Read Saluan 2 TOMU-TOMUNDO' 24 Bible Online

2 TOMU-TOMUNDO' 24 - Saluan bible

2 TOMU-TOMUNDO' 24

¹ Daagi' tempo'nyo i Tomundo' Yoyakim na nompalentah, i Nebukadnezar tomundo' nu Babel nontumbuhimo ka' nompatundu'mo Yehuda. Kinopinnyo tinotolu' na taun na i Yoyakim tinundu' hi Nebukadnezar, panyo mamanga ahi' ia notomuhukmo.

²Tumpu nonsaimo sa'angu' na tumpukan nu to sulu-suludadu lengkat mae i Babel, Siria, Moab, tiba Amon da mongewa i Yoyakim ka' monsila kaimo Yehuda susumo apaa na anu tinaloakon-Nyomo hi to nabi-nabi posaihonnyo.

³Memang han aijo' tionyo ahi' jadi, kalana Tumpu nontaeakonmo tukoo-Nyo Yehuda o'alinmo madi'mo jojoong i lipu' anu binee'mo nu Tumpu hi aha. Aha o'alin kalana sinin na dosa' anu binaumo i Tomundo' Manasye;

⁴Anu talalo hondo aijo'mo iwi-iwi' na anu binaunyomo nompatei to mia-mian anu madi' ko sala'nyo. Tumpu madi'mo daagi' mongampuni sinin na lalakuan i Manasye aijo'.

⁵Iwi-iwi' na da'erah lengkat pe'e i kaunyo nu Efrat toka-toka i potempasan nu Mesir, sasu utara anu ninsoopmo i da'erah kapalentahan i tomundo' Mesir, kinuasaanmo nu Tomundo' Babel. Kalana aijo' i tomundo' Mesir madi'mo toho' nosabat i lipu'nyo mamba mahampate. Sisikon sangga'at mongkona i Tomundo' Yoyakim tinulismo i uno nu kitab Sisikon nu to Tomu-tomundo' Yehuda. Salatan i Yoyakim sinilakamo, anaknyo momo'ane sanggonyo i Yoyakhin tinimbalimo tomundo' nombolosakon ia.

⁸I Yoyakhin umunnyo 18 mo na taun salatan ia binaumo tomundo' nu Yehuda ka' ia nompalentah Yerusalem tinotolu' na bitu'on na kinopinnyo. Sanggo nu tinanyo i Nehusta anak i Elnatan, lengkat mae i Yerusalem.

⁹Susumo tuumanyo, i Yoyakhin suele binaladosa'mo hi Tumpu.

¹⁰Tempo'nyo i Yoyakhin nompalentah tompukan nu suludadu nu Babel anu sinangaluan nu suludadu i Nebukadnezar anu nambamo nontumbuhi Yerusalem ka' nontikumo kota' aijo'.

¹¹Hau-haunyo kota' aijo' tinikumo i Nebukadnezar tinokamo i Yerusalem,

¹² Lantas i tomundo' Yoyakhin tiba tinanyo, to ana-anaknyo, to sulu-suludadunyo anu toto tangka-tangkas na pangkatnyo tiba to mia-mian anu ko pangkatnyo i Laigan nu tomundo' tinulutmo hi Nebukadnezar. Lantas i Yoyakhin i hakopmo ka' binoamo. Han aijo' jinadi i taun ko ualu'nyomo na i Nebukadnezar nompalentah.

¹³Iwi-iwi' na mosoni' anu binau i tomundo' Salomo anu opake i Laigan nu Tumpu ingideanmo i tomundo' Nebukadnezar Lantas iwi-iwi' na pakakas anu ko angga'nyo anu kiijo' i Laigan nu Tumpu ka' anu kiijo' i laigan nu tomundo' binoanyomo i Babel. Iwi-iwi' aijo' jinadimo susumo anu polo'mo pinoto'i nu Tumpu ma'isa pe'e han aijo' jinadi.

¹⁴ I Tomundo' Yoyakhin, tinanyo, to bengke-bengkele'nyo, to mia-mian anu ko pangkatnyo tiba to pola-polaya' nu Yehuda — iwi-iwi'mo 7.000 na mian anu toto pande-pande — i hakopmo ka' binoamo i Babel. Ka' suele anu toto pande-pande na mombau apa-apaa ka' tukang besak konjoo'nyo 1.000 na mian. Iwi-iwi' anu toto hoso-hoson ka' to babaani mahampate. To mia-mian lee' nu tomundo' ka' to mia-mian anu talasanggo suele binoamo i tampat pompojoongan — iwi-iwi'mo 10.000 na mian. Kinoboli' iwi-iwi'mo na mian anu jojoong i Yerusalem pinaha boamo; anu jinojoong me mian anu kasiasi hondo.

¹⁷ Lapas aijo' i Nebukadnezar nohangkatmo i Matanya, babo' i Yoyakhin, na binau tomundo' nu Yehuda, ka' binali'anmo na sanggonyo, sinanggohanmo i Zedekia.

¹⁸ I Zedekia umunnyo 21 mo na taun tempo'nyo ia tinimbalimo tomundo' nu Yehuda, Ia nompalentah Yerusalem 11 taun na kinopinnyo. Sanggo nu tinanyo i Hamutal, anak i Yeremia anu lengkat mae i kota' Libna.

¹⁹Susumo i Tomundo' Yoyakhin, i Tomundo' Zedekia suele binaladosa'mo hi Tumpu.

²⁰ Tumpu pinusa hondo hi mian anu jojoong i Yerusalem ka' hi aha mian nu Yehuda, sahingga Ia madi'mo nongkali-kaliang aha.