Read Saluan 2 TOMU-TOMUNDO' 4 Bible Online

2 TOMU-TOMUNDO' 4 - Saluan bible

2 TOMU-TOMUNDO' 4

¹Daagi' kino sansinaan balu nu samian na nabi nambamo hi Elisa ka' nompoto'i, “Kita Tuuma, langkai'ku sinilakamo! Ka' osumbu'mo nu belento Tuuma saba' ia suele mian anu tulu-tulutan hondo hi Tumpu Allah, panyo daagi' ko samaya'nyo hi mian. Sahingga mian aijo' tinokamo mae nongala anaku ua-ua'aha aha ka' nu baumo nu aha posaihon, salaku pombayan samaya' nu Tuuma nu aha aijo'mo langkai'ku sisinilakamo.”

²“Apaa na bau pontulungingku belento Pontina'on?” na koonyo i Elisa. “Kita pontina'on, apaa na anu daagi' kijo' i bonua?” “Madi' ko apa-apaa,” na koonyo nu boune aijo', “ola ahi' lanya' nu Zaitun sa'angu' na boton ise-ise'.”

³I Elisa notatae, “Lako' mamba ponsabon boton yayamo pa' sangkuka na konjoo'nyo anu madi' ko isinyo i laigan haha aitu anu mompaha ohani tiba belento Pontina'on.

⁴Lapas aijo' pinsoopmo i laigan nu belento Pontina'on tiba to ana-anak nu belento Pontina'on ka' tumban mae na sabatan. Lanya' itina' i boton ise-ise' paha lambe'akon i boton haha atina' ka' opotade na anu nobuke'mo.”

⁵Sahingga ninsusule'mo na boune aijo' i laigannyo. Lapas aijo' ia tiba to ana-anaknyo ninsoopmo ka' tinumbannyomo mae na laigannyo, ia nongalamo boton ise-ise' anu ko isinyo lanya' nu Zaitun aijo' lantas nolambe'akonmo lanya'nyo i boton haha aijo' anu binee' nu to ana-anaknyo hi ia.

⁶Salatan boton haha aijo' nobuke'mo iwi-iwi', ia nompoita mule' sa'angu' na boton. “Ningkotmo,” na konyo nu sala' samian na anaknyo haha aijo'. Sahingga lanya' aijo' madi'mo jinumuju.

⁷Lapas aijo' Pontina'on aijo' namba mule' hi Nabi Elisa, jadi koonyo i Elisa, “Pobaluk na lanya' haha itina' da bau pombayan iwi-iwi' na samaya' nu belento Pontina'on ka' labinyo baumo pontumuu' nu belento Pontina'on tiba to ana-anak nu belento Pontina'on.”

⁸I lipu' Sunem daagi' ko samian boune anu kaya. Daagi' kino sansinaan tempo'nyo i Elisa namba i Sunem, boune aijo' nolagamo i Elisa da mamba mongkaan hi ia. Mulai pe'e aitu de ia tokamo i Sunem, ia mamba mongkaan hi boune aijo'.

⁹Lantas notataemo na boune aijo' hi langkai'nyo, “De aku na montoa pintuuman anu saja' lewa' sonso' mae i aiya, mian aitu memang posaihon nu Tumpu.

¹⁰Sahanyo kita mombau sa'angu' na salipi' anu ise' aita' i bangkala' nu laiganto ka'opo'una'i koi, meja', kadela, ka' sulu' da bau kamale'annyo de ia sonso' mae hi kita.”

¹¹Daagi' kinosansinaan i Elisa tinoka mule' i Sunem. Salatan ia noliba'mo no kiita' i salipi'nyo kahanda'mo milawe,

¹²pinokaunyomo na i Gehazi posaihonnyo, mamba molaga boune aijo'. Salatan boune aijo tinokamo, notataemo na i Elisa hi Gehazi,

¹³“Pokilawa hi ia apaa na bau pombalosingku lawenyo aijo' hi kita. Ugaat ia mongkahanda'i da aku mamba hi tomundo' kabai hi talenga' nu suludadu ka' monsale'akon apaa na anu ku kahanda'i.” Boune aijo' nontaami, “Aku jojoong hi to julu-julungku ka' iwi-iwi' daagi' ko anu hi belengku.”

¹⁴Sahingga pinokilawamo i Elisa hi Gehazi, “Desumo itina', apaa na anu timbali ku bau pontulungi ia?” Tinaaman i Gehazi, “Ia madi' ko anak, kita Tuuma, ka' osoanyo talalomo i langkai'.”

