Read Saluan 2 TOMU-TOMUNDO' 23 Bible Online

2 TOMU-TOMUNDO' 23 - Saluan bible

2 TOMU-TOMUNDO' 23

¹I Tomundo' Yosia nolagamo iwi-iwi' na to pola-polaya' nu Yehuda tiba Yerusalem.

²Lantas ia nambamo tiba aha i Laigan nu Tumpu, ka' suele to ima-imam nombatukimo, to nabi-nabi ka' iwi-iwi' na mian da'isan anu kasiasi ka' mule' anu kaya. I ahop nu aha iwi-iwi' koko batu anu lewa' katinjoan i tomundo' tinuminjomo na ia ka' nombasa'akon hoson-hoson palajanjian anu tuli-tulis i kitab anu i humpakmo i Laigan nu Tumpu. Lapas aijo' i tomundo' binalajanji'mo hi Tumpu da saja'mo montuluti Ia, ka' totu-totu'umo na kinyonyoanyo, ka' onyawaimo na montuluti palentah ka' iwi-iwi' na atulan-Nyo. I tomundo' mule' binalajanji'mo da mongganapimo apa-apaa na anu tionyo ahi' obau i uno nu palajanjian aijo' hi Tumpu tiba mian anu pinalesayamo hi Ia susumo anu tinulismo i uno nu kitab aijo'. Iwi-iwi' suele na mian da'isan binalajanji'mo da saja' ahi' mombau apaa na anu jinanji'mo aijo'.

⁴ Lapas aijo' pinalentahmo i tomundo' na Imam Daka' Hilkia, to ima-iamam anu lewa' mompaha tulungi Imam Daka' tiba to mia-mian anu monjagai ka' mokalaja i sabatan nu Laigan nu Tumpu, da mosabatakon iwi-iwi' na pakakas anu kiijo' i uno nu Laigan nu Tumpu anu opake monsombah Baal, Pilogot boune Asyera, tiba manda-mandala'. Iwi-iwi' na pakakas aijo' pinapuan i Tomundo' Yosia i sambiha' nu kota' koko Bangka'nyo nu Kidron, lantas abu'nyo binoamo i Betel.

⁵To imam-imam anu i hangkat nu to tomu-tomundo' Yehuda anu mokalaja i tampat lewa' ponsomban pilogot iwi-iwi' na kota' i da'erah Yehuda, ka' i Yerusalem; pinaha pobelentinyomo; ka' suele to ima-imam anu monsombahkon koloban hi Baal, batu nu sinaa, bitu'on ka' to manda-mandala'.

⁶Patong Pilogot boune Asyera anu kiijo' i Laigan nu Tumpu sinabatakonnyomo, ka' binoanyomo i Bangka'nyo nu Kidron i sambiha' nu kota'. I kiijo' mae na pinompapuian patong haha aijo', lantas buhingnyo inguja'mo sahingga nohimumu'mo hondo-hondo, ka' abu'nyo kinakambuhakonmo i kubulan nu mian da'isan.

⁷Salipi' iwi-iwi' anu i Laigan nu Tumpu anu lewa' pasala' an nu to mia-mian masala' i Laigan ponsomban pilogot, salaku ponsomban nu aha pilogot ingideanmo. (I salipi'mo haha aijo'na to bou-boune montonun hude anu opusok monsombah Pilogot boune Asyera).

⁸Iwi-iwi' na imam anu jojoong i songko-songko na kota' nu Yehuda sinaimo i Yosia da mamba i Yerusalem, lantas iyaya mae na lipu' anu i da'erah Yehuda i humimi'annyomo na mezbah haha aijo' anu lewa' ponsombahkonan nu to ima-imam koloban hi Pilogot, Imam haha aijo' madi'mo pinobee' mongatun mian anu monsombah Tumpu i Laigan nu Tumpu aijo'. Panyo aha timbali mongkaan roti anu madi' ko raginyo anu tinoukanmo bau bagi nu to sanga-sangalu nu aha. Mezbah haha aijo' anu tinuaakonmo bau ponsomban pilogot koko Sabatan Daka' i Yosua, anu mongkapalai kota' nu lipu' aijo' i hobo'akonnyomo. Sabatan daka' aijo' binau i sasu kewe' i Sabatan daka' anu Talasanggo i jalan pinsoopan mokiijo' i kota'.

⁹

¹⁰ Tofet, aijo'mo tampat ponsomban pilogot i Bangka' nyo nu Hinom i humimi'anmo. Tiba jalan anu sumo aijo' madi'mo daagi' ko mian anu timbali monsombahkon anaknyo salaku koloban anu opotunu ka' osombahkon hi Pilogot nu Molokh.

