Read Saluan 1 TAWARIKH 16 Bible Online

1 TAWARIKH 16 - Saluan bible

1 TAWARIKH 16

¹Peti' Palajanjian aijo' pino'una'mo i uno nu kemah anu pinosadiamo i Daud na tampat nu Peti' aijo'. Lantas aha nonsombahkonmo hi Tumpu Allah koloban anu opotunu ka' koloban pompodame.

²Noko lapas na i Daud nonsombahkon koloban haha aijo', ia nombalakatimo mian da'isan, i uno nu sanggo nu Tumpu,

³lantas binagi-baginyomo na anu o kaan hi aha iwi-iwi'. Toto samian na anu i kiijo' maumo mo'ane kabai maumo boune nohumpak sampadot na ponoha' anu tinunuan, roti ka' kukis kismis.

⁴I Daud nohangkatmo tino pia-piangkuka na mian nu aha Lewi anu mongatun mosia na monsombah Tumpu, Tumpu Allah nu Israel, i ahop nu Peti' Palajanjian aijo', ka' monyanyiakon ka' mompuji-puji'.

⁵I Asaf pinile'anmo salaku kapalanyo ka' i Zakharia na wakinnyo. I Yeiel, i Semiramot, i Yehiel, i Matica, i Eliab, i Benaya, i Obed-Edom tiba i Yeiel, kalajanyo nu aha mongkuti' kasapi, i Asaf kalajanyo mompopahaik simbal,

⁶ka' ua'aha na imam, aijo'mo i Benaya tiba i Yahaziel, kalajanyo nu aha saja' mompuhi tolompet i ahop nu Peti' Palajanjian aijo'.

⁷Aijo'mo na momonanyo i Daud nombee'imo kalaja i Asaf ka' to sanga-sangalunyo manyanyi bau pompuji-puji' Tumpu.

⁸Montalimah kase hi Tumpu, bebakon na katalasanggoan-Nyo, osisikakon apaa na anu binau-Nyomo hi to bansa-bansa.

⁹Onyanyiakon na bau pompuji' Tumpu, obebakon iwi-iwi' apaa na anu binau-Nyomo anu okabangangi.

¹⁰Olamo Ia na Tumpu Anu Sa'a-sa'angu'nyomo; balame-lame', kalana kita Ia na tumpunyo; iwi-iwi' na anu monsombah Ia tionyo ahi' lame'.

¹¹Opoita na kahosonan lengkat mae hi Ia, ka' saja' osombah na Ia.

¹²O lee' i Yakub posaihon nu Tumpu Allah! O lee' nu aha Israel, mian anu pinile'an-Nyomo! Boli okolilimi iwi-iwi' apaa na anu okabangangi anu binaunyomo, boli okolilimi iwi-iwi' apaa na anu tinantukan-Nyomo.

¹⁴Tumpu aijo'mo na Tumpu Allah-nto, apaa na anu tinantukan-Nyomo saja' oganapi i songko-songko na dunia.

¹⁵Saja' nu inau' na palajanjian-Nyo, anu jinanji'-Nyomo saja' oganapi sampe toka sidu-sidutu'.

¹⁶ Palajanjian aijo' binau-Nyomo tiba i Abraham ka' lapas mae tibamo i Ishak.

¹⁷ Lantas pinohosonmo hi Yakub binaumo palajanjian anu sampe toka sidu-sidutu' kona hi mian Israel.

¹⁸Ia notatae tukoonyo, “Tano' nu Kana'an, Ku bee'mo hi belemiu da baumo pusaka' nu belemiu.”

¹⁹U'utu mae mian anu pinalesayamo hi Tumpu tinumuu'mo kiijo' mae salaku mian anu lengkat mae i salipu'an, aha madi' manjoo' ola sangkiding.

²⁰Aha namba lewa' nolali-lalin lengkat i bansa namba i bansa sangga'at, nolalin lengkat i lipu' sa'angu' namba i lipu' sangga'at.

²¹ Panyo Tumpu madi' mompojohok maumo pa' ihe na anu mongkabisa'i aha; kalana monginau' aha, to tomu-tomundo' pinokinde'an-Nyomo,

²²“Boli lewa' mompoposia to mia-mian anu pinile'an-Kumo, boli mombau anu ma'idek hi to nabi-nabing-Ku.”

