Read Saluan 1 TAWARIKH 21 Bible Online

1 TAWARIKH 21 - Saluan bible

1 TAWARIKH 21

¹Ibilis kahanda'mo monsilakai aha mian nu Israel; kalana aijo' pagalamo sinale'annyo na i Daud da obilangmo na mian.

²Sahingga pinoto'imo i Daud hi Yoab ka' hi to sulu-suludadunyo anu toto tangka-tangkas na pangkatnyo, “Bilangmo na mian nu Israel iwi-iwi' toka-toka i kampung anu toto ise-ise' kalana aku kahanda'mo monsumbu' pa' sangkuka na konjoo'nyo na mian nu Israel.”

³Tinaaman i Yoab, “O'amalakon da Tumpu mompaka tuangi mae mian nu Israel pinsa'atu lipat na konjoo'nyo da molingkuduimo anu uuka aiya na aha. Belento Anu talasanggo, te misa' sinumbu'mo ahi' na aha tinundu'mo hi belