Read Saluan 1 TAWARIKH 13 Bible Online

1 TAWARIKH 13 - Saluan bible

1 TAWARIKH 13

¹I Tomundo' Daud binasale'mo tiba iwi-iwi' na suludadunyo anu toto tangka-tangkas na pangkatnyo, anu mongkapalai gombuan nu suludadu anu aha 1.000 na mian ka' anu aha 100 na mian.

²Lantas pinoto'inyomo hi aha mian iwi-iwi' haha aijo', “De to utu-utus mongka'oho' ka' mule' nu talima nu Tumpu, Tumpu Allah-nto da kita monsaimo mian mamba hi to ima-imam ka' hi to mia-mian Lewi i kampu-kampung nu aha ka' hi iwi-iwi' na bansanto sangga'at mompoto'i da aha toka mae sihuk tiba kita i aiya.

³Lantas mambamo o'alanto na Peti' Palajanjian nu Tumpu Allah, anu madi'mo kinalesang tempo'nyo i Tomundo' Saul nompalentah.”

⁴Iwi-iwi' na mian nu Israel anu sihihukmo i aijo' sanang na kinyonyoa nu aha ka' sinitujumo hi anu pinoto'imo i Tomundo' Daud aijo'.

⁵ Jadi pinosihukmo i Daud na mian da'isan nu aha Israel songko-songko na lipu', lengkat pe'e mae i potempasan tiba Mesir sasu salatan toka-toka i jalan mamba i Hamat sasu utara, da mambamo mongala Peti' Palajanjian aijo' i Kiryat-Yearim ka' oboamo mae i Yerusalem.

⁶ Lantas i Daud nambamo tiba aha i kota' Baala, aijo'mo Kiryat-Yearim, i da'erah tulunan nu bansa Yehuda mongala Peti' Palajanjian nu Tumpu Allah. Peti' aijo' sinanggohanmo “Tumpu sumuhang aita' i malaikatnyo.”

⁷Salatan tinokamo i Baala, ingalamo nu aha na Peti' Palajanjian aijo' hi laigan i Abinadab, lantas pinosake'mo nu aha i loda anu daagi' bu'ou. I Uza ka' i Ahyo na montuntuni loda aijo'.

⁸Lantas i Daud ka' iwi-iwi' na bansa Israel lewa'mo nonsalelei ka' lewa'mo nonyanyi lame-lame' hondo bau pompodaka' Tumpu Allah ka' lewa'mo nongkuti' kasapi', nohapa'i labana, simbal, ka' lewa'mo nompuuhi tolompet.

⁹Salatan aha tinokamo i pongututan gandum anu i Kidon, sapi' haha aijo' anu nohela' loda tinosumpunmo, sahingga i Uza nontoongimo Peti' Palajanjian aijo' da boli manabu'

¹⁰Panyo baloomo tinambuha'an nu Tumpu na i Uza, kalana apaa na anu binaunyomo aijo' sumomo ia nongambangimo Tumpu. Lantas i Uza pinatean-Nyomo i kiijo', sahingga mulai tempo' aitu tampat aijo' sinanggohanmo “Peres-Uza”. I Daud pinusamo kalana Tumpu nompateimo i Uza.

¹²Panyo i Daud mabuhuk ahi' hi Tumpu Allah sahingga ia notataemo “Uuka aiya mosiamo da Peti' Palajanjian aijo' timbali ku poko ala ku boa?”

¹³Kalana aijo' i Daud madi'mo noko ala nomboa Peti' aijo' namba i Yerusalem, panyo pino'una'nyomo hi laigan i Obed-Edom, mian nu Gad.

¹⁴ Peti' aijo' pinojoong i kiijo' tinotolu' na bitu'on na kinopinnyo, sahingga binalakatanmo nu Tumpu na i Obed-Edom ka' iwi-iwi' na anu daagi' hi ia.