Read Saluan 1 TAWARIKH 14 Bible Online

1 TAWARIKH 14 - Saluan bible

1 TAWARIKH 14

¹I Tomundo' Hiram anu i lipu' Tirus nonsaimo mae mian hi Daud ka' mule' nomboamo kau' lontio' nu Libanon ka' to tuka-tukang kau' ka' to tuka-tukang batu, nombau laigan nu tomundo'.

²Kalana aijo' ingoa'anmo i Daud, taalu' totu-totu'umo ahi' na ia ingakuanmo nu Tumpu salaku tomundo' nu aha Israel ka' nompohosonmo kalaja'annyo bau kapentingan nu mian anu pinalesayamo hi Tumpu.

³I Yerusalem, i Daud nongosoaimo mule' tino pia-piangkuka na boune, ka' nohumpak mule' anak.

⁴To ana-anak mo'ane anu i hampe i Yerusalem aijo'mo: i Syamua, i Sobab, i Natan, i Salomo,

⁵i Yibhar, i Elisua, i Elpelet,

⁶i Nogah, i Nefeg, i Yafia,

⁷i Elisama, i Beeyada tiba i Elifelet.

⁸Salatan i hongomo nu mian Filistin na i Daud i hangkatmo binau tomundo' nu aha Israel iwi-iwi', aha tinokamo kahanda' mohakop ia. Kalana aijo' i Daud nambamo nahampate nongewa aha.

⁹Hau-haunyo suele mian nu Filistin tinokamo i bangka'nyo nu Refaim ka' lewa'mo nompahantomangakon anu kiijo' i bangka'nyo.

¹⁰Nohongo lele nu aha aijo', pinokilawamo i Daud hi Tumpu Allah, “O Tumpu pa' ku tumbuhimo na mian Filistin haha aijo'? Pa' obee'i mae na aku ka'untungan de mahampate, Tumpu?” Tinaaman nu Tumpu, “Ii', tumbuhimo!” “Ku bee'imo ka'untungan na beleyum!”

¹¹Sahingga i Daud tiba suludadunyo nontumbuhimo mian nu Filistin haha aijo' i Baal-Perasim ka' nompatundu'mo aha. I Daud notataemo, “Tumpu Allah nompakemo aku da mongidei benteng nu sampo bali' susumo iyaba' maumo madi' pinin panyo nohobo'akonmo ka' monganjuhakonmo apa-apaa.” Mokonyo aijo' tampat aijo' sinanggohanmo Baal-Perasim.

¹²Salatan suludadu nu aha Filistin nopalaimo, aha madi'mo kinokasampatan nomboa to patong-patong nu aha. Pinalentahmo i Daud da patong haha aijo' opapui iwi-iwi'.

¹³Madi' pinin mian nu Filistin tinokamo mule' nontomang i Bangka'nyo nu Refaim.

¹⁴Po'ule' mule' i Daud nomoita pokinde' hi Tumpu Allah, lantas tinaaman nu Tumpu Allah, “Boli montumbuhi aha lengkat i aiya, panyo mamba bangkualilit mae ka' tumbuhimo na aha lengkat mae aijo' i santoanyo, koko kau' murbei haha aijo'.

¹⁵De beleyum mohongo onyi' susumo galupak nu mian mobalis i tuu' nu kau' haha aijo', pokiijo'imo na aha kalana Aku mambamo momona atina' i ahop nu belemiu ka' mompatundu'mo suludadu nu aha Filistin.”

¹⁶Apaa na anu pinalentahkonmo nu Tumpu Allah hi ia binaunyomo. Ia ka' suludadunyo nompototumputimo suludadu nu aha Filistin lengkat pe'e i Gibeon tinoka-toka i Gezer.

¹⁷Sahingga tinalasanggomo na sanggo i Daud iyaya mae, ka' binaumo nu Tumpu da iwi-iwi' na bansa nongkabuhukmo i Daud.