¹¹Iwi-iwi' na ajahan anu tinungka'akonmo nu to tomu-tomundo' nu Yehuda da bau ponsombah batu nu sinaa ingalinanmo ka' to kare-kareta anu pinake bau ponsombah aijo' pinapuanmo. (Kaleta haha aijo', i natan nu Laigan nu Tumpu — koko sabatan daka' — madi' majo'on i salipi' jojoongan i Natan Melekh, samian na anu ko pangkatnyo matangkas.)

¹² Mezbah haha aijo' anu binau nu to tomu-tomundo' nu Yehuda anu aita i atopnyo i bawo nu to sali-salipi' i Tomundo' Ahas, ingideannyomo Ka' suele iwi-iwi' na mezbah anu binau i Tomundo' Manasye anu aijo' i ohu-ohua' na natan nu Laigan nu Tumpu, ingideanmo i Yosia ka' ingalinnyomo i Bangka'nyo nu Kidron.

¹³ Ka' suele mezbah haha aijo' anu i sasu kabete'an Yerusalem, i sasu salatan Bungkutnyo nu Ka'idekan i humimi'anmo. Mezbah haha aijo' binau i Tomundo' Salomo bau ponsomban to pilo-pilogot anu mahumimi' — aijo'mo Asytoret pilogot boune bansa Sidon, Kamos pilogot nu bansa Moab, tiba Milkom pilogot nu bansa Amon.

¹⁴Tugu iwi-iwi' nu pilogot tiba patong boune Asyera ihobo'akonmo lantas tano' anu pinombauan tugu haha aijo' tiba patong haha aijo' tinambulanmo i Yosia nu to buku-buku nu manusia.

¹⁵ Ia mule' nongideimo tampat ponsomban kiijo' i Betel anu binau i Tomundo' Yerobeam anak i Nebot — tomundo' anu nonsaduakonmo mian nu Israel nombaumo dosa'. Lantas i Yosia nombiha'mo mezbah, i tampat ponsombahkonan aijo' ka' pinapuannyomo tiba Patong boune Asyera anu daagi' kiijo'.

¹⁶ Lapas aitu i Yosia nosiloimo ka' nontoamo to pia-piangkuka na kubulan aita' i bungkutnyo. Sahingga sinainyomo na mian nongakehi kubulan haha aijo', ka' nombuatakonmo mae to buku-buku ka' pinapuannyomo i mezbah anu hau-haunyo nopapumo aijo'. Sumo aijo' na bau-baunyo na ia nohumimi'imo mezbah aijo'. Sahingga jinadimo na anu u'utu mae toho'mo pinoto'i nu nabi nu Tumpu tempo'nyo i Tomundo' Yerobeam hau-haunyo tinjo-tinjo koko mezbah i sa'angu' na lamean. Lapas aijo' i Tomundo' Yosia nontoamo mule' sa'angu' na kubulan sangga'at.

¹⁷ Sahingga pinokilawanyomo, “Kubulan ihe na aiya?” Mian nu Betel haha aijo' nontaami, “Aijo' kubulan nu samian na nabi nu Tumpu anu toho'mo tinoka i aiya, lengkat mae i Yehuda, ka' anu nompoto'imo hahan anu sala'je binau nu belento Tomundo' mongkona mezbah aiya.”

¹⁸“Boli opoposia na kubulan aijo',” na koonyo nu palentah i tomundo', “Pojohokmo na bukunyo haha aijo' i kiijo' boli olalin!” Sahingga santo buku-buku nu nabi anu lengkat mae i Yehuda aijo' madi' pinoposia, sumo aitu mule' na to buku-buku nu nabi anu lengkat mae i Samaria anu kinubun i kiijo'.

¹⁹Iwi-iwi' na kota' anu kiijo' i Israel, pinaha ideanmo i Tomundo' Yosia na tampat ponsomban pilogot anu binau nu to tomu-tomundo' nu aha Israel, ka' nonsaduakonmo Tumpu pinusamo. Apaa na anu binau i Tomundo' Yosia kiijo' i Betel, aijo'mo na anu binaunyo mule' i mezbah-mezbah anu i songko-songko na Israel.

²⁰Iwi-iwi' na imam anu mokalaja i tampat ponsomban pilogot pinateannyomo aijo' i to mezbah-mezbah hau-haunyo aha mokalaja. Ka' i toto sa'angu' na mezbah aijo' i Yosia nompapuimo to buku-buku nu manusia. Lapas aijo' ia ninsusule'mo namba i Yerusalem.

²¹Lapas aijo' i Tomundo' Yosia nompalentahmo mian da'isan da molame'akon paskah susumo anu titinulis i uno nu kitab Palajanjian Tiba Tumpu. Tiba jalan sumo aijo' aha nongadatimo Tumpu, Tumpu Allah nu aha.

