Read Saluan 1 TAWARIKH 15 Bible Online

1 TAWARIKH 15 - Saluan bible

1 TAWARIKH 15

¹I Daud nombaumo laigan tino pia-piangkuka i kota' Daud bau kajojoongannyo, ka' nomposadiamo tampat pompo'una'an Peti' Palajanjian nu Tumpu Allah, lantas nombaumo kemah pompo'una'an Peti' aijo'.

² I Daud notatae “Ola mian nu Lewi na timbali mohangkat Peti' Palajanjian nu Tumpu, kalana ahamo na anu pinile'an nu Tumpu monsimbu Peti' aijo' ka' mongkalesang sampe toka sidu-sidutu'.”

³Sahingga i lagamo i Daud iwi-iwi' na mian nu Israel da toka mae i Yerusalem molalin Peti' Palajanjian nu Tumpu oboa i tampat anu pinosadianyomo.

⁴Lantas i Daud nompalentahmo lee' mae i Harun ka' mian nu Lewi da sihuk,

⁵sahingga aha sa'anakan i Kehat, tulunan nu bansa Lewi, tinokamo mae na i uriel anu mongkapalai aha 120 na mian aha mae sa'anakan.

⁶Aha mae sa'anakan i Merari, tinokamo mae na i Asaya anu mongkapalai aha 220 na mian.

⁷Aha sa'anakan mae i Gerson tinokamo mae na i Yo'el anu mongkapalai aha 130 na mian.

⁸Aha sa'anakan mae i Elsafan tinokamo mae na i Senaya anu mongkapalai aha 200 na mian.

⁹Aha sa'anakan mae i Hebron tinokamo mae na i Eliel anu mongkapalai aha 80 na mian.

¹⁰Aha sa'anakan mae i Uziel tinokamo mae na i Aminadab anu mongkapalai aha 112 na mian.

¹¹Lantas i lagamo i Daud na i Imam Zadok tiba i Imam Abyatar tiba aha anom na mian nu Lewi haha aijo' aitumo: i Uriel, i Asaya, i Yo'el, i Semaya, i Eliel tiba i Aminadab.

¹²Koonyo i Daud hi aha, “Belemiu to kapa-kapala nu sa'anakan mae hi tulunan nu bansa Lewi. Kalana aijo' tionyo ahi' belemiu ka' to mia-mian nu aha Lewi sangga'at momposusi' butong nu belemiu da timbali molalin Peti' Palajanjian nu Tumpu, Tumpu Allah nu aha Israel, oboa i tampat anu pinosadiangkumo.

¹³Tempo'nyo Peti' aijo' palatamanyo i lalin, belemiu madi' ko anu i kiijo' da nomboa. Kalana aijo' Tumpu Allah-nto nohukummo kita kalana monsombah ia panyo madi' mombatuki pongka'oho'nyo.”

¹⁴Jadi to ima-imam ka' mian nu Lewi nomposusi'mo butong nu aha da timbali molalin Peti' Palajanjian nu Tumpu, Tumpu Allah nu Israel.

¹⁵ Ka' salatan Peti' aijo' i lalinmo, i hangkatmo nu aha ka' sinimbumo nu aha i kau' anu pinotoukamo susumo koonyo nu atulan anu binee'mo nu Tumpu hi Musa.

¹⁶I Daud suele nompokaumo to kapa-kapalanyo, aha to mia-mian nu Lewi haha aijo' da montiju' to pia-piangkuka na mian anu aijo' hi tulunan nu bansa mae nu aha da manyanyi ka' mongkuti' kasapi ka' simbal anu eloknyo mompolame' hondo.

¹⁷Aha auwan-auwan anu lewa' manyanyi pinile'anmo nu aha na to mia-mian haha aiya anu mompahaikakon simbal tambaga: i Heman anak i Yo'el tibamo to utu-utusnyo, sanggo nu aha i Asaf anak i Berekya tiba i Etan anak i Kusaya aha mae sa'anakan i Merari. Anu monyanyiakon aha mongkuti' kasapi ka' manyo'a hondo na monyanyiakon, pinile'anmo na to mia-mian nu Lewi, haha aiya: i Zakharia, i Yaaziel, i Semiramot, i Yehiel, i Uni, i Eliab, i Maaseya tiba i Benaya. Anu mongkuti' kasapi onyi'nyo madi' manyo'a pinile'anmo na to mia-mian nu Lewi haha aiya: i Matica, i Elifele, i Mikneye, i Azazya, tiba ua'aha ana anu monjagai Laigan nu Tumpu, aijo'mo i Obed-Edom tiba i Yeiel.

²²I Kenanya pinile'anmo da mongkapalai anu mahaik musik aha mae tulunan nu bansa Lewi haha aijo', kalana ia pande hondo mahaik musik.

²³I Berekya tiba i Elkana tiba mule' i Obed-Edom tiba i Yehia pinile'anmo da bau ponjagai Peti' Palajanjian nu Tumpu. To ima-imam: i Sebanya, i Yosafat, i Netaneel, i Amasia, i Zakharia, i Benaya tiba i Eliezer pinile'anmo mompuhi tolompet i ahop nu Peti' aijo'.

²⁵Sahingga nambamo na i Tomundo' Daud tiba aha to pola-polaya' nu Israel, ka' to sulu-suludadu anu toto tangka-tangkas na pangkatnyo hi laigan i Obed-Edom mongala Peti' Palajanjian aijo', dinaka' hondo na nolame'akon.

²⁶Popitu' na sapi' lakinyo ka' popitu' na domba sinombahkon hi Tumpu Allah kalana ia nontulungimo mian nu Lewi anu nonsimbumo Peti' Palajanjian aijo'.

²⁷Tempo'nyo aitu i Daud nompusok jubah hude Lenan anu ma'ima' hondo na kina'ut, sumo aitu mule' an aha anu mahaik musik ka' i Kenanya kapala nu aha ka' aha to mia-mian nu Lewi anu nonsimbu Peti' Palajanjian aijo'. I Daud suele nompusok baju' efod.

²⁸Iwi-iwi' na mian nu Israel namba nontuntuni Peti' Palajanjian aijo' tinoka-toka i Yerusalem ka' lewa' nontaligalai lame-lame', onyi' nu tolompet, napiri, simbal ka' kasapi'.

²⁹Salatan Peti' aijo' hau-haunyomo ninsoopmo nokiijo' i kota' i Mikhal anak langkoyang i Saul nonsiligimo aijo' mae i tolongan ka' nontoamo i Tomundo' Daud lewa' monsalelei ka' talalomo hondo i lame'. Sahingga i Mikhal nompai to uw'amo na nontoa i Daud.