¹⁵“Laga mae na boune itina',” na koonyo i Elisa. Boune aijo' tinokamo ka' tinuminjomo i sabatan.

¹⁶ Lantas pinoto'imo i Elisa hi ia, “Taun aiya mae i ahop, susumo uuka aiya belento Pontina'on montangkungmo samian na bunga mea' mo'ane.” “Kita Tuuma boli baleko'! Na koonyo nu boune aijo'. Kita Tuuma aiya posaihon nu Tumpu Allah!”

¹⁷Panyo' memang ahi' totu'u apaa na anu tinaloakonmo i Elisa. Taunnyo anu nolunduakonmo kila-kila kinonamo i tempo'nyo apaa na anu memang pinoto'imo, boune aijo' nompohampemo samian na anak mo'ane.

¹⁸Salatan anak aijo' dinaka'mo daagi' kino sansinaan tempo'nyo aitu pongalapanmo isi nu ale', anak aijo' nambamo hi tuumanyo anu kiijo' mae i ale' tiba to mia-mian anu mongala isi nu ale'.

¹⁹Monti-montiik anak aijo' nolobo'mo hi tuumanyo, “Ibee! Ubakku nasakitmo!” “Boa na anak aiya hi tinanyo,” na koonyo nu tuumanyo hi samian na posaihonnyo.

²⁰Anak aijo' binoamo hi tinanyo, lantas tinangkungmo nu tinanyo na ia. Ohanimo malom anak aijo' sinilakamo.

²¹Tinanyo nomboamo ia nokiita' hi salipi' i Elisa, ka' nompomale' ia i kamale'an. Lapas aijo' ia nosabatmo ka' tinumbannyomo na sabatan,

²²lantas nambamo noki laga langkai'nyo. Ia notatae, “Pokau mae na posaihon samian mamba mae ka' poki boa mae na keledai sa'angu'. Da aku malia-lia' mamba hi Nabi Elisa ka' sampa malia-lia' minsusule'.”

²³“Kadaka' sabole-bole mamba uuka aiya?” na koonyo nu langkai'nyo. “Sinaa aiya misa' sinaa nu Sabat ka' mule' misa' sinaa molame'akon Bitu'on Bu'ou.” “Madi' mongkuka,” na koonyo.

²⁴Salatan pinokonanyomo na kasake'an i keledai aijo', pinoto'inyomo hi posaihonnyo, “Sabole-bole o polia' na kaledai aiya da ia mopadeka'; boli manyeeng de madi' ku poto'i…”

²⁵Sahingga nambamo na boune aijo' i Bungkutnyo nu Karmel kajojoongan i Elisa. Daagi majo'on tinoamo mae i Elisa na boune aijo' mamba mae. I Elisa notataemo hi Gehazi, “Soba toa pontina'on mian nu Sunem aijo' tinokamo mae!

²⁶Lako' lia-lia' singkaboti na ia ka' pokilawa mosia na lele nua ha salaigan.” “Iwi-iwi' ma'ima',” na koonyo nu boune aijo' hi Gehazi.

²⁷Panyo salatan tinokamo i ahop hi Elisa, ia tinolodadupumo ka' nontanggogolimo tengke i Elisa. I Gehazi kahanda' mohela' ia da boli sumo aijo', panyo i Elisa notataemo, “Pojohokmo! Ia aijo' sinusa'mo hondo na kinyonyoanyo. Panyo Tumpu madi' nompoto'i apa-apaa hi belengku!”

²⁸Boune aitu notatae, “Kita Tuuma, aku madi' nompoita anak hi belento Tuuma. Pinoto'ingku hi belento Tuuma da boli la mombee'i mae anu ku taha'imanimo padahan madi' totu'u.”

²⁹I Elisa nosiloimo nokiijo' hi Gehazi lantas notatae “Palia-lia'! Ala mae na tokonku ka' lako'mo mamba hi laigan nu Pontina'on aiya. Boli okolilimi na monsalando'i mian anu nu kabot i jalan maumo pa' ihe. De mian monsalando'i beleyum boli o tanda'i pipin obalosije na salando'anyo. De beleyum tokamo i kiijo', sampa lia-lia' potimpas na tokonku aijo' i butong nu anak aijo'.”

³⁰Boune aijo' notataemo, “Kita Tuumangku Elisa! I uno nu sanggo nu Tumpu anu tuumu' ka' kalana nyawa nu belento Tuumangku, aku madi' mompala'i kita Tuumangku!” Kalana aijo' nambamo na i Elisa hingga-hinggat tiba boune aijo' i laigannyo.