²²Daagi' pe'e tempo'nyo bansa Israel pinalentah nu mian anu to babaani ma'isa pe'e toho' tomundo' nu Israel kabai tomundo' nu Yehuda anu molame'akon paskah sumo aijo'.

²³Tinokaje i taun kino sampulu'nyomo ka' ualu' na i Yosia nompalentah, aituje na Paskah i lame'akon mule' i Yerusalem salaku bau pongadati Tumpu.

²⁴Mompojalan atulan haha aijo' anu tinulismo i uno nu kitab anu i humpak i Imam Daka' Hilkia kiijo' i Laigan nu Tumpu, iwi-iwi' na anu lewa' montunde' tominuat ka' anu lewa' montahi'i i laa'mo i Tomundo' Yosia da boli jojoong i Yerusalem ka' i songko-songko na Yehuda, lantas ia nongalinmo iwi-iwi' na pilogot ka' to bala-balang anu opake monsombah to pilo-pilogot.

²⁵Ma'isa toho' ko tomundo' susumo i tomundo' Yosia anu palesaya hondo hi Tumpu, tiba mule' totu-totu'u na kinyonyoanyo ka' aijo' otoa i langkasnyo ka' kalakuannyo, madi' sala' tiba atulan anu i uno nu kitab i Musa. Salatan i Tomundo' Yosia madi'mo nompalentah, madi'mo daagi' kino tomundo anu sumo ia.

²⁶Panyo' kalakuan i Tomundo' Manasye nonsaduakonmo da Tumpu nontambuha'imo aha Yehuda; ka' tambuha'nyo aijo' ma'isa pe'e tinompo'ule' na'ima'.

²⁷Tumpu notatae, “Apaa na anu toho'mo binaungku hi aha Israel Ku bauje hi aha Yehuda. Mian nu Yehuda Ku boamo ka' opojoongje i lipu' anu Ku bee'je hi aha. Aku madi'mo nontalima Yerusalem, kota' anu pinile'an-Kumo, ka' suele Laigan-Ku aiya susumo anu tinaeyakon-Kumo baumo tampat ponsomban Aku.”

²⁸I Tomundo' Yosia sinilakamo i uno nu pahampatean kiijo'mae i Megido tempo'nyo ia namba nompahampateakon i Nekho, tomundo' nu Mesir anu hau-haunyo nambamo mae tiba suludadunyo montulungi i Tomundo' Asyur i sonibi nu Kaunyo Efrat bangke' i Tomundo' Yosia ingala nu pagawenyo ka' binoa nu aha ninsusule' pinosake' i kareta nu aha namba i Yerusalem. I kiijo' mae ia i lamunmo i pinolamunan to tomu-tomundo'. Lantas mian da'isan nu Yehuda nompile'imo ka' nohangkat i Yoahas anaknyo momo'ane tinimbali tomundo' nombolosakon ia. Sisikon sangga'at mongkona i Tomundo' Yosia tinulismo i uno nu kitab Sisikon nu to tomu-tomundo' Yehuda.

²⁹

³⁰

³¹Umun i Yoahas 23 taun salatan ia tinimbalimo tomundo nu Yehuda ka' ia nompalentah Yerusalem tinotolu' na bitu'on na kinopinnyo. Sanggo nu tinanyo i Hamutal anak i Yeremia lengkat mae i kota' Libna.

³²I Yoahas binaladosa'mo hi Tumpu susumo mompolee'nyo mae.

³³I Yoahas madi'mo nompalentah salatan i Nekho tomundo nu Mesir nohakopmo ia kiijo' mae i Ribla i da'erah Hamat, ka' binoamo nu aha ka' nompakisamo Yehuda nombayan hasin hi ia konjoo'nyo 3.400 kilogram na salaka tiba 34 kilogram na mosoni'.

³⁴ Lapas aijo' i Tomundo' Nekho nohangkatmo anak mo'ane i Yosia, sanggonyo i Elyakim tinimbalimo tomundo' nu Yehuda, ka' nombali'imo sanggo i Elyakim sinanggohanmo i Yoyakim. I Yoahas binoamo namba i Mesir ka' ia sinilakamo i kiijo' mae.

³⁵Pombayan hasin anu nupoita i tomundo' Mesir, i Tomundo' Yoyakim mongala hasin anu lengkat mae hi mian da'isan iya na anu nupoko ala nu humpak nu aha toto samian.

³⁶ Umun i Yoyakim 25 mo na taun salatan ia tinimbalimo tomundo' nu Yehuda ka' ia nompalentahmo i Yerusalem 11 na taun na kinopinnyo. Sanggo nu tinanyo i Zebuda anak i Fedaya lengkat mae i kota' Ruma.

³⁷I Yoyakim binaladosa'mo hi Tumpu susumo mompolee'nyo mae.