Read Saluan 2 TOMU-TOMUNDO' 3 Bible Online

2 TOMU-TOMUNDO' 3 - Saluan bible

2 TOMU-TOMUNDO' 3

¹I taun ko sampulu'nyomo ka' ualu' na i Yosafat tomundo' nu Yehuda nompalentah, i Yoram anak i Ahab tinimbalimo tomundo' nu Israel ka' nompalentahmo Samaria, sinampulu' ka' ohua' na taun na kinopinnyo.

²Ia nombaumo kalakuan anu ma'idek i mata nu Tumpu, panyo ia madi' ahi talalo mombau kalakuan anu susumo binaumo i Ahab tiba i Izebel, tu'anyonyo. Patong anu binau nu tuumanyo bau ponsomban Baal i hobo'akonnyomo.

³Panyo susumo i tomundo' Yerobeam anak i Nebot anu nompalentahmo ma'isa pe'e kino ianyo, suele nonsaduakonmo mian nu Israel binaladosa'mo ka' madi' mongka'oho' belenti na mombau han aijo'.

⁴I Tomundo' Mesa mian nu Moab ko potu'on domba. Salaku bau pombayan hasin hi tomundo' Israel, sataun toka sataun ia toka mombayan 100.000 na anak nu domba ka' mule' bulu nu domba lakinyo unggalannyo 100.000 na domba lakinyo.

⁵Panyo' salatan i tomundo' Ahab sinilakamo, i Mesa notomuhukmo hi aha Israel.

⁶Kalana aijo' i Tomundo' Yoram sampamo nompala'i Samaria ka' nambamo nompaha tipaha'i iwi-iwi' na suludadunyo anu mahampate.

⁷Ia nompotuunmo hi Tomundo' Yosafat kiijo' mae i Yehuda sumo uuka, “I Tomundo' Moab notomuhukmo hi belengku; ku poita da belento montulungi mae aku mongewa ia?” “Ii',” na koonyo i Tomundo' Yosafat. “Aku tiba suludadungku ka' mule' suludadungku anu monsake'i ajahan mamba mon sangalui Beleyum.

⁸Iya na jalan katuluanto mamba montumbuhi?” “Kita montulu jalan anu monsa-monsahak padang mateges Edom,” na koonyo i Yoram.

⁹Sahingga nambamo na i tomundo' Yoram tiba i tomundo' Yehuda tiba i tomundo' Edom. Salatan pinitunsinaamo na aha i lumajang, uee nu aha ningkotmo. Sahingga suludadu nu aha ka' binatang anu momboa posadiaon nu aha madi'mo nonginum.

¹⁰“Silakamo na kita!” na koonyo i Tomundo' Yoram. “Kita totolu' aiya ingusahakonmo nu Tumpu da obee'mo hi Tomundo' Moab!”

¹¹Lantas pinokilawamo i tomundo' Yosafat, “Pa' i aiya mae na daagi' ko nabi nu Tumpu da pompokilawanto?” Daagi' ko samian na suludadu i Tomundo' Yoram anu matangkas na pangkatnyo nontaami, “Daagi' i Elisa anak i Safat! Ia u'utu mae lewa' nonsangalui i Elia.”

¹²“Totu'u! Tumpu memang lewa' notatae hi ia,” na koonyo i Tomundo' Yosafat. Sahingga aha totolu' na tomundo' ai aijo' nambamo i Elisa.

¹³“Kadaka' momoita tulungmo hi belengku?” na koonyo i Elisa hi tomundo' Israel. “Lako'mo ahi' mamba hi to nabi-nabi nu tu'anyo nu belemiu!” “Madi'!” na koonyo i Yoram. “Kalana Tumpu na nongusahakon da kami totolu' obee'mo hi tomundo' Moab.”

¹⁴Tinaaman i Elisa, “I uno nu sanggo nu Tumpu, anu kuku hongo-hongo ka' ku tuluti na palentahnyo, anu sahondo-hondonyo na ku poto'i uuka misa' kalana i Tomundo' Yosafat anu kuku angga'i aku madi' mongka'oho' balaulusan tiba belento Tuan.

