Read Saluan 1 TAWARIKH 18 Bible Online

1 TAWARIKH 18 - Saluan bible

1 TAWARIKH 18

¹Madi' pinin lapas aijo' i Tomundo' Daud nontumbuhimo ka' nompatundu'mo mian nu Filistin ka' nongalamo kota' Gad tiba to kampu-kampungnyo.

²Ka' mule' i Daud nompatundu'mo mian nu Moab sahingga tinundu'mo na aha ka' nombayanmo hasin hi ia.

³Lapas aijo' i Daud nompatundu'mo i Hadadezer, tomundo' nu Zoba koko da'erah hamat i lipu' Siria. Tempo'nyo aitu i Hadadezer hau-haunyo mambamo mongkuasai da'erah koko matannyo nu Kaunyo Efrat.

⁴I Daud nompahuhuakonmo 1.000 na kareta bau pahampate, ka' nohakopmo 7.000 na suludadu anu nonsake'i ajahan tiba 20.000 na suludadu anu lumajang tengke. Pinaha pengko'annyo na ajahan iwi-iwi', me sambagian; 100 na kareta anu bau pahampate.

⁵Mian nu Siria lengkat mae i Damsyik nonsaimo mae suludadu da montulungi i Hadadezer, panyo i Daud nompatundu'mo aha ka' nompateimo 22.000 na mian.

⁶Lapas aijo' ia nompotinjomo kemah bau kajojoongan nu suludadu i da'erah nu aha, ka' aha tinundu'mo ka' nombayanmo hasin hi ia. Iyaya mae na i Daud mahampate saja' nupo'untung nu Tumpu.

⁷To kanta-kanta anu mosoni' na binau anu nu pake nu suludadu i Hadadezer pinahuhuakonmo i Daud ka' binoanyomo i Yerusalem.

⁸ Ka' mule' i Daud nongalamo manjoo' hondo na tambaga' lengkat mae i Tibhat ka' i Kun, to kota-kota' anu naipuan mae kinuasanmo i Hadadezer. (I mihinyo mae tambaga haha aijo' pinoki tutukmo i Salomo binau kuhon, ka' ohi' ka' pakakas anu opake de monsombahmo Tumpu i Laigan nu Tumpu).

⁹I Tomundo' Tou lengkat mae i Hamat nohongomo i Daud nompatundu'mo iwi-iwi' na suludadu i Hadadezer.

¹⁰Sahingga ia nonsaimo anaknyo momo'ane mamba mompotoka salando'nyo hi Tomundo' Daud ka' nompoto'i higahiakon kalana ia inguntungmo na nahampate aijo', kalana i Hadadezer toho'mo nahampate nongewa i tomundo' Tou. I Yoram tinokamo hi Daud nomboa manjoo' hondo na mosoni', salaka, bau palasen.

¹¹Iwi-iwi' na palasen aijo' sinombahkon i Daud hi Tumpu da ogunakon de monsombahmo Tumpu. Susumo aitu suele na ia nombau pakakas mosoni' ka' salaka anu pinahuhuakonnyo mae hi Hadadezer ka' to bansa-bansa anu pinatundu'nyomo, aijo'mo bansa Edom, Moab, Amon, Filistin ka' Amalekh.

¹² I Abisai (sanggo nu tinanyo i Zeruya) nompatundu'mo ka' nompateimo 18.000 na mian nu Edom i Bangka'nyo nu Asin.

¹³Lantas nompotinjomo kemah kajojoongan nu suludadu i songko-songko na Edom. Sahingga tinundu'mo na to mia-mian nu Edom hi Tomundo' Daud. Tumpu nompo'untungmo i Daud nahampate iyaya mae.

¹⁴Sumo aijo' na i Daud nompalentah songko-songko na Israel ka' nonjagai da mian da'isan saja' opalentah adin ka' ma'ima'.

¹⁵Aiya na to mia-mian anu toto tangka-tangkas na pangkatnyo anu i hangkatmo i Daud: Talenga' nu suludadu: i Yoab utus tu'a i Abisai. Gulu tulis i laigan nu tomundo': i Yosafat anak i Ahilud. To Ima-imam: i Zadok anak i Ahitub ka' i Ahimelekh anak i Abyatar. Gulutulis nu Negara: i Sausa. Kapala anu monjagai i tomundo': i Benaya anak i Yoyada. To ana-anak mo'ane i Daud montoongi pangkat anu penting i uno nu kapalentahannyo.