Read Saluan 1 TAWARIKH 17 Bible Online

1 TAWARIKH 17 - Saluan bible

1 TAWARIKH 17

¹Salatan i Tomundo' Daud tinataapmo i laigannyo nu tomundo', daagi' kino sansinaan i laganyomo na i Nabi Natan ka' notatae, “Toa, aku aiya jojoong i laigan nu tomundo', anu kau' lontio' nu Libanon na binau, padahan Peti' Palajanjian nu Tumpu ola i uno nu kemah!”

²Tinaaman i Natan “Baumo iwi-iwi' na kahanda' i Tomundo' kalana Tumpu Allah montulungi belento Tomundo'.”

³Panyo pihi-pihi aitu Tumpu Allah nompoto'imo hi Natan,

⁴“Lako'mo ka' poto'i hi posaihon-Ku i Daud na potunon-Ku aiya, ‘Misa' beleyum na mompotinjo laigan anu obee' hi beleng-Ku.

⁵Salatanmo pe'e bansa Israel pinobebas-Kumo da bolimo nu sansala nu bansa Mesir sampe uuka aiya, ma'isa toho' Aku jinojoong i uno nu sa'angu' na laigan. Saja' Aku mamba moyaya ka' jojoong i sa'angu' na kemah.

⁶Sumo uukamo na kinopinnyo na Aku mamba moyaya tiba bansa Israel ma'isa toho' pinokilawang-Ku hi to pola-polaya' anu pinile'an-Kumo, apaa na sababnyo aha madi' mombaui sa'angu' na laigan anu kau' lontio' nu Libanon na obau.’

⁷Kalana aitu, Natan, poto'iyakon hi posaihon-Ku i Daud, tukoong ku, Tumpu anu Daka' na kuasanyo mompoto'i hi ia, ‘Beleyum anu mokalaja molaya' domba i padang ingalang-Kumo ka' pinotimbaling-Kumo tomundo' nu mian Israel anu pinalesayamo hi belengku.

⁸Aku nontulungimo beleyum maumo pa' moya na beleyum mamba, ka' iwi-iwi' na sampo bali' nu beleyum Ku pateimo de beleyum mahampatemo. Beleyum Ku potimbalimo da talasanggo susumo to pola-polaya' anu talasanggo i dunia.

⁹Hi mian nu Israel anu pinalesayamo hi beleng-Ku pinotoukang-Kumo na tampat da bau kajojoongan nu aha da aha tumuu' madi' ko anu daagi' mompoposia. Salatanmo pe'e aha tinoka i tano' aiya naipuan mae, ka' ma'isa pe'e aha kino tomundo'nyo aha tinumbuhanmo nu to mia-mian anu pagalamo mompakisa mongkuasai. Panyo han aijo' madi'mo po'ule' jadi. Aku balajanji' mompotundu'mo iwi-iwi' na sampo bali' nu belemiu ka' Ku balakatimo na belemiu da molee'.

¹¹Saidi' mae de tokamo na ajan nu beleyum ka' beleyum olamunmo i polamunan nu mompolee' nu belemiu samian na anak nu beleyum momo'ane Ku hangkatmo timbali tomundo' iamo na mompotinjo laigan kajojoongan-Ku. Kalaja'annyo Ku pohosonmo ka' sampe toka sidu-sidutu' samian anu lengkat mae hi lee'nyo na mompalentahje salaku tomundo'.

¹³ Aku na timbali tuumanyo ka' ia timbalimo anak-Ku momo'ane. Aku saja' mombau anu ma'ima' hi ia susumo anu jinanji'-Kumo. Anu jinanji'-Kumo sabole-bole Ku toongi, madi' susumo anu binaung-Kumo hi Saul anu madi'mo bine'an-Ku pangkat, da beleyum na timbali tomundo'.

