Read Saluan 1 TAWARIKH 20 Bible Online

1 TAWARIKH 20 - Saluan bible

1 TAWARIKH 20

¹ Po'ule' mule tinoka na loonu ka' nimbuhakmo susumo biasanyo to tomu-tomundo' mambamo mahampate, i Yoab nongatun mule' suludadunyo namba nahampate sahingga nompatundu'mo lipu' Amon. Tempo'nyo aitu i Tomundo' Daud jinojoongmo i Yerusalem madi' namba tiba aha. I Yoab tiba suludadunyo nontikumo kota' Raba ka' nontumbuhimo ka' nongideimo kota' aijo'.

²Lapas aijo' i Daud tinokamo nongala iwi-iwi' na pakakas anu pinahuhuakonmo i kota' aijo'. Sala'sa'angu' na pakakas haha aijo' aijo'mo songko' i tomundo' Amon. Songko' nu tomundo' aijo' ko boatnyo kila-kila 34 na kilogram ka' pinaha pokonan batu mainan. Ingala i Daud na batu mainan haha aijo' ka' pinokonanyo i songko'nyo.

³Lapas aijo' binoamo i Daud na mian nu kota' Raba haha aijo' ka' pinakisanyo na aha mokalaja, mompake galaji, pason, ka' bobolo'. Han aijo' binaunyo mule' i kota' sangga'at anu i da'erah Amon. Noko lapas na aijo' i Daud ka' iwi-iwi' na suludadunyo ninsusule'mo i Yerusalem.

⁴Madi' pinin ilapas na aijo' nahampate mule' nongewa aha mian nu Filistin kiijo' i Gerar. I sala'sa'angu na tampat anu pinahampatean aijo' i Sibhai mian nu aha Husa nompateimo samian anu daka' hondo na butongnyo sanggonyo i Sipai. Sahingga mian nu Filistin pinatundu'mo.

⁵ I tampat sangga'at na pinahampatean nongewa mian nu Filistin, i Elhanan anak i Yair nompateimo i Lahmi utus i Goliat mian nu Gat. Duhukan nu talombo' i Lahmi aijo' sumo kau' pakakas nu pontonun hude.

⁶I tampat sangga'at mule na pinahampatean kiijo' i Gat daagi ko samian anu daka' hondo na butongnyo kangkam nu limanyo kowi koanan bubuu' anon. Ia lee' mae nu mian anu toto daka-daka' na butongnyo nu aha anu tinumuu'mo tempo'nyo naipuan mae.

⁷Ia lewa'mo nompopo'ambang mian nu Israel kalana aijo' ia pinateanmo i Yonatan anak i Simea utus tu'a i Daud.

⁸Aha totolu' na mian anu pinateanmo i Daud ka' suele gombuan nu suludadu nu aha haha aijo' lee' mae nu mian anu toto daka-daka' na butongnyo kiijo' i Gat.