Read Saluan 2 TOMU-TOMUNDO' 25 Bible Online

2 TOMU-TOMUNDO' 25 - Saluan bible

2 TOMU-TOMUNDO' 25

¹ Lapas aijo' i Zedekia notomuhukmo hi Nebukadnezar tomundo' nu Babel. Kalana aijo' i Nebukadnezar tiba suludadunyo iwi-iwi' tinokamo mae nontumbuhi Yerusalem i tanggan sampulu' bitu'on ko sampulu'nyomo, i taun ko osio'nyomo na i Zedekia nompalentah. Aha nombaumo palung i sambiha'nyo nu kota' ka' nontambunmo tano' bau pontikuan

²ka' saja'mo nontumbuhi kota' aijo' sampe tinokamo i taun ko sampulu'nyomo ka' sa'angu' na i Zedekia nompalentah.

³I tanggan ko osio'nyomo bitu'on anu ko opatnyomo i taun aijo' salatan tinalalomo hondo na balaa' kasusa'an i anu o kaan, sahingga mian da'isan madi'mo hondo-hondo ko anu okaan,

⁴ pagan mesen nu kota' aijo' i hobo'akonmo nu sampo bali'. Pihi-pihi aijo' maumo mian nu Babel nontumbuhimo kota' aijo', iwi-iwi' na suludadu nu Yehuda nopalaimo namba i bangka'nyo nu Yordan. Aha nontulu jalan i taman anu aijo', koko laigan nu tomundo', lantas nosabatmo nontulu sabatan daka' anu mompoguntang ohua' na pagan mesen i tampat aijo'.

⁵Panyo suludadu nu aha Babel nololoi'mo i Tomundo' Zedekia ka' i hakopmo nu aha i hatanyo nu Kidron. Iwi-iwi' na suludadunyo nopalaimo nompala'i ia.

⁶Lapas aijo' i Tomundo' Zedekia binoamo hi Tomundo' Nebukadnezar i kota' Ribla, lantas pinokonanmo hukuman.

⁷ To ana-anaknyo pinateanmo i ahopnyo. Lapas aijo' i Zedekia binoamo ka' kinubetakonmo na matanyo, lantas pinungumo nu lante' besak ka' binoamo i Babel.

⁸I tanggan popitu', bitu'on anu ko olima'nyomo, i taun ko sampulu'nyomo ka' osio' na i Nebukadnezar tomundo' nu Babel nompalentah, tinokamo i Yerusalem na samian sanggonyo i Nebuzaradan. Ia anu lewa' mombee'i pokinde' i Nebukadnezar. Ka' mule' ia aijo' talenga' i Nebukadnezar.

⁹ I Nebuzaradan nompapumo Laigan nu Tumpu, laigan nu tomundo' ka' laigan iwi-iwi' nu to mia-mian anu talasanggo i Yerusalem.

¹⁰Lantas suludadunyo iwi-iwi' nohobo'akonmo pagan mesen iwi-iwi' i kota' aijo'.

¹¹Lantas mian anu daagi' i kota' aijo', aijo'mo mian anu pande na mokalaja, tuha'nyo nu aha anu i hakopmo ka' binoamo, ka' to mia-mian kasiasi, ka' to mia-mian anu nambamo natihapa' ka' nosangaja' hi aha mian nu Babel, iwi-iwi' binoamo i Nebuzaradan i Babel.

¹²Panyo sambagian na mian da'isan anu kasiasi hondo ka' madi' ko halata' pinojoongmo kiijo' i Yehuda ka' pinalentahnyomo mombau ale' nu anggur ka' ale' sangga'at.

¹³ Ohi' tambaga ka' kareta anu kiijo' i Laigan nu Tumpu, ka' mangko' tambaga, pinoso-poso'mo nu aha mian Babel, lantas iwi-iwi' na tambaga binoanyomo i lipu' nu aha.

¹⁴ Aha mule' nomboamo pakakas haha aiya: to siko-sikop, pongisian abu' nu mezbah, pakakas nu sulu' iwi-iwi', to mangko-mangko' anu bau pongisian baso' nu binatang anu o kolot bau koloban, to mangko-mangko' bau pompapuan kamangian, ka' iwi-iwi' na pakakas tambaga sangga'at anu opake de monsombah Tumpu.

¹⁵To paka-pakakas mosoni' tiba salaka, sagalamo mangko' anu toto ise-ise' ka' lean anu opake pongisian oba ingalamo i Nebuzaradan hi ia.

