Read Saluan 1 TAWARIKH 10 Bible Online

1 TAWARIKH 10 - Saluan bible

1 TAWARIKH 10

¹Mian nu Filistin nahampatemo nongewa mian nu Israel, aha nahampate i bungkutnyo nu Gilboa. Nanjoo' na mian nu Israel anu sinilaka i kiijo', ka' tuha'nyo tibamo i Tomundo' Saul ka' to ana-anaknyo mo'ane nopalaimo.

²Panyo aha i loloi'mo nu mian Filistin ka' aha totolu' na to ana-anak mo'ane i Saul pinateanmo aijo'mo i Yonathan, i Abinadab tiba i Malkisua.

³Aha nahampate anu talalomo sinida aijo'mo hi aha mian anu ko i Saulnyo kiijo', sahingga ia kinonamo nu pana' nu sampo bali' ka' binelaonmo.

⁴Sahingga koonyo i Saul hi samian na olitau anu momboakon toongon bau pimuhuknyo, “Keat na bajak nu beleyum ka' jalo' mae na aku da aku boli nu bia-biangakon nu aha Filistin anu madi' nonsumbu' Tumpu aijo'.” Panyo olitau aijo'madi' mongka'oho' monjalo' i Saul kalana ia mabuhuk hondo. Kalana aitu ingalamo i Saul na posi bajaknyo ka' i hampabakonnyomo na butongnyo nokiijo' i posi bajaknyo sahingga sinilakamo.

⁵Salatan tinoa nu olitau aijo' taalu' sinilakamo, ia suele nohampabakonmo butongnyo nokiijo' i posi bajaknyo sahingga sinilakamo.

⁶Sahingga sinilakamo na i Saul tiba aha totolu' na anaknyo tommo o'ane, jadi tiba jalan anu sumo aijo', ia salaku tomundo' olamo tinoka sumo aijo'.

⁷Salatan i hongomo nu mian Israel anu jinojoong i bangka'nyo nu Yizreel taalu' suludadu nu Israel nopalaimo ka' taalu' i Saul tiba to ana-anaknyo anu toto momo'ane sinilakamo, aha suele nopalaimo, pinala'ianmo nu aha na kota' nu aha haha aijo'. Lantas kota' haha aijo' kinajojoonganmo nu aha mian Filistin.

⁸Dodododopnyo salatan aha mian nu Filistin tinokamo kahanda mompahuhuakon apaa na anu daagi' hi to mia-mian anu sinilakamo, sinahakmo nu aha na i Saul tiba anaknyo anu to momo'ane aha totolu' sinilakamo i bungkutnyo nu Gilboa.

⁹Baju' anu pinusok i Saul nahampate ingukatmo nu aha. Lapas aijo' sinaimo nu aha na mian namba i songko-songko na lipu' nu Filistin mompoto'i lele ma'ima' hi bansa nu aha ka' hi pilogot nu aha.

¹⁰Baju' anu pinusok i Saul nahampate aijo' pino'una'mo i sa'angu' na laigan anu bau bapilogotan nu aha ka' ubaknyo pinokalayo'mo i sa'angu' na laigan Dagon, pilogot nu aha.

¹¹Salatan i hongomo nu mian anu jojoong i kota' Yabes, i da'erah Gilead apaa na anu binaumo nu aha mian Filistin hi Saul,

¹²mian anu toto babaani hondo kiijo' hi aha nambamo nongala bangke' i Saul tiba bangke' nu to ana-anaknyo anu to momo'ane lantas binoamo nu aha i Yabes. I lamunmo nu aha na ia i patu nu sa'angu' na kau' anu daka', lapas aijo' aha binapuasa'mo ingipitun na kinopinnyo.

¹³ I Saul sinilakamo kalana ia madi' tinulu-tulutan hi Tumpu, ka' madi'mo nompajuli palentah nu Tumpu. Ia madi'mo nomoita pokinde' hi Tumpu, panyo ola mule' ahi' nomoita pokinde' hi to santu-santuu' nu mian anu sinilakamo. Kalana aijo' ia i hukummo nu Tumpu ka' binee'mo na pangkatnyo salaku Tomundo' hi Daud anak i Isai.