Read Saluan 2 TOMU-TOMUNDO' 2 Bible Online

2 TOMU-TOMUNDO' 2 - Saluan bible

2 TOMU-TOMUNDO' 2

¹Tempo'nyo tinokamo, nuhangkatmo nu Tumpu na i Elia mambamo i Suluga' ia i hangkatmo nu mombun anu makansang hondo. Tempo'nyo aitu i Elia ka' i Elisa nambamo lengkat i Gilgal.

²Ka' i olot nu jalan i Elia notataemo hi Elisa, “Jojoongmo i aiya. Aku sinaimo nu Tumpu da mamba i Betel.” Panyo tinaaman i Elisa, “I uno nu sanggo nu Tumpu anu Tuumu' ka' kalana nyawa nu belento Tuumangku aku madi' mompala'i belento Tuumangku.” Jadi aha lau-lausmo namba i Betel.

³Pa' aha sangkuka na nabi anu jojoong i kiijo' nambamo nonsingkaboti i Elisa, ka' nompokilawa, “Pa' ma'isa sinumbu' nu beleyum na tuan nu beleyum, sinaa aiya mompala'imo beleyum kalana nu hangkatmo nu Tumpu?” “Memang sinumbu'kumo,” na koonyo i Elisa. “Panyo bakasmo bolimo kita mombisalakon han aijo'.”

⁴Lapas aijo' notataemo na i Elia hi Elisa, “Jojoongmo i aiya aku sinaimo nu Tumpu da mambamo i Yerikho.” Panyo tinaaman i Elisa, “I uno nu sanggo nu Tumpu anu Tuumu' ka' kalana nyawa nu belento Tuumangku, aku madi' mompala'i belento Tuumangku.” Jadi aha lau-lausmo namba i Yerikho.

⁵Pa' aha sangkuka na nabi anu jojoong i kiijo' nambamo mae nonsingkaboti i Elisa ka' nompokilawa, “Pa' ma'isa sinumbu' nu beleyum na tuan nu beleyum nu hangkatmo nu Tumpu Allah ka' mompala'imo beleyum?” “Memang sinumbu'kumo panyo bolimo kita mombisalakon han aijo'.”

⁶Lapas aijo' notataemo na i Elia hi Elisa, “Jojoongmo i aiya. Aku sinaimo nu Tumpu da mambamo i kaunyo Yordan.” Panyo' tinaaman i Elisa, “I uno nu sanggo nu Tumpu anu tuumu' ka' kalana nyawa nu belento Tuumangku, aku madi' mompala'i belento Tuumangku.” Jadi aha lau-lausmo namba i Kaunyo Yordan,

⁷ka' aha 50 na nabi haha aijo' nombatukimo aha. Lantas i Elia ka' i Elisa sinonso'mo i biwi nu kaunyo, ka' aha 50 na nabi haha aijo' suele tinuminjomo madi' majo'on lengkat i kiijo'.

⁸I Elia nongukatmo juba'nyo lantas kinumukumnnyomo ka' sinapahakonnyomo i kaunyo aijo'. Sahingga uee nu kaunyo aijo' nobagimo ohua', jadi ia tiba i Elisa jinumalanmo i lananyo anu no'otimo aijo'.

⁹ Salatan tinokamo aijo' mae i santoanyo, pinoto'imo i Elia hi Elisa, “Poitamo mae pa' apaa na anu nu kahanda'i hi belengku, da ma'isa pe'e nuhangkat nu Tumpu ka' mompala'imo beleyum!” Tinaaman i Elisa “Bee'mo mae na kuasa nu belento Tuumangku hi belengku, da aku moko ala mombolosakon belento Tuumangku.”

¹⁰“Bah, itina' na mahan hondo ahi',” na koonyo i Elia. “Panyo de nu toamo na aku nu hangkatmo nu Tumpu, apaa na anu nu poita atina' obee'mo. De madi' nu toa aijo' alati'nyo apaa na anu nu poita madi' obee'.”

¹¹Hau-haunyo aha laja-lajang aha sabasi-basisiknyo. Monti-montiik sa'angu'na kareta anu ko apunyo anu nu hela' nu ajahan ko apunyo tinokamo mae nongoloti aha, lantas i Elia i hangkatmo namba i suluga' nu mombun anu makansang hondo.

