Read Saluan 2 TOMU-TOMUNDO' 9 Bible Online

2 TOMU-TOMUNDO' 9 - Saluan bible

2 TOMU-TOMUNDO' 9

¹Tempo'nyo aitu i Nabi Elisa nolagamo samian na nabi anu pinogulu'nyomo anu aijo' hi aha nabi sangga'at. “Posadiamo da mambamo i Ramot i da'erah Gilead, ka' boa na boton anu ko isinyo lanya' nu zaitun aiya.

²De beleyum tokamo kiijo' mae, lio na i Yehu anak i Yosafat makumpu i Nimsi. Ende na ia minsoop i sa'angu' na salipi',

³Ka' dudu'akon na lanya' aiya i ubaknyo ka' poto'i 'koonyo nu Tumpu, Ia nohangkatmo beleyum baumo tomundo' nu Israel.' De opoko baumo na aijo' pala'imo na tampat aijo' palia-lia'.”

⁴Nabi anu daagi' Olitau aijo' nambamo i Ramot,

⁵lantas tinokannyo na i Yehu ka' to tale-talenga' sangga'at hau-haunyo basale' i kiijo'. Koonyo nu nabi aijo', “Kita Tuan, aku momboa mae lele toka hi belento Tuan.” Tinaaman i Yehu, “toka hi he?” “Ola toka hi belento Tuan,” Tinaaan nu nabi aijo'.

⁶ Lapas aijo' ua-ua' aha ninsoopmo i laigan ka' nabi aijo' nondudu'akonmo lanya' nu zaitun aijo' hi ubak i Yehu ka' pi pinoto'inyo, “Tumpu Allah nu Israel notatae, 'Aku nohangkakatmo beleyum timbali tomundo' nu israel anu palesayamo hi belengku.

⁷Beleyummo na mompatei to julu-julu nu tuan nu beleyum i Ahab. Tiba jalan anu sumo aiya Aku nohukumo i Izebel anu nompatei to nabi-nabing-Ku ka' to posa-posaihon-Ku sangga'at.

⁸Iwi-iwi' na aha sa'anakan i Ahab ka' makumpunyo tionyo ahi' opatei. Batu-batu to momo'ane anu langkai'mo kabai daagi' olitau Ku pateimo.

⁹Aha sa'anakannyo Ku baumo susumo aku nombau aha sa'anakan i Yerobiam, ka'aha sa'anakan i Baesa, to tomu-tomundo' nu Israel.

¹⁰ I Izebel madi' o lamun. Bangke'nyo nukaan nu dedeng i da'erah Yizreel.’ ” Salatan pinoko taloakonnyomo na iwi-iwi' aijo', nabi anu oli-olitau aijo' nosabatmo ka' nopalaimo.

¹¹I Yehu ninsusule'mo hi to sanga-sangalunyo lantas pinokilawamo nu aha, “Lele apaa? Mian anu ulawon aijo', apaa na anu nu kahanda'i hi belento?” “Ha' sinumbu'mo nu belemiu,” na koonyo i Yehu.

¹²“Madi', kami madi' monsumbu'!” na koonyo nu aha. “Soba poto'i mae!” Tinaaman i Yehu, “Ia nompoto'i potuunon nu Tumpu tukoonyo aku i hangkatmo nu Tumpu binaumo tomundo' nu Israel.”

¹³To sanga-sangalu i Yehu nalia-lia' na nongukat juba nu aha ka' binoka nu aha i ojan hi ahop i Yehu. Lantas pinuhanmo nu aha na tolompet ka' lewa'mo nolobo'akon, “I Yehu na tomundo'!”

¹⁴Sumo aitumo na i Yehu binasangaja'mo ka' nongewa mo i Tomundo' Yoram anu tempo'nyo aitu daagi' kiijo' i Yizreel. I Yoram nokiijo' mae da opakuli'i na belanyo tempo'nyo nahampate kiijo' i Ramot nongewa i Hazael tomundo' nu Siria. I Yehu notataemo hi sangalunyo to tale-talenga' nu suludadunyo, “De belemiu mongka'oho' akumo na timbali tomundo' ojagai da boli ko samian na anu mosabat lengkat i Ramot mamba mompoto'i hi aha mian nu Yizreel.”

¹⁶Lapas aitu ia nonsake'imo karetanyo anu lewa' bau pahampate ka' namba nokiijo' i Yizreel. Tempo'nyo aitu i Yoram ma'isa pe'e na'alin, ka' i Ahazia tomundo' nu Yehuda suele kiijo' mae mamba nontoa ia.

¹⁷Salatan anu monjagai laigan anu tangka-tangkas i kota' Yizreel nontoamo i Yehu ka' mian anu nonsangalui mae tinokamo ia notataemo daka-daka', “Daagi' ko mian da'isan mo'uka mae i aiya!” Tinaaman i Yoram, “Sai na suludadu samian sake'i na ajahan toka toa pa' aha aijo' sangalu kabai sampo bali'.”

¹⁸Suludadu aijo' sinumake'mo i ajahan ka' namba nompahakabot i Yehu ka' notatae, “I Tomundo' ka'oho' monsumbu' pa' kita Tuan toka mae sumo salaku sangalu.” “Aijo' misa' ulusan nu beleyum,” na koonyo i Yehu, “Dongan posangalumo mae tiba aku.” Anu monjagai laigan tangka-tangkas aijo' nontoa suludadu aijo' tinokamo i gombuan nu mian da'isan haha aijo', panyo madi'mo ninsusule' mae. Sahingga pinosumbu'nyomo na han aijo'.

¹⁹Lantas sinai mule' samian na suludadu sangga'at. Suludadu aiya suele nompokilawa hi Yehu, ka' minsan mule' na i Yehu nontaami, “Aijo' misa' ulusan nu beleyum dongan posangalumo mae tiba aku!”

²⁰Anu monjagai laigan tangka-tangkas aijo' po'ule' mule' nompoto'i tukoonyo saba' anu sinai mae aijo' tinokamo hi mian da'isan haha aijo' panyo madi'mo ninsusule' mae. Lantas ia po'ule' mule' notatae, “Kugantang anu mongkapalai mian haha aijo' i Yehu, kalana ia sinumake' i kareta anu bau pahampate sumomo mian anu ingulawonmo.”

²¹“Posadia na karetangku,” na koonyo nu palentah i Tomundo' Yoram. Karetanyo pinosadiamo lantas i Yoram ka' i Tomundo' Ahazia nambamo nonsingkaboti i Yehu, aha sinumake' i posi karetanyo, aha siningkabot tiba i Yehu i ale' anu toho'mo pinongale'an i Nabot.

²²“Pa' Belento toka mae sumo salaku sangalu?” na koonyo i Yoram, hi Yehu. Tinaaman i Yehu, “Misa' sumo sangalu, de i aiya daagi' ko sando manjoo' ka' daagi' ko ponsomban pilogot anu tinampu'unanmo i Izebel tina nu beleyum aijo'?”

²³“Aiya salaku kalakuan ma'idek, Ahazia!” na tinaloakon daka-daka' i Yoram ka' nombalikmo karetanyo lantas nopalaimo.

²⁴I Yehu nompana'akonmo hoso-hoson pana'nyo hi Yoram kinona i tonga'nyo i lampasan nokiijo' i sulenyo. I Yoram notua'mo ka' sinilakamo i uno nu karetanyo.

²⁵ Lantas koonyo i Yehu hi Bidkar anu lewa' monsangalu ia, “Pa' beleyum daagi' monsumbu', tempo'nyo kita nonsake'i ajahan nombatuki i Ahab, tuuma i Yoram? Tempo'nyo aitu pinoto'imo nu Tumpu hi Ahab, 'Ku sumbu' ihe na nompatei i Nabot ka' to ana-anaknyo aijo' nabongi'an mae, ka' Aku balajanji' tionyo suele mohukum beleyum i ale' aiya'.” “Kalana aitu,” na koonyo i Yehu mule' hi anulewa' monsangalui ia aijo', “Lumbu'akon na bangke' i Yoram aijo hi ale' i Nabot da jadimo na hukuman nu Tumpu Allah hi ia.”

²⁷I Ahazia nontoamo apaa na anu jinadimo, sahingga ia nopalaihakonmo karetanyo namba i kota' Bet-Hagan. I Yehu nololoi'mo ia ka'nolobo'akon hi suludadunyo, “Patei suele na ia!” Pinana'mo nu aha na ia ka' binelaonmo na ia i jalan anu mamba mokiijo' i Gur, koko kota' Yibleam. Panyo ia daagi' noko ala nopalai tinoka kiijo' mae i Megido, ka' i kiijo'je na ia sinilaka.

²⁸To mia-mian anu ko pangkat mokalaja hi ia nongalamo bangke'nyo ka' pinosake'mo nu aha i kareta ka' binoa mo nu aha ninsusule' i Yerusalem, lantas i lamunmo nu aha i polamunan to tomu-tomundo' kiijo' i kota' Daud.

²⁹I Ahazia tinimbali tomundo' nu Yehuda salatan i Tomundo Yoram anak i Ahab nompalentahmo Israel sinampulu'mo ka' sa'angu' na taun.

³⁰Tinokamo na i Yehu i Yizreel. Salatan ihongomo i Izebel apaa na anu jinadimo pinoko pianannyomo na ubaknyo ka' nompokonamo celak, lantas nontoamo nokai yong lengkat mae aita' i tolongan nu laigan nu Tomundo'.

³¹Salatan i Yehu ninsoopmo nontulu sabatan daka' nu kota', i Izebel no notataemo daka-daka', “O Zimri, anu lewa' mompatei! Apaa na ka'oho' nu bau i aiya?”

³²I Yehu nontonto'imo nokiita' i tolongan ka' notatae “Ihe na monsangaja'i aku?” Nohongo potatae aijo' ua'aha kabai aha totolu' na mian anu ko pangkatnyo i laigan nu Tomundo' nontoamo nokaiyong.

³³I Yehu notataemo i aha, “Lumbu'akon na ia mokaiyong!” Sahingga i lumbu'akonmo nu aha nai i Izebel nokaiyong lantas ia iligismo nu kareta sahingga baso'nyo tinolopinjitmo no kiijo' i pagan mesen ka' nokiijo i ajahan haha aijo' anu mohela' kareta aijo'.

³⁴Lantas i Yehu nokiijo'mo i laigan nu tomundo' ka' nongkaanmo. Lapas aijo' ia notataemo, “Boune aijo' kinutukanmo. Mau sumo aijo' lamun ahi' na bangke'nyo kalana ia anak boune nu Tomundo'.”

³⁵Panyo salatan to mia-mian nambamo nongala bangke'nyo da olamunmo, tinokan nu aha me ubaknyo ka' buku nu botokonnyo ka' tengkenyo.

³⁶ Salatan han aijo' pinoto'imo i Yehu, notataemo na ia, “Aiya noko poto'imo nu Tumpu, tempo'nyo ia notatae sumo uuka anu pinoto'imo i Elia, posaihonnyo; ‘Bangke' i Izebel nukaan nudedeng i da'erah Yizreel,

³⁷ka' tuuha' nu bangke'nyo aijo' mosungkehetmo susumo anu sala' nu binatang sahingga madi'mo ko samian na monsumbu' pa' bangke' ihe na aiya'.”