Read Saluan 2 TOMU-TOMUNDO' 13 Bible Online

2 TOMU-TOMUNDO' 13 - Saluan bible

2 TOMU-TOMUNDO' 13

¹I taun kino uampulu'nyomo ka' totolu' na i Yoas anak i Ahazia nompalentah Yehuda, i Yoahas anak i Yehu tinimbalimo tomundo' nu Israel ka' ia nompalentahmo Samaria kinopinnyo sinampulu' ka' popitu' na taun.

²Susumo i tomundo' Yerobeam nompalentah ma'isa pe'e kino ianyo, i Yoahas binaladosa'mo hi Tumpu ka' nonsabapimo mian nu Israel suele binaladosa'mo. Ia madi' toho' nompala'i palabuatan anu toto ma'i-ma'idek.

³Kalana aijo' notambuha'mo na Tumpu hi Israel sahingga la nompojohokmo i Hazael tomundo' nu Siria ka' i Benhadad anaknyo pa' pinimpian na nompatundu' Israel.

⁴Lantas i Yoahas binalado'amo hi Tumpu, ka' Tumpu nohongomo do'anyo aijo', kalana tinoa nu Tumpu talalomo hondo inguesan na tomundo' nu Siria mongkabisa'i mian nu Israel.

⁵Tumpu nombe'imo samian anu bau molaya' hi aha mian nu Israel anu molapasakon aha i kakuasa'an nu Siria sahingga aha tumuu' madi'mo ko anu mompoposia susumo u'utu mae.

⁶Maumo sumo aitu mian nu Israel madi' ahi' belenti na lewa' mombau dosa' susumo anu tinampu'unanmo i Tomundo' Yerobeam. Aha saja'mo nombau to dosa-dosa' haha aijo', ka' nompojohokmo patong boune Asyera tataap i Samaria.

⁷To sulu-suludadu nu Israel i hopu'anmo nu tomundo' Siria sahingga me 50 na suludadu i Tomundo' Yoahas anu monsake'i ajahan 10 na kereta anu bau pahampate ka' 10.000 na suludadu.

⁸Sisik sangga'at mongkona i Tomundo' Yoahas ka' iwi-iwi' na kauntungannyo nahampate kalana kabaaniannyo tinulismo i uno nu Kitab Sisikon nu Tomu-tomundo' nu Israel.

⁹Ia sinilakamo ka' ilamunmo i pinolamunan i kiijo' i Samaria. I Yoas anaknyo na nombolosi ia tinimbali tomundo'.

¹⁰I taun ko tolumpulu'nyomo ka' popitu' na i Tomundo' Yoas nompalentah Yehuda, i Yoas tinimbalimo tomundo' nu Israel ka' nompalentah Samaria, 16 taun na kinopinnyo.

¹¹Ia suele binaladosa'mo hi Tumpu kalana nontihomo kalakuan anu ma'idek i Tomundo' Yerobeam nonon saduakonmo mian nu Israel nombaumo dosa'.

¹²Sisikon sangga'at mongkona i Tomundo' Yoas tiba kabaaniannyo i uno nu pahampatean nongewa i Amazia tomundo' nu Yehuda, tinulismo i uno nu kitab Sisikon nu to Tomu-Tomundo' Israel.

¹³I Yoas sinilakamo ka' i lamunmo i pinolamunan to tomu-tomundo' kiijo' i Samaria. I Yerobeam ko II nyo aijo'mo anaknyo na tinimbali tomundo' nombolosakon ia.

¹⁴ Daagi' kino sansinan tempo'nyo i Nabi Elisa nahanmo na sakit nyo ka' nambamo mae tinoa i Tomundo' Yoas na ia. Salatan tinoanyo malia'mo silaka na i Elisa, tomundo' aijo' i humangmo ka' pinoto'inyomo, “O tuumangku, O tuumangku, anu nontinjohakonmo Israel ka' anu talasanggo hondo!”

¹⁵“Alamae na pompelet ka' hihisnyo!” na koonyo i Elisa hi ia I Yoas nongalamo,

¹⁶lantas i Elisa nompokaumo ia da mogogau'mo susumo anu mompana'mo. Jadi i tomundo' nogogau'mo, ka' i Elisa nompompotiikmo limanyo i lima i tomundo'.

¹⁷Lapas aijo' susumo anu pinalentahkonmo nu nabi aijo, i tomundo' nontuhea'akonmo tolongan anu mo'ahop mokiijo' i Siria. “Peletakonmo mokiijo' na pana' nu beleyum!” na koonyo i Elisa. Salatan noko pana'akonmo na tomundo' aijo', nabi aijo' notataemo daka-daka', “Beleyum na pana' nu Tumpu Tiba pana' atina', Tumpu mompatundu'mo Siria. Beleyum saidi' mae mahampatemo mongewa mian nu Siria kiijo' i Afek sahingga nu patundu'mo nu beleyum na aha.”

¹⁸I Elisa nompokaumo i tomundo' Yoas da mongala pana'nyo sangga'at ka' sinapahakonnyomo i tano'. I tomundo' nonsapahakon i tano' pinintolun, lapas aijo' madi'mo.

¹⁹I Elisa pinusamo ka' notatae, “Sabenannyo beleyum tionyo ahi' monsapahakon sampe piliman kabai pinganom da beleyum moko ala mompatei iwi-iwi' na bansa Siria. Panyo uuka beleyum mompatundu' aha ola pintolun.”

²⁰Lapas aijo' i Elisa madi' pinin sinilakamo ka' i lamunmo. Tempo'nyo aitu to mia-mian nu Moab anu lewa' mombau anu ma'idek nontumbuhi mian Israel sataun minsan.

²¹Daagi' kino sansinaan tempo'nyo aitu ko mian pa' aha sangkuka hau-haunyo molamun mian anu silakamo, monti-montiik tinoamo nu aha na mian nu Moab anu lewa' mombau anu ma'idek tinokamo mae. Sahingga bangke' aijo' me i lumbu'akon nu aha i liang pinolamunan i Elisa ka' aha nopalaimo. Ka' Salatan bangke' aijo' tinudunmo hi buku i Elisa, bangke' aijo' po'ule'mo tinumuu' ka' tinuminjomo.

²²Tempo'nyo i Yoas nompalentah, i Hazael tomundo' nu Siria lewa'mo nonsansala mian nu Israel.

²³Panyo Tumpu nolibosmo hi mian anu pinalesayamo hi Ia ka' nongampunimo aha. Ia madi' mompojohok aha opatei, panyo montulungi aha kalana monginau' palajanjiannyo hi Abraham, anak i Ishak ka' hi Yakup. Sampe tempo' uuka aiya, Ia madi' mongkolilimi mian anu pinalesayamo hi Ia.

²⁴Lapas aijo' i Hazael tomundo' nu Siria sinilakamo, ka' i Benhadad anaknyo na nombolosakon ia tinimbali tomundo'.

²⁵Lantas i Yoas tomundo' nu Israel nompatundu'mo i Benhadad pinintolun ka' po'ule'mo ingalanyo na kota' anu ingalamo i Benhadad tempo'nyo i Tomundo' Yoahas tuuma i Yoas nompalentah.