¹² Tinoamo i Elisa lantas ia notataemo “O Elia, Tuumangku! Tuumangku! Anu nonjagaimo Israel ka' baani hondo! Belento Tuumangku madi'mo ko anu i aiya!” Ahennyo madi'mo tinoa i Elisa na i Elia. Kalana sinusa'mo na I Elisa, sahingga juba'nyo bineaknyomo ohua',

¹³lantas nontolukmo juba' i Elia anu nanabu'mo mae. Lapas aijo' ia ninsusule'mo ka' tinuminjomo i biwi nu kaunyo Yordan,

¹⁴lantas sinapahakonnyomo na juba' i Elia aijo' i uee ka' notatae, “Iyamo mae na Tumpu, Tumpu Allah i Elia aijo'?” Salatan sinapahakonnyomo na juba' aijo' i uee nu kaunyo aijo' ueenyo ai-aijo' nobagimo ohua' lantas ia i lumajangmo nokiijo' i santoanyo.

¹⁵Aha lima-limampulu' na nabi anu kiijo' i Yerikho nontoamo ka' notatae, “Kuasa' i Elia nolalinmo hi Elisa!” Aha tinokamo mae hi ia ka' tinolodadupumo i ahopnyo nonsombah ia,

¹⁶ka' notatae, “Kami aiya 50 na mian iwi-iwi' to hoso-hoson. Kalana aijo' imbo' da mamba olionto na i Elia tuan nu beleyum aijo'. Ugaat Roh nu Tumpu nomboamo ia nokiita' i bungkutnyo kabai i bangka'nyo, ka' nompojoongmo i kiijo' mae.” “Bolimo pilenje!” na koonyo i Elisa.

¹⁷Panyo sabole-bolemo sinale'an nu aha, sahingga sinitujuannyomo. Sahingga nambamo na nabi aha limampulu' aijo' nolio i Elia, tinolunsinaa na kinopinnyo, panyo' madi' i humpak nu aha.

¹⁸Lantas aha ninsusule'mo hi Elisa kiijo' mae i Yerikho montanda'i aha. “Te misa' pinoto'ingkumo hi belemiu bolimo mamba?” na koonyo i Elisa hi aha.

¹⁹Daagi' kino to mia-mian lengkat mae i Yerikho namba mae hi Elisa ka' notatae, “Kita tuuma, susumo anu pinosi toantomo nu belento tuuma, kota' aiya ma'ima', panyo ueenyo ma'idek ka' monsaduakon boune anu poboa, ola saja' lamba-lamba.”

²⁰“Ala mae na mangko' anu daagi' bu'ou,” na koonyo i Elisa, “ka' isii timuson,” Lantas binoamo nu aha hi ia apaa na anu pinoitanyomo aijo'.

²¹Lantas nambamo na i Elisa i mata nu uee ka' nolumbu'akon timuson aijo' i uno nu uee ka' notatae, “Aiyamo na anu kokoonyo nu Tumpu; 'Aku nompolinomo uee aiya da madi'mo monsaduakon mian silaka kabai anu poboa ola saja lamba-lamba!’ ”

²²Mulai sinaa aitu uee aijo' nolinomo susumo anu tinaloakonmo i Elisa.

²³Lapas aijo' i Elisa nambamo nompala'i Yerikho ka' nambamo i Betel, I olot nu jalan daagi' ko to ana-anak pa' aha sangkuka nosabatmo mae lengkat i kota' lewa'mo nongkokojoi ia, “O ubak lenggeng, ubak lenggeng, lako' pala'i na tampat aiya!” na anu lewa' i loobo'akon nu aha.

²⁴I Elisa nosiloi ka' nontoa aha lantas sinumpa'akonnyomo na aha i uno nu sanggo nu Tumpu. Madi' pinin ohua' na beruang behenyo nosabatmo mae i kuhat ka' nombente-bentek aha patompulu' ka' ohua' na to ana-anak anu sinihuk aijo'.

²⁵I Elisa lau-lausmo namba no kiita' i Bungkutnyo nu Karmel, lapas aijo' ia ninsusule'mo i Samaria.