²³O sombahkon na nyanyian hi Tumpu, o dunia songko-songko sansina-sinaa bebakon na lele anu mompolame' saba' Ia nomposalamatmo kita.

²⁴Sisikakon na katalasanggoan-Nyo hi to bansa-bansa, ka' iwi-iwi' na anu binau-Nyomo anu baani hondo hi manusia.

²⁵Kalana Tumpu daka' na kuasa-Nyo ka' talalo hondo o puji'; Ia tionyo ahi' okabuhuk hondo sahanyo pilogot na boli okabuhuk.

²⁶To pilo-pilogot nu bansa sangga'at ola patong na bau bapilogotan panyo Tumpu aijo'mo na anu nompotimbali langa.

²⁷Katalasanggoan ka' kadaka'an saja' daagi' hi Ia, laigan-Nyo nobuke'mo nu kuasa ka' kalame'an.

²⁸O puji' na Tumpu o manusia! O puji' na katalasanggoan-Nyo ka' kahosonan-Nyo.

²⁹O puji' na sanggo-Nyo anu talasanggo ka' oboa na koloban i uno nu laigan-Nyo. Osombah na Tumpu, ka' opusok ahi' na baju' anu opusok de monsombahmo.

³⁰Langkakatan i ahop-Nyo, o dunia songko-songko! Tano' mahoson madi' opoko ala ogegut.

³¹O Langit ka' tano', balame-lame'mo! Bebakon hi to bansa-bansa poto'i Tumpu aijo' Tomundo'!

³²Pombuhokmo o'ambai ka' iwi-iwi' anu i unonyo! Balame-lame'mo o padang ka' iwi-iwi' anu tinumuu' i kiijo'!

³³Iwi-iwi' na kau' i uno nu alas montaligalaimo kalana Tumpu tinokamo nompalentah tano'.

³⁴ Montalima kase hi Tumpu, kalana Ia manonong; kalibosan-Nyo sampe toka sidu-sidutu'.

³⁵Taloakon mae “O Tumpu Allah, anu momposalamat kami, posalamatakon mae na kami da bolimo nu kuasai nu to bansa-bansa, ka' po'ule'mo posihuk na kami da kami timbali montalima kase ka' mompuji' sanggo nu belento anu susi'!”

³⁶O Puji' na Tumpu, Tumpu Allah nu Israel, uuka aiya ka' sampe toka sidu-sidutu'! Lapas aijo' iwi-iwi' na mian nu Israel notataemo, “Amin”, lantas aha nompuji'mo Tumpu.

³⁷Lapas aijo' i Tomundo' Daud nombee'imo i Asaf kalaja ka' to mian-mian sangaa'at aha Lewi anu saja' mongulus de monsombahmo i tampat pompo'una'an Peti' Palajanjian nu Tumpu. Sansina-sinaa aha tionyo ahi' mokalaja i kiijo',

³⁸anu montulungi i Obed-Edom anak i Yedutun tiba aha 68 na mian sangga'at anu bubuu' mae aha sa'anakan tiba ia. I Obed-Edom ka' i Hosa, aijo'mo na ponjaga sabatan toto daka-daka' haha aijo'.

³⁹Panyo i Zadok tiba to ima-imam sangga'at binee'an kalaja anu saja' mongulus de monsombahmo i tampat ponsomban Tumpu anu kiijo' i Gibeon.

⁴⁰De subu-subu ka' mamalomo aha tionyo ahi' monsombahkonmo koloban anu opotunu i mezbah susumo koonyo nu atulan anu binee'mo nu Tumpu hi mian nu Israel.

⁴¹I Imam Zadok tiba imam haha aijo' nu tulungi i Heman tiba i Yedutun tiba to mia-mian sangga'at anu pinile'anmo samata-mata manyanyi anu bau pompuji' Tumpu kalana kalibosan-Nyo anu sampe toka sidu-sidutu'.

⁴²I Heman tiba i Yedutun suele kalajanyo mompuhi tolompet, simbal ka' pakakas nu musik sangga'at anu opuhi de manyanyimo nyanyian bau pompuji'. To mia-mian aha mae sa'anakan i Yedutun binee'an kalaja bau ponjaga sabatan toto daka-daka' haha aijo'.

⁴³ Lapas aijo' mian iwi-iwi' ninsusule'mo i laigannyo toto samian. Sumo aitumo suele na i Daud ninsusule'mo namba nontoa auwannyo.