Read Saluan 2 TOMU-TOMUNDO' 21 Bible Online

2 TOMU-TOMUNDO' 21 - Saluan bible

2 TOMU-TOMUNDO' 21

¹I Manasye umunnyo 12 mo na taun tempo'nyo ia tinimbalimo tomundo' nu Yehuda, ka' ia nompalentahmo i Yerusalem 55 na taun na kinopinnyo. Tinanyo sanggonyo i Hefzibah.

² I Manasye binaladosa'mo hi Tumpu, kalana lewa'mo nontiho kalakuan anu ma'idek, anu biasa nu bau nu to bansa-bansa anu i laa'mo nu Tumpu lengkat mae i Kana'an tempo'nyo mian nu Israel ninsoopmo i lipu' aijo'.

³Tampat anu lewa' ponsomban pilogot anu ingideanmo i Hizkia tuumanyo po'ule'mo binaunyo. Manjoo' na mezbah anu lewa' binaunyo bau ponsomban Baal, ka' nombaumo mule' patong Pilogot boune Asyera, susumo anu binaumo i Ahab tomundo' nu Israel. I Manasye mule' nonsombahmo to bina-binatang.

⁴ Pinoto'imo nu Tumpu tukoonyo Yerusalem na tampat katokaan-Nyo, ka' tampat ponsomban Ia, panyo aijo' i Laigan nu Tumpu, singkapmo binauan i Manasye mezbah ponsomban pilogot.

⁵Ohu-ohua' na popasan i Laigan nu Tumpu aijo' binauannyomo mezbah haha aijo' bau ponsomban to bina-binatang.

⁶Anaknyo sinombahkonnyomo salaku koloban anu pinotunu. I Manasye mule' lewa'mo binasando monggulu'i pangatahuan anu toto ide-idek, ilimu' anu madi' oto-toa, ka' lewa' montunde' tominuat. Ia binaladosa'mo hondo hi Tumpu sahingga ia notambuha'mo hondo.

⁷ Pontandai Pilogot boune Asyera pino'una'nyomo i uno nu Laigan nu Tumpu, padahan tampat aijo' pinoto'imo nu Tumpu hi Daud ka' hi Salomo anaknyo momo'ane. “Laigan-Ku tiba kota' Yerusalem aiya, pinile'an-Kumo hi sampulu' ka' ohua' na tulunan nu bansa Israel, anu jojoong i da'erah aiya, aiyamo na tampat anu tinantukan-Ku salaku tampat ponsomban Aku.

⁸Ka' de mian nu Israel anu pinalesayamo hi belengku montuluti hondo-hondo iwi-iwi' na palenta-ngKu ka' mo batuki iwi-iwi' na atulan anu binee'mo i Musa posaihon-Ku hi aha, saba' madi' pinojohok-Ku na aha i laa' nompala'i lipu' anu binee'-Kumo hi mompolee' nu aha.”

⁹Panyo mian nu Yehuda madi' montuluti Tumpu, ka' i Manasye, ola mule' ahi' nompaka saduakon aha da mombau dosa' haha aijo' anu lebe ma'idek nolingkuduimo dosa' anu binaumo nu to bansa-bansa anu i laa'mo nu tumpu nompala'i Kana'an tempo'nyo mian nu Israel anu pinalesayamo hi Tumpu aijo' ninsoopmo i lipu' aijo'.

¹⁰Kalana aijo' hi to nabi-nabi, hi to posa-posaihon nu Tumpu, Tumpu nompoto'imo,

¹¹“I Tomundo' Manasye ma'idek hondo. Kalakuan ma'idek anu binaunyomo nolingkuduimo kalakuan nu mian nu Kana'an. Kalana ia nombaumo hahan anu mompalesaya pilogot, sahingga ia nonsaduakonmo mian nu Yehuda binaladosa'mo.

¹²Kalana aijo' Aku Tumpu Allah anu nu sombah nu mian Israel anu pinalesayamo hi belengku, mompotokamo mae balaa' anu daka' hondo hi Yerusalem ka' hi Yehuda, sahingga toto samian anu mohongo han aijo' tolokengkengmo.

¹³Yerusalem Ku hukummo susumo Aku mohukum Samaria ka' i Ahab Tomundo' nu Israel tiba lee'nyo. Yerusalem Ku polomosmo susumo lean anu binaso'anmo ka' pinokulub-Kumo.

¹⁴Mian anu daagi' jojoong i kiijo' Ku pojohokmo da timbali kaanon nu to bansa-bansa anu kahanda' mongewa ia, anu mompatundu'mo aha, ka' mompahahuhuakonmo lipu' nu aha.

¹⁵Iwi-iwi' aijo' Ku baumo hi mian anu pinalesayamo hi belengku kalana aha binaladosa'mo hi belengku ka' nonsaduakonmo sahingga tinambuha'an-Kumo lengkat pe'e hi mompolee' nu aha tempo'nyo nosabatmo lengkat mae i Mesir sampe sina uuka aiya.”

¹⁶Misa' ola nonsaduakonmo mian nu Yehuda binaladosa'mo hi Tumpu kalana binapilogotmo, panyo suele i Manasye nompateimo manjoo' hondo na mian anu madi' ko sala'nyo sahingga baso' no'ilimo iyaya mae i Yerusalem.

¹⁷Sisikon sangga'at mongkona i Tomundo Manasye ka' mongkona dosa' haha aijo' anu binaunyomo, tinulismo i kitab Sisikon nu to Tomu-tomundo' Yehuda.

¹⁸I Manasye sinilakamo ka' i lamunmo i taman anu kiijo' koko laigan nu tomundo' aijo'mo taman i Uza. I Amon anaknyo momo'ane na tinimbali tomundo' nombolosakon ia.

¹⁹Tempo'nyo i Amon 22 mo na taun na umunnyo ia tinimbalimo tomundo' nu Yehuda ka' ia nompalentahmo i Yerusalem ingohua' na taun na kinopinnyo. Sanggo nu tinanyo i Mesulemet anak i Harus, mian nu Yotba.

²⁰Susumo tuumanyo ia suele binaladosa'mo hi Tumpu.

²¹Ia nontihomo apa-apaa na anu binaumo nu tuumanyo ka' nonsombahmo pilogot anu lewa' sinombah nu tuumanyo.

²²Ia madi' tinumuu' nombatuki pongka'oho' nu Tumpu, aitu pe'e ia nohikumo Tumpu, Tumpu Allah anu sinombah nu mompolee'nyo.

²³To mia-mian anu ko pangkatnyo mokalaja hi Amon nombaumo kasangaja'an da mongewamo ia ka' nompateimo kiijo' i laigan nu tomundo'.

²⁴Panyo mian da'isan nu Yehuda nompateimo aha anu nompateimo i Tomundo' Amon aijo', lantas nohangkatmo i Yosia anaknyo binau tomundo'.

²⁵Sisikon sangga'at mongkona i Tomundo' Amon tinulismo i kitab Sisikon nu to Tomu-tomundo' Yehuda.

²⁶I Amon i lamunmo i polamunan kiijo' i taman Uza. I Yosia anaknyo na tinimbali tomundo' nombolosakon ia.