¹⁵Uuka aiya boa mae na samian anu monsumbu' mongkuti' kasapi'.” Hau-haunyo mian aijo' mongkuti'mo kasapinyo, i Elisa kinuasanmo nu Roh nu Tumpu,

¹⁶sahingga ia notataemo, “Uuka na anu pinoto'imo mae nu Tumpu: 'Pahabaui got i sepe' anu biasa nu isii nu uee de ujanmo.

¹⁷Maumo belemiu ma'isa nontoa ujan tudunmo mae kabai ko mombunnyomo, panyo uee manjoo'mo i sepe' aiya. Belemiu ka' potu'on nu belemiu ka' binatang nu belemiu anu momboa posadiaon nu belemiu, mohumpakmo uee anu o'inum madi'mo lewa' monggantangi.’ ”

¹⁸Lantas notatae mule' na i Elisa, “Panyo aijo' ola sa'angu' na han anu dengke hi Tumpu. Ia suele mombee'ije ka'untungan hi belemiu de mahampatemo tiba mian nu Moab.

¹⁹Iwi-iwi' na kota' nu aha anu ko bentengnyo ka' to ima-ima' ohobo'akonmo nu belemiu; iwi-iwi' na kau' anu okaan na bua'nyo ota'imo nu belemiu, iwi-iwi' na kau' anu okaan na bua'nyo ota'imo nu belemiu, iwi-iwi' na mata nu uee nu tabuhimo nu belemiu, ka' iwi-iwi' na ale' anu toto lumba-lumba' opaha lumbu'imo nu belemiu nu batu sampe iwi-iwi' singkapmo ma'idek.”

²⁰Dodododopnyo salatan nonsombahkonmo koloban subu-subu, no'ilimo na uee lengkat mae i sasu Edom, sahingga nongisimo sampe no buke' na sepe' aijo'.

²¹Salatan mian nu Moab nohongomo aha totolu' na tomundo' aijo' nambamo mae montumbuhi, saba' iwi-iwi' na mian — lengkat pe'e hi anu to langka-langkai'mo toka-toka hi anu daagi' to oli-olitau anu moko alamo monsimbu toongon bau pahampate pinalentahmo ka' monjagai mo potempasan.

²²Dodododopnyo subu-subu salatan aha nobulamo, batu nu sinaa nompense'imo uee, sahingga nomea'mo na tinoa susumo baso'.

²³Aha nolobo'mo, “Baso'! Tantu to sulu-suludadu nu aha anu totolu' na gombuannyo nu sampo bali' mae haha aijo' nahantuda'mo ka' nompaha pate-pateimo! Imbo' da mamba opahuhuakonto na isi nu kemah nu aha!”

²⁴Panyo salatan to mia-mian nu Moab tinokamo i kemah nu aha, aha labotmo tinumbuhan nu mian Israel ka' sabole-bolemo i loloi' nu aha ka' nompateimo aha,

²⁵ka' nohobo'akonmo ka' nongideimo kota' nu aha haha aijo'. Ale' anu toto lumba-lumba' anu sinahakmo nu aha pinaha Lumbu'anmo nu aha nu batu. Ahennyo iwi-iwi' na ale' kahomo batu. To mia-ian nu Israel mule' nontabuhimo mata nu uee iwi-iwi' ka' lewa'mo nonta'i to kau-kau' anu okaan na bua'nyo. Anu daagi' pinotuha' ola kota' kir-Hareset, puso nu kota' nu Moab. Ahennyo kota' aijo' suele tinumbuhanmo ka' pinaha lumbu'anmo nu batu nu mian anu lewa' mombunu'akon nu salambeta.

²⁶Salatan ingoa'anmo i tomundo' Moab madi'mo moko ala na ia mongewa, ia nomboamo 700 na suludadu anu pande na montabasakon bajak, lantas nonsobamo nompinsoopi palatahanan nu suludadu i tomundo' Edom, panyo madi' pinoko ala nu aha.

²⁷Kalana aijo' ia nongalamo anaknyo momo'ane, lantas sinombahkonnyomo aita' i pagan mesen nu kota' salaku koloban anu osombahkon hi pilogot nu aha Moab. Sahingga nabuhukmo na mian nu Israel haha aijo', jadi suludadu nu aha ninsusule'mo nompala'i kota' aijo', lantas nambamo i kota' nu aha.