¹⁴Anak nu beleyum anu momo'ane anu pinile'an-Kumo aijo' Ku potimbalimo tomundo' hi aha mian anu pinalesayamo hi beleng-Ku, ka' kalaja'an-Ku sampe toka sidu-sidutu' ka' anak makumpunyo molapi-lapis na lee'nyo na mompalentah salaku tomundo'.’ ”

¹⁵I Natan nompoto'imo hi Daud iwi-iwi' apaa na anu pinoto'imo nu Tumpu Allah hi ia.

¹⁶Lantas ninsoopmo na i Daud i Kemah nu Tumpu. Ia sinumuhangmo ka' binalado'a, “O Tumpu Allah, aku ka' auwanku madi' pantas mohumpak iwi-iwi' na ka'ima'an anu pinotoamo nu Belento hi belengku sumo uukamo na kinopinnyo.

¹⁷Aitu pe'e manjoo'mo na anu lebe ma'ima' binau nu Belento; belento nonjanji'mo mosia saidi' mae na katimbaliannyo na lee'ku. Ka' mule' belento mompotimbalimo salaku mian daka' na pangkatnyo.

¹⁸Daagi' apaa na anu ku taloakon hi belento, O Tumpu Allah? Belento monsumbu' iwi-iwi' ka'ada'an nu posaihon nu Belento aiya, panyo belento mongadati mae aku.

¹⁹Posi pongka'oho' nu Belento ka' na anu bau kapentinganku, nombaumo na belento iwi-iwi' na han anu daka' aiya madi' pinohowini.

²⁰Ola belento na Tumpu Allah, madi' ko anu pokakana tiba belento. Osumbu' mami na han aijo' kalana pinoto'imo salatan naipuan mae.

²¹I dunia songko-songko madi' ko bansa anu sumo Israel. Ola sa'a-sa'angu'nyomo bansa Israel, na anu pinobebasmo nu Belento tempo'nyo aha binotuanan da timbalimo mian anu palesayamo hi belento. Iwi-iwi' na anu talasanggo ka' anu okabangangi, anu binaumo nu Belento hi aha nompotimbalimo sanggo nu Belento tinogilele i songko-songko na dunia. Belento nompobebasmo mian anu pinalesayamo hi belento lengkat mae i Mesir, ka' nongalinimo to bansa-bansa sangga'at tempo'nyo mian anu pinalesayamo hi belento nambamo nahampate.

²²Bansa Israel pinotimbalimo nu Belento mian anu pinalesayamo hi belento sampe toka sidu-sidutu'. Ka' belento O Tumpu tinimbalimo Tumpu Allah nu aha.

²³Uuka aiya o Tumpu Allah, de timbali pohosonakonmo mae na pala janjian sampe toka sidu-sidutu' anu mongkona butongku ka' lee'ku anu tinaloakonmo nu Belento. De timbali baumo apaa na anu jinanji'mo nu Belento aijo'.

²⁴Iyaya mae na mian saja' mompopodaka' sanggo nu Belento, ka' motatae, ‘Tumpu anu Daka' na kuasanyo aijo'mo na Tumpu Allah nu Israel.’ Sampe toka sidu-sidutu' samian na lee'ku na mompalentah salaku tomundo'.

²⁵Aku baani na balado'a hi belento, o Tumpu Allah, kalana posi belento na nompoto'imo hi belengku, tukoonto makumpungku ka' lee' nu aha saja' opotimbali nu Belento tomundo' hi bansa Israel.

²⁶Belento, Tumpu, aijo'mo na Tumpu Allah, ka' han anu ma'ima' aijo' jinanji'mo nu Belento hi belengku.

²⁷Kalana aijo' kukakase, de tibali balakatiakonmo mae na lee'ku da sampe toka sidu-sidutu' aha saja' mongoa'i kalibosan nu Belento. Kalana belento nombalakatimo mian anu pinalesayamo hi belento, o Tumpu sahingga aha saja' obalakati sampe toka sidu-sidutu'.”