Read Saluan 2 TOMU-TOMUNDO' 18 Bible Online

2 TOMU-TOMUNDO' 18 - Saluan bible

2 TOMU-TOMUNDO' 18

¹I taun ko totolu'nyomo na i Tomundo' Hosea anak i Ela nompalentah Israel, i Hizkia anak i Ahas tinimbalimo tomundo' nu Yehuda.

²Tempo'nyo aitu umunnyo 25 na taun, ka' ia nompalentahmo i Yerusalem 29 na taun na kinopinnyo. Sanggo nu tinanyo i Abia anak i Zakharia.

³I Hizkia nombaumo anu momposanang kinyonyoa nu Tumpu susumo i Tomundo' Daud mompolee'nyo.

⁴ Tampat anu lewa' ponsomban pilogot pinaha ideannyomo, ka' pinahahobo'akonnyomo na patong-patong ka' tugu anu pinaha potinjo salaku pontandai Pilogot boune Asyera iwi-iwi' ingideannyomo. Ka' ia mule' nongideimo ulo tambaga anu binau i Musa anu osa-osanggohi i Nehus. Kalana sangkut tinoka i tempo' aitu mian nu Israel daagi' mompapui kamangian bau pongadati ulo tambaga ai-aijo'.

⁵Kalana aha, to tomu-tomundo' iwi-iwi' i Yehuda mau anu ma'isa pe'e kino i Hizkianyo kabai anu nombolosakonje ia madi' ko anu pokakana sumo ia. Ia palesaya hi Tumpu, Tumpu Allah nu aha Israel, ka' tulu-tulutan hi Ia.

⁶Madi' toho' ia pinanggaga hi Tumpu. Iwi-iwi' na palentah nu Tumpu anu binee'nyomo ka' pinoto'imo i Musa nu tuluti hondo-hondo i Hizkia.

⁷Mokonyo' aijo' saja' Tumpu montulungi ia, sahingga apa-apaa na anu nu bau saja' mingkaliangan. Ia nongewamo i tomundo' Asyur, ka' madi' nongka'oho' tinulut hi ia.

⁸Pinatundu'nyo na mian nu Filistin, ka' pinahuhuakonnyomo na tampat kajojoongan nu aha, lengkat pe'e i kampung anu to ise-ise' hondo tinoka-toka i kota' anu toto daka-daka' hondo. Tibamo Gaza ka' da'erahnyo songko-songko.

⁹I taun ko opatnyomo na i Hizkia nompalentah tempo'nyo aitu taunmo ko popitu'nyo na i Tomundo' Hosea nompalentah Israel, i Salmaneser tomundo' nu Asyur nontumbuhimo Israel ka' nontikumo Samaria.

¹⁰Salatan tinotolu'mo na taun na kinopinnyo na aha nontiku, Samaria tinundu'mo. Han aijo' jinadimo i taun ko anomnyomo na i Hizkia nompalentah, ka' i taunmo ko osio'nyo na i Hosea nompalentah.

¹¹Lapas aijo' binoamo nu tomundo' Asyur na to mia-mian nu Israel i Asyur salaku mian anu i hakop; sambagian na aha pinojoong i kota' Halah, sambagian koko Kaunyo Habor i da'erah Gozan, sambagian mule' i kota-kota' i lipu' nu aha Madai.

¹²Samaria pinatundu'mo kalana mian nu Israel madi'mo nontuluti Tumpu, Tumpu Allah nu aha. Aha madi'mo montapali apaa na anu jinanji'mo nu Tumpu hi aha, ka' aha madi'mo nombau apaa na anu pinalentahkonmo i Musa posaihon nu Tumpu aijo' Madi'mo aha mongka'oho' mohongo-hongo ka' madi'mo kahanda' montuluti.

¹³I taun ko sampulu'nyomo ka' opat na i Tomundo' Hizkia nompalentah Yehuda, kota-kota' nu Yehuda anu ko bentengnyo tinumbuhanmo ka' pinatundu'mo i Sanherib tomundo' nu Asyur.

¹⁴Sahingga hi Sanherib anu jojoong kiijo' mae i Lakhis, pinotunmo i Hizkia sumo uuka: “Aku sinala'mo. Kalana aitu ku kakase de timbali bolimo mae belento Tuan montumbuhi kami. Iwi-iwi' na anu opoita nu belento Tuan, tionyo ahi' ku bee'.” Binalosan i Sanherib tukoonyo hi Hizkia, tionyo ahi' mompakatu hi ia 10.000 kilogram na salaka ka' mosoni 1.000 kilogram.

¹⁵Kalana aitu salaka iwi-iwi' anu i uno nu Laigan nu Tumpu ka' anu i uno nu kas anu kiijo' i laigan nu tomundo' pinakatumo i Hizkia hi Sanherib.

¹⁶Mosoni' anu pinaha pokona i tumban nu Laigan nu Tumpu ka' anu pinokonamo i Hizkia aita' i buan nu sabatan anu so' opindeduluk ingalanyomo ka' suele pinakatunyomo hi Sanherib.

¹⁷Panyo i Tomundo' Sanherib nompalentahmo mae ahi' gombuan anu manjoo' hondo na suludadunyo lengkat mae i Lakhis da montumbuhi Yerusalem. Gombuan nu suludadu haha aijo' sinanggaluan mae nu aha totolu' na Suludadu anu matangkas na pangkatnyo, ka' samian an talenga', samian na anu mongulus uee anu o'inum, ka' samian na anu mongkapalai suludadu monjagai tomundo'. Salatan tinokamo i kota' aijo', aha nongalamo tampat i ladang, anu osanggohi ladang Penatu koko sepe'nyo nu uee anu mo'ili lengkat mae i kolam anu aita' mae ibawonyo.

¹⁸Lantas aha nolobo'imo nolaga i Tomundo' Hizkia. Sahingga aha totolu' na mian anu ko pangkatnyo mokalaja hi tomundo' nosabatmo mae nonsingkaboti aha. Aha totolu' na mian anu ko pangkatnyo aijo'mo, i Elyakim anak i Hilkia kapala nu anu mongkalesang laigan nu tomundo', i Sebna gulu tulis nu negara, ka' i Yoah anak i Asaf gulu tulis i laigan nu tomundo'.

¹⁹Samian na suludadu nu Asyur anu matangkas na pangkatnyo aijo' hi aha notataemo hi aha, “Poto'i hi Hizkia na potatae nu tomundo' Asyur sumo uuka: Kadaka' beleyum monsangka au'aitu butong nu beleyum nahosonmo?

²⁰Pa' koyum ola potatae na timbalimo sumomo kapandean ka' kahosonan nu suludadu? Ihemo na nu taha'imani, sahingga beleyum baanimo na mongewa Asyur?

²¹Beleyum memang montaha'imani Mesir na montulungi, panyo aijo' pokakanamo, sumomo mintokon nu batang nu padang; de tokon aijo' mopato'mo lima nu beleyum nususukje sumo aijo'mo na tomundo' nu Mesir kona hi mian anu montaha'imani ia.”

²²Suludadu nu Asyur anu matangkas na pangkatnyo aijo' notatae mule', “Kabai ugaat koonyo nu belemiu, belemiu montaha'imani Tumpu, Tumpu Allah nu belemiu? Tempo'nyo i Hizkia nompalentahkon da mian nu Yehuda ka' Yerusalem ola samata-mata monsombah i ahop nu mezbah kiijo' i Yerusalem, te misa anu ingideannyomo aijo'mo mezbah ka' tampat anu lewa' ponsomban Tumpu.

²³Uuka aiya aku na motatae nomboa mae sanggo i tomundo' Asyur, aku baani na batalo de belemiu obee'i 2.000 na ajahan, tantu belemiu madi' ko samian anu monsake'i iwi-iwi' de sumo aijo'mo na konjoo'nyo!

²⁴De mongewa suludadu mami maumo anu i aluknyo hondo na pangkatnyo, belemiu misa' pe'e anu pantas nu ewa nu aha. Maumo belemiu montaha'imani Mesir na mompakatui mae kareta bau pahampate ka' suludadu anu monsake'i ajahan

²⁵osangka nu belemiu kami montumbuhi ka' mompatundu' lipu' nu belemiu madi' nutulungi mae nu Tumpu! Tumpu na monsai kami montumbuhi ka' mompatei!”

²⁶Lantas notataemo na i Elyakim i Sibna, i Yoah, hi suludadu anu matangkas na pangkatnyo aijo', “O tuan, potatae basisik nu aha mian Aram hi kami, kami suele monsumbu'. Boli motatae susumo basisik nu mian Ibrani, dumo nusumbu' nu mian da'isan anu aita' i pagan mesen nu kota'.”

²⁷Tinamaan nu suludadu anu matangkas na pangkatnyo aijo', “Te ola hi belemiu ka' hi tomundo' nu belemiu na pinonsaian mae nu tomundo' Asyur da pompoto'iannyo iwi-iwi' aiya? Madi'! Aku suele motatae ahi' hi aha mian da'isan anu paha-paha suhang i pagan mesen aita' anu saidi' mae tiba belemiu mongkaanmo anu sala' nu belemiu ka' tatidi' nu belemiu o' inummo nu belemiu.”

²⁸Lapas aijo' suludadu anu matangkas na pangkatnyo aijo' tinuminjomo ka' notataemo daka-daka' i potatae nu aha Ibrani, “Potombihing mae pa' mosia na koonyo nu tomundo' Asyur:

²⁹'Boli belemiu mongka'oho' nu akali i tomundo' Hizkia; ia madi' moko ala momposalamat belemiu.

³⁰Boli mompajuli apaa na pagala nu sale'akon hi belemiu tukoonyo Tumpu na otaha'imani. Boli monsangka Tumpu na momposalamat belemiu, kabai montewa' suludadu nu Asyur da boli mongala kota' nu belemiu.

³¹Boli mohongo-hongo i Hizkia. Aku, tomundo' nu Asyur mompoto'i da mosabatmo mae na belemiu atina' i kota' ka' tulutmo. Timbali o kaan miu na bua' nu anggur i ale' nu belemiu, ka' mongoa'i mosia na koima'nyo na bua' ara anu pinosi su'an nu belemiu, ka' monginum uee anu i posi bubung nu belemiu.

³²Sampe tokaje na tempo'nyo belemiu ku boaje i lipu' sangga'at anu momoho' pokakana susumo lipu' nu belemiu. I kiijo' mae ko ale' nu anggur anu pongalapan miu bua'nyo, ka' ale' nu gandum anu timbali obau labu ka' okaan nu belemiu. I lipu' aijo' manjoo' na kau' Zaitun, lanya' nu zaitun ka' juu' nu uani'. De belemiu montuluti apaa na anu ku poto'i hi belemiu, belemiu tumuu', ka' madi' silaka. Boli mohongo-hongo i Hizkia! Ia ola mongakali belemiu nu potataenyo, tukoonyo Tumpu na momposalamat belemiu.

³³Te toho'mo ko pilogot nu bansa sangga'at anu nomposalamatmo lipu' nu aha sahingga madi'mo kinuasanku?

³⁴Iyamo na pilogot haha aijo' nu lipu' Hamat tiba Arpad? Iyamo na pilogot nu Sefarwaim, Hena, ka' Iwa? Te daagi' ko anu tinoka nomposalamat Samaria?

³⁵Pilogot iyamae na toho' nomposalamat lipu' nu aha da madi' kinuasanku? Te moko ala mule' na Tumpu momposalamat Yerusalem?’.”

³⁶Nohongo potatae sumo aijo', mian anu jojoong i Yerusalem madi'mo nontaami, kalana i Tomundo' Hizkia nompalentahmo da haha momohokotmo.

³⁷Sahingga i Elyakim, i Sebna ka' i Yoah nombea-beakmo baju' nu aha, salaku tanda talalomo hondo sinusa' na kinyonyoa nu aha, lantas nambamo pinoto'i nu aha hi tomundo' apaa na anu pinoto'imo nu suludadu nu Asyur anu matangkas na pangkatnyo aijo'.