Yoas, sahingga i uno nu kantumuu'an i Yoas saja' momposanang kinyonyoa nu Tumpu.

³Me moko sala'nyo, tampat posomban pilogot madi' ingideannyo, sahingga mian da'isan daagi' saja' monsombahkon koloban ka' mompapu kamangian i kiijo'.

⁴ Daagi' kino sansinaan i Yoas nolagamo to ima-imam ka' pinoto'inyomo na aha monguna' doi anu o humpak hi aha anu toka mae monsombahkon i Laigan nu Tumpu, mau doi pombayan anu pongulus koloban, kabai doi anu halala' na nu bee' mae nu aha.

⁵Batu-batu imam tionyo ahi' mompangakui mongatun ima-ima' doi anu nu sombahkon nu to mia-mian anu nu atun akon nu aha na momboa mae palasombahan. Doi aijo' opake mompokopiani anu na'idekmo na apa-apaa i Laigan nu Tumpu.

⁶Tinoka i taun kino uampulu'nyomo ka' totolu' na i Yoas nompalentah, to ima-imam ma'isa ahi' nompokopiani apa-apaa na anu na'idekmo i Laigan nu Tumpu

⁷Kalana aijo' i Yoas nolagamo i imam Yoyada ka' to ima-imam sangga'at ka' pinokilawanyo, “Kadaka' belemiu ma'isa nompokopiani Laigan nu Tumpu? Mulai sinaa aiya belemiu madi' mo ku pobee' mompouna' doi anu ohumpak nu belemiu hi mian. Iwi-iwi' tionyo ahi' obee'mo nu belemiu da opake mompokopiani Laigan nu Tumpu.”

⁸Imam haha aijo' sinitujumo da madi'mo molimu' doi hi mian da'isan ka' madi'mo mompangakui mongatun ima-ima' doi anu bau pompokopiani Laigan nu Tumpu.

⁹Sahingga i Yoyada nongalamo sa'angu' na peti' ise-ise' ka' binolo'annyomo aita' i kolopnyo, lantas pinotimpasnyomo koko Mezbah sasu koanan nu sabatan pinsoopan i Laigan nu Tumpu. Iwi-iwi' na doi anu osombahkon i Laigan nu Tumpu opo'isi i peti' ise-ise' aijo', nu to ima-imam anu monjagai aijo' i sabatan pinsoopan.

¹⁰De doi i peti' ise-ise' aijo' manjoo'mo, julutulis i tomundo' tiba Imam Daka' tokamo mae molekeng doi aijo', ka' nulupi' mo nu aha.

¹¹Salatan opoko tulismo na konjoo'nyo nu doi aijo', lantas obee'mo hi to mia-mian anu mongkapalai mokalaja mompokopiani Laigan nu Tumpu. Lantas to mia-mian anu mongkapalai kalaja aijo' na mombayan to tuka-tukang kau', ka' kapala nu tukang, ka' anu montukangi batu, ka' anu mompa'at batu.

¹²To mia-mianmo anu mongkapalai kalaja aijo mule' na mongoli kau' ka' batu ka' anu mongatun mule' iwi-iwi' na doi anu osabatakon, anu opake mompoko piani aijo'.

¹³Panyo doi aijo', mau ola sangkiding madi' opake pongoli apa-apaa anu obau sasangkin salaka, mangko', tolompet, pakakas nu sulu, kabai pakakas sangga'at anu mosoni na obau kabai salaka.

¹⁴Iwi-iwi' pombayan to tuka-tukang, ka' pongoli apa-apaa na anu opake bau pompokopiani Laigan nu Tumpu aijo'.

¹⁵ To mia-mian anu mongkapalai kalajanyo hodi' hondo na kinyonyoanyo nu aha, jadi maumo madi' opoita na lapulan nu doi hi aha.

¹⁶ Doi nu koloban anu bau pombolosi kalugi'an ka' koloban pongampuni dosa', madi' oposoop i peti' ise-ise' aijo'. Doi aijo' obee' hi to ima-imam.

¹⁷Tempo'nyo aitu i Hazael tomundo' nu Siria nontumbuhimo ka' nonjojoongimo kota' Gad. Lantas ia binatanga' mule' montumbuhi Yerusalem.

¹⁸Sahingga i Yoas nompakatumo doi da bau pontobus hi ia. Doi aijo' iwi-iwi' i humpaknyo hi anu osombahkon nu mian anu u'utu pe'e mae binee'mo i Yoas ka' i Yosafat. I Yoram ka' i Ahazia hi Tumpu, aijo'mo to tomu-tomundo' anu nompalentahmo ma'isa pe'e kino ianyo. Ka' suele iwi-iwi' na mosoni' i uno nu peti' ise-ise' anu kiijo' i Laigan nu Tumpu ka' i laigan nu tomundo'. Sahingga i Hazael madi'mo sinida na nontumbuhi Yerusalem.

¹⁹Lapas aijo' to mia-mian anu ko pangkatnyo mokalaja i kakalaja'an Yehuda nosa'angu'mo da mongewa i Tomundo' Yoas. Ua aha anu aijo' i sangalu nu aha; aijo'mo i Yozakar anak i Simeat, ka' i Yozabad anak i Somer, nompateimo i Yoas i sa'angu' na laigan anu pinotinjo i tambunan nu tano' i sasu kabete'an Yerusalem, i jalan mintudun mokaiyong i Sila. I Yoas i lamun i tampat pinolamunan to tomu-tomundo' i Kota Daud i Amazia anaknyo na tinimbali tomundo' nombolosi ia. Sisikon sangga'at mongkona i Tomundo' Yoas tinulismo i Uno nu Kitab Sisikon nu to Tomu-tomundo' nu Yehuda.