³¹I Gehazi nambamo momona nompotimpas tokon i Elisa hi butong nu anak aijo', panyo madi' pa' tinolo husa kabai ko tanda sangga'at pa' anak aijo' ugaat tumuu'mo. Lantas nambamo na i Gehazi nolalabot i Elisa ka' nompoto'i, “Anak aijo' madi' nobula.”

³²Salatan tinokamo i laigan nu boune aijo' i Elisa ola sausa'nyo na ninsoop nokiita' i salipi'nyo ka' nontoamo bangke' nu anak aijo' male-male' i pinompomale'an.

³³I Elisa nontumbanmo sabatan lantas ia binalado'amo hi Tumpu.

³⁴ Lapas aijo' lako'mo pinatidahapannyo na anak aijo' male-male' ka' pinohampotnyomo, na nga-nga'annyo ka' matanyo ka' limanyo nokiijo' i nga-nga'anyo, ka' matanyo ka' limanyo nu anak aijo'. Kalana binaumo sumo aijo', sahingga butong nu anak aijo' napanasmo.

³⁵I Elisa nobulamo ka' lewa'mo kinolalajang i uno nu salipi' aijo', lapas aijo' po'ule' mule' lako' pinatidahapannyo na butong nu anak aijo' Ahennyo anak aijo' sinamba'inmo pinimpitun ka' nonjilakonmo matanyo.

³⁶I Elisa nonsaimo i Gehazi nolaga tina nu anak aijo', ka' salatan tinanyo nu anak aijo' ninsoopmo, notataemo na i Elisa hi ia, “Aiya na anak nu belento Pontina'on.”

³⁷Tinanyo aijo' tinolodadupumo hi ahop i Elisa, lantas sinabatakonnyomo na anaknyo.

³⁸Daagi' mule' kino sansinaan tinokamo na balaa i songko-songko na lipu' sinusa'mo i anu o kaan. Sahingga i Elisa ninsusule'mo nambamo i Gilgal. Tempo'nyo ia hau-haunyo mompogulu' to nabi-nabi pa' aha sangkuka, ia nonsaimo posaihonnyo nongala kuhon anu daka' ka' mongunjang anu o kaan nu aha.

³⁹Samian na nabi anu aijo' hi aha nosabatmo namba i ale' molio utan, lantas ia nonsahak anu susumo looboian anu tumuu' i kuhat. Tinipunyomo na bua'nyo aijo' manjoo' hondo ka' binoanyomo. Ia madi' nonsumbu' pa' bua' nu apaa na aijo', sinaya-saya'nyomo ka' ingunjangnyomo i kuhon aijo'.

⁴⁰Salatan nasasakmo binagi-bagiakonnyomo hi to nabi-nabi haha aijo'. Panyo sala'je aha mulai mongkaan kanon aijo', aha nolobo'mo hi Elisa, “Kita Tuumangku aiya lasung!” Aha madi'mo nongkaan.

⁴¹Sahingga i Elisa nompokaumo da mongala mae labu sangkiding, lantas kinakambuhannyomo i uno nu kuhon aijo'. Lapas aijo' pinoto'inyomo, “Bagi-bagiakon mule' na anu ingunjangmo aijo'.” Sahingga kaanon aijo' madi'mo nongkuka na kinaan.

⁴²Daagi' mule' kino sinaa sangga'at, samian na mo'ane tinoka lengkat mae i Baal-Salisa. Ia nomboai mae i Elisa gandum anu sala'je pinadak ka' suele roti uwampulu' na batunyo, aijo'mo gandum anu momona pinadak i taun aijo' na binau. I Elisa nonsaimo posaihonnyo da mombagi-bagiakon roti aijo' hi nabi haha aijo',

⁴³panyo posaihonnyo aijo' notatae, “Madi' sukup hi aha sa'atu na mian aiya!” Tinaaman i Elisa, “Bagi-bagiakonmo da nukaano nu aha, kalana pinoto'imo nu Tumpu tukoo-Nyo aha mongkaan ka' salatan moko kaanmo daagi' ko labinyo.”

⁴⁴Posaihonnyo aijo' nombagi-bagiakonmo anu o kaan aijo' hi aha, ka' aha iwi-iwi' nongkaanmo. Salatan noko kaanmo daagi' ko labinyo susumo anu pinoto'imo nu Tumpu.