Read Saluan 2 TOMU-TOMUNDO' 17 Bible Online

2 TOMU-TOMUNDO' 17 - Saluan bible

2 TOMU-TOMUNDO' 17

¹I taun ko sampulu'nyomo ka' ohua' na i Tomundo' Ahas nompalentah Yehuda, i Hosea anak i Ela tinimbaimo tomundo' nu Israel ka' ia nompalentahmo i Samaria kinopinnyo ingosio' na taun.

²Ia binaladosa'mo hi Tumpu, panyo dosa-dosa'nyo madi' sumo konjoo'nyo nu dosa' nu to tomu-tomundo' nu Israel anu ma'isa pe'e ia nompalentah.

³Ia pinahampateakon ka' pinatundu'mo i Salmaneser tomundo' nu Asyur sahingga sataun toka sataun ia tionyo ahi' mombayan hasin hi ia.

⁴Panyo daagi' ko sa'angu' na tempo' i Hosea nonsaimo mian hi So tomundo' nu Mesir momoita da montulungi ia. Lantas i Hosea madi'mo nombayan hasin anu sataun toka sataun obayan hi tomundo' Asyur. Salatan i Salmaneser nonsumbu'mo kalakuan i Hosea aijo' ia nohakopmo i Hosea ka' pinosoopnyomo i uno nu talungku'.

⁵Lapas aitu i Salmaneser tomundo' nu Asyur nontumbuhimo Israel ka' nontikumo Samaria. I taun ko totolu'nyomo salatan noko tumbuhimo aijo',

⁶— anu ko osio'nyomo na taun na i Hosea nompalentah — i Salmaneser nongalamo Samaria. Lantas mian nu Israel binoanyomo nokiijo' i Asyur salaku mian anu i hakop. Sambagian na aha pinojoong i kota' Halah, ka' sambagian mule' koko Kaunyo Habor i da'erah Gozan, ka' sambagian mule' i to kota-kota' i lipu' Madai.

⁷Samaria pinatundu'mo kalana mian nu Israel binaladosa'mo hi Tumpu, Tumpu Allah nu aha nomposalamatmo aha da madi' pinatean i tomundo' Mesir, ka' nomboa aha nosabat lengkat mae i lipu' aijo'. Aha nonsombahmo to pilo-pilogot sangga'at,

⁸ka' lewa'mo montiho adat nu to bansa-bansa anu i laa'mo nu Tumpu tempo'nyo bansa Israel nambamo nompahampateakon bansa haha aijo'. Bansa Israel nontulutimo adat kabiasa'an anu pinotatapmo nu to tomu-tomundo' Israel.

⁹Ka' nombaumo hahan anu madi' nu ka'i ma'i nu Tumpu, Tumpu Allah nu aha. Aha lewa'mo nombau tampat ponsomban pilogot i iwi-iwi' na kota' nu aha mau kota' anu to ise-ise', mau i kota' anu toto daka-daka'.

¹⁰ Aita' mae i to puge-puge'nyo ka' i patu nu kau' anu toto tambo-tambok na honnyo, aha lewa'mo nombau tugu ka' to patong-patong Pilogot boune Asyera.

¹¹Aha mule' nompapuimo kamangian osombahkon hi pilogot aijo' hi iwi-iwi' na mezbah susumo anu saja' obau nu bansa-bansa anu i laa'mo nu Tumpu da bolimo jojoong i lipu' Kana'an. Aha nonsombahmo pilogot mau mule' Tumpu nontewa'mo. Batu-batu kalakuan nu aha anu madi' ma'ima' nonsaduakonmo Tumpu da pinusamo

¹²

¹³Tumpu nonsaimo to mia-mian ka' to nabi-nabi-Nyo hi aha mian nu Israel ka' Yehuda da mompotokakon pokinde' sumo uuka: “Bolimo mombau anu madi' ma'ima' ka' o tulutimo na batu-batu palentah ka' atulan anu binee'-Kumo hi mompolee' nu belemiu ka' hi belemiu anu nu poto'ije nu to nabi-nabi ka' to posa-posaihon-Ku haha aijo'.”

¹⁴Panyo Israel ka Yehuda madi' mongka'oho' mohongo. Aha talalo panggaga susumo mompolee' nu aha anu madi' palesaya hi Tumpu, Tumpu Allah nu aha.

¹⁵Israel ka' Yehuda madi' mongka'oho' montuluti iwi-iwi' na palentah nu Tumpu ka' madi' montuluti palajanjian anu binauNyomo tiba mompolee' nu aha. Aha madi' montapali to poki-pokinde'Nyo, panyo ola ahi' monsombah to pilo-pilogot anu madi' ko gunanyo, sahingga aha suele madi'mo ko gunanyo. Aha nombatukimo sonto' apaa na anu nu bau nu to bansa-bansa anu mompaha ohani aha, mau mule' Tumpu nontewa'mo.

¹⁶ Aha madi' mombatuki iwi-iwi' na atulan nu Tumpu, Tumpu Allah nu aha ka' montutukmo logam binau ohua' na sapi' da osombah. Aha nombaumo patong pilogot boune Asyera, nonsombahmo to bina-binatang ka' nonsombahmo pilogot Baal.

¹⁷ Aha nonsombahkonmo to ana-anak nu aha salaku koloban anu opotunu osombahkon hi pilogot. Aha mompake ilimu' anu madi' otoa ka' momoita da nupotiju' nu to sando-sando anu timbali potataean nu to tomi-tominuat. Aha mongka'ima'i hondo mombau hahan anu madi' nuka'ima'i nu kinyonyoa nu Tumpu,

¹⁸sahingga Tumpu pinusamo hondo hi aha, ka' madi'mo daagi' nonginau' aha. Ingalinnyomo na aha da madi'mo jojoong i tano' anu binee'-Nyomo hi aha, anu daagi' tinontuha' me kalaja'an Yehuda.

¹⁹To mia-mian nu Yehuda suele madi'mo nontuluti iwi-iwi' na atulan nu Tumpu, Tumpu Allah nu aha. Aha lewa'mo mombatuki kabiasa'an nu mian Israel,

²⁰sahingga Tumpu madi'mo daagi' nongakui iwi-iwi' na mian nu Israel. I hukum-Nyomo na aha ka' binee'-Nyomo hi anu monsampo bali' aha anu toto ue-uesan. Ia madi'mo daagi' monginau' aha, panyo ingalin-Nyomo na aha da madi'mo jojoong i tano' anu binee'-Nyomo hi aha.

²¹Salatan Tumpu nongga'atmo Israel da bolimo mosa'angu' tiba Yehuda, mian nu Israel nohangkatmo I Yerobeam anak i Nabot da timbalimo tomundo' nu aha. Lantas i Yerobeam nompalentahmo aha bolimo o palesaya na Tumpu ka' mombaumo iwi-iwi' na dosa' anu toto daka-daka'.

²²Aha nombatukimo kalakuan i Yerobeam ka' saja'mo mombau iwi-iwi' na dosa' anu binaunyomo.

²³Sahingga ahennyo mae madi'mo Tumpu nonginau' aha, panyo ahi' ingalin-Nyomo na aha da bolimo jojoong i tano' anu binee'Nyomo hi aha. Aijo' jinadimo susumo anu pinoto'imo nu Tumpu hi aha anu pinotokamo nu to posa-posaihon-Nyo ka' to nabi-nabi. Sumo aijo'mo na mian nu Israel anu binoa nokiijo' i pinongalinan i Asyur ka' i kiijo'mo na aha jinojoong sampe sina uuka aiya.

²⁴Salaku pinombolosi mian nu Israel anu binoamo nokiijo' ka' pinojoongmo kiijo' mae, i tomundo' nu Asyur nompojoongmo mian i kota' Samaria haha aijo' anu lengkat mae i Babel, Kuta, Awa, Hamat, ka' Sefarwaim. Mian haha aijo' nonjojoongimo kota' haha aijo' ka' tinataapmo i kiijo'.

²⁵Tempo'nyo aha momona jinojoong i kiijo' aha madi'mo nongadati Tumpu; aijo' na sababnyo Tumpu nompodaagi'mo to singa-singa anu lewa' monsa'u sambahagian na aha.

²⁶Lantas mian nonsisikmo hi mian Asyur tukoonyo nu aha to mia-mian anu pinojoong i to kota-kota' nu Samaria madi' monsumbu' to atu-atulan nu pilogot i lipu' aijo'. Aijo' na sababnyo sahingga pilogot aijo' nompodaagi'mo singa da monsa'u aha.

²⁷Kalana aijo' i tomundo' Asyur nompalentahmo da samian na Imam anu i hakop ka' binoa pinojoong nokiijo' i Asyur po'ule'mo sinai nokiijo' i Samaria. “Saimo na ia minsusule' ka' jojoongmo i kiijo' mae da ia mompogulu' mian haha aijo'.” Mongkona to atu-atulan nu pilogot nu lipu' aijo'. Na koonyo i tomundo'.

²⁸Sahingga samian na imam nu aha Israel anu binoa ka' jinojoong i Betel. I kiijo' mae ia nompogulu' mo mian da'isan mosia na sabenannyo monsombah Tumpu.

²⁹Panyo mian haha aijo' anu jojoong i Samaria saja' monsombah to pilo-pilogot nu aha ka' nupo'una' nu aha i kuil nu aha haha aijo'. Toto sa'angu' na tompuk nosi bau pilogotnyo i kota' anu ka jojoongan nu aha.

³⁰Mian nu Babel nombau patong pilogot Sukot-Benot, mian nu Kuta nombau patong Nergal, mian nu Hamat nombau patong Asima,

³¹mian nu Awa nombau patong Nibhas, ka' Tartak, ka' mian nu Safarwaim nonsombahkonmo to ana-anak nu aha salaku koloban anu opotunu osombahkon hi pilogot Adramelekh ka' hi Anamelekh.

³²Ka' mule' misa' ola monsombah pilogot panyo mule' monsombah ahi' Tumpu. Aha mompile'imo bubu' aha da mokalaja susumo Imam da monsombahkon koloban i kuil nu pilogot.

³³Jadi aha monsombah Tumpu, panyo aha mule' monsombah ahi' tominuat nu aha susumo adat kabiasa'an nu lipu' pinolengkatan mae nu aha.

³⁴ Sampe sinaa uuka aiya, aha daagi' monjalanakon adat kabiasa'an nu aha. Aha madi' monsombah Tumpu ka' madi' ahi' suele montuluti to atu-atulan ka' palentah-Nyo anu binee'-Nyomo hi lee' i Yakub anu sinanggohan-Nyomo Israel.

³⁵ Tumpu nombaumo palajanjian sumo uuka hi mian nu Israel, “Boli monsombah hi pilogot sangga'at, boli tolodadupu monsombah aha kabai mombau anu nu palentahkon nu aha kabai monsombahkon koloban hi aha.

³⁶ O'adati mae na Aku anu nomboamo mae belemiu nosabat lengkat mae i Mesir nu kuasa anu daka' hondo, ka' sombah mae na Aku, ka' osombahkon mae na koloban hi belengku.

³⁷Saja' otuluti na to atu-atulan ka' to pale-palentah anu tinulis Kumo da ogunakan nu belemiu. Boli monsombah to pilo-pilogot sangga'at,

³⁸ka' boli okolilimi na palajanjian-Ku tiba belemiu.

³⁹Otuluti na Aku Tumpu Allah nu belemiu sahingga Ku lapasakonmo na belemiu da boli nu poposia nu sampo bali' nu belemiu.”

⁴⁰Panyo mian anu jojoong i Samaria aijo' madi' mongka'oho' mohongo, aha tataap montoongi adat kabiasa'an nu aha.

⁴¹Jadi aha monsombah Tumpu, panyo mule' monsombah ahi' to pilo-pilogot nu aha sampe sinaa uuka aiya lee' mae nu aha daagi' saja' mombau han aijo'.