¹⁶Pakakas anu tambaga na binau anu pino ki tutuk i Tomundo' Salomo anu opake i Laigan nu Tumpu, aijo'mo ohua' na ohi', to kare-kareta ka' gumbang daka-daka', iwi-iwi' talalo hondo maboat sahingga madi'mo pinoko ala tinimbang.

¹⁷Ohu-ohua' na ohi' tambaga aijo' pokakana; toto sa'angu' ko tangkasnyo 8 na meten, ka' ko dompongnyo sasu tuu'nyo suele tambaga na binau ko tangkasnyo 1 meten ka' 30 na senti meten. Titikup i dompongnyo haha aijo' binuhi-buhitan susumo anu inganyam ka' binunga-bungan susumo bua' nu dalima, tambaga na binau.

¹⁸Ka' mule' i Nebuzaradan nohakopmo i Imam Daka' Seraya i Sefanya imam anu lewa' montulungi Imam Daka', aha totolu' na mian anu monjagai sabatan nu Laigan nu Tumpu, aha olima' na mian anu lewa' mompokinde'i i tomundo' anu daagi' kiijo' i kota', i talenga' wakin i talenga' anu montulis ulusan nu suludadu, ka' aha 60 na mian sangga'at anu toto tangka-tangkas na pangkatnyo.

²⁰Iwi-iwi' na mian haha aijo' binoamo nu aha hi Tomundo' Nebukadnezar i kota' Ribla,

²¹i da'erah Hamat. I kiijo' mae aha sinakisamo ka' pinateanmo. Sumo aijo' na mian nu Yehuda haha aijo' binoa lengkat mae i lipu' nu aha namba i lipu' anu pinompojoongan aha.

²² Lapas aijo' i Tomundo' Nebukadnezar nohangkatmo i Gedalya anak i Ahikam lee' mae i Safan, binau gubernur i Yehuda da mompalentah aha iwi-iwi' na mian anu daagi' jinojoong kiijo' mae.

²³Salatan to sulu-suludadu anu toto tangka-tangkas na pangkatnyo ka' to sulu-suludadu biasa nu Yehuda anu madi' tinunduk' hi Babel nohongomo i Gedalya i hangkatmo, aha iwi-iwi' tinokamo hi Gedalya i Mizpa. Suludadu anu toto tangka-tangkas na pangkatnyo aijo'mo i Ismael anak i Netanya, i Yohanan anak i Kareah, i Seraya anak i Tanhumet mian anu lengkat mae i kota' Netofa, ka' i Yazanya mian anu lengkat mae i kota' Maakha.

²⁴Pinoto'imo i Gedalya hi aha iwi-iwi' “Belemiu bolimo mabuhuk hi pamalentah nu aha Babel. Jojoongmo i lipu'to aiya ka' bakasmo da timbalimo posaihon i tomundo' Babel. Ku pangakuimo na belemiu da madi' osilakai.”

²⁵ Panyo kinona i bitu'on ko popitu'nyomo taun aijo' i Ismael anak i Netanya lee' mae i Elisama anu daagi' mae lee' nu tomundo', nambamo tiba aha 10 na mian nu Mizpa. Tinumbuhanmo nu aha ka' pinateanmo nu aha na i Gedalya tiba mian nu Yehuda ka' mian nu Babel anu kiijo' hi Gedalya.

²⁶ Sahingga iwi-iwi' na mian da'isan nu Yehuda anu kaya kabai kasiasi hingga-hinggat tiba suludadu anu toto tangka-tangkas na pangkatnyo nalaimo namba i Mesir kalana nabuhukmo hi mian nu Babel.

²⁷I tanggan uampulu' ka' popitu' bitu'on ko sampulu'nyomo ka' ohua' i taun ko tolumpulu'nyomo ka' popitu' salatan i Yoyakhin binoamo i lipu' anu pinompojoongan aha, tempo'nyo aitu na i Ewil-Merodakh tininbalimo tomundo' nu Babel. I taunmo aijo' na ia nompotoamo kalibosannyo hi Yoyakhin ka' sinabatakonnyomo na ia i talungku',

²⁸ka' ingatunnyomo ma'i-ma'ima'. I Yoyakhin binee'annyomo pangkat anu lebemo matangkas nolingkuduimo tomundo' sangga'at anu suele binoamo ka' pinojoongmo i Babel.

²⁹I Yoyakhin madi'mo pinopusokan baju' anu opusok nu mian de otalungku'mo, ka' saja'mo mongkaan i Laigan nu tomundo' ka' mule' obee'imo doi bau pongolinyo apa-apaa na anu nu palalui, i uno nu kantumuu'annyo. 85