Read Saluan 1 TAWARIKH 19 Bible Online

1 TAWARIKH 19 - Saluan bible

1 TAWARIKH 19

¹Madi' pinin ilapas na aijo' i Nahas tomundo' nu aha Amon sinilakamo lantas i Hanun anaknyo momo'ane tinimbalimo tomundo'.

²Lantas pinoto'imo i Tomundo' Daud, “I Nahas bela'ku anu mompaha hongo-hongo hondo, jadi aku sumo aitu mule' na montoa i Hanun anaknyo.” Kalana aijo' i Daud nonsaimo mian namba i lipu' Amon da mongindeke' ia kalana tuumanyo sinilakamo. Salatan aha tinokamo i Amon,

³to pola-polaya' nu lipu' aijo' nompoto'imo hi Tomundo' Hanun, “Boli belento Tomundo' bapikin i Daud nonsai mae miannyo aijo' kalana ia kahanda' mongadati tuuma nu Belento Tomundo'! Ia nonsai mae mian haha aijo' ola da mamba mae mondoyoni ka' nu selidiki nu aha na lipu'to da timbali nu poko ala nu patundu' nu aha!”

⁴I Tomundo' Hanun nohakopmo posaihon mae i Daud haha aijo', jangkut nu aha kinisnyomo ka' ki longannyomo na baju' nu aha pinokodo'mo me tinoka i lampeokan, ka' sinainyomo na aha ninsusule'.

⁵Panyo aha na ambangmo na ninsusule', sahingga aha nambamo i Yerikho. Salatan han aijo' pinoto'imo hi Daud pinotuunnyomo da mian anu sinai haha aijo' jojoong pe'e i Yerikho sampe jangkut nu aha po ule'mo tumuu'.

⁶Lantas i Tomundo' Hanun ka' mian nu Amon sininsumbu'mo taalu' apaa na anu binaumo nu aha monsaduakonmo i Daud da mongka'idekimo aha. Kalana aijo' aha nompakatumo 34.000 kilogram na salaka binoa i da'erah Mesopotamia Atas, ka' i Maakha ka' i Zoba anu kiijo' mae i Siria da bau pontamboi 32.000 na kareta anu bau pahampate tiba suludadu anu sumake i ajahan. Sahingga tinokamo mae na suludadu i Tomundo' Maakha tiba iwi-iwi'an kareta anu bau pahampate anu tinamboanmo aijo' ka' nombaumo kemah koko Medeba. Mian nu Amon suele tinokamo lengkat me i kota' nu aha iwi-iwi' da mahampatemo.

⁸Salatan ihongomo i Daud na han aijo' ia nonsaimo i Yoab tiba iwi-iwi' na suludadunyo da mambamo mahampate mongewa sampo bali'.

⁹Mian nu Amon nosabatmo ka nomposadiamo suludadu nu aha i ahop nu sabatan daka' i kota' Raba puso nu kota' nu aha ka' to tomu-tomundo' anu tinokamo mae montulungi aha nomposadiamo suludadu nu aha i padang.

¹⁰Tinoa i Yoab taalu' suludadu nu sampo bali' nontotonga'imo ia lengkat mae i ahopnyo ka' mule' lengkat mae i hikunyo. Kalana aijo' ia nompile'imo suludadu nu Israel anu makolit na mahampate ka' nongatunmo aha mompaha aho-ahop tiba suludadu nu aha Siria.

¹¹Labinyo nu suludadu nu aha Israel binee'nyomo hi Abisai utus ise'nyo na mongatun suludadu nu aha mompaha aho-ahop tiba suludadu nu Amon.

¹²I Yoab nottataemo hi utus ise'nyo aijo', “De aku madi'mo moko ala mongewa suludadu nu Siria sampe mae malia-lia' toka montulungi aku. Sumo aitu mule' suele de beleyum madi'mo moko ala mongewa suludadu nu Amon aku suele tokaje mae montulungi beleyum.

¹³Pohoson na kinyonyoa! Imbo' babaani mae na kita mahampate montinjohakon bansanto ka' to kota-kota' nu Tumpu Allah-nto. O' amalakon da Tumpu mombau apaa na anu Nu kahanda'i.”

¹⁴I Yoab ka' suludadunyo nambamo nontumbuhi sahingga suludadu nu Siria nopalaimo.

¹⁵Salatan aha mian nu Amon nontoamo suludadu nu Siria nopalaimo aha suele nopalaimo pinalaianmo nu aha na i Abisai ka' ninsusule'mo i kota'. Salatan noko pahampatemo tiba mian nu Amon, i Yoab ninsusule'mo i Yerusalem.

¹⁶Mian nu Siria nonsumbu'mo taalu' aha pinatundu'mo nu mian Israel. Sahingga ilagamo nu aha na suludadu nu aha anu kiijo' mae i daerah sasu kabete'an Kaunyo nu Efrat ka' sinaimo na suludadu haha aijo' da mamba mahampate, i Sobakhmo na mongkapalai talenga' nu suludadu i Hadadezer tomundo' nu Soba.

¹⁷Salatan ihongomo i Daud na han aijo' pinosihuknyomo na suludadu nu Israel iwi-iwi' lantas notaapmo i Kaunyo nu Yordan ka' ingatunnyomo mompaha aho-ahop tiba aha mian nu Siria. Jadi nahampatemo na aha

¹⁸sahingga suludadu nu Siria iloloi'mo nu suludadu nu Israel. I Daud tiba suludadunyo nompateimo aha 7.000 na mian anu mompojalan kareta anu binau mae pahampate ka' mule' 4.000 na suludadu anu lumajang tengke. I Sobakh talenga' nu aha Siria suele pinateanmo.

¹⁹Salatan to tomu-tomundo' anu nu kuasai i Hadadezer nontoamo taalu' aha pinatundu'mo nu suludadu nu Israel aha nompoitamo da baladamemo tiba i Daud ka' mule' tundu'mo hi ia. Ilapas na aijo' aha mian nu Siria madi'mo daagi nontulungi aha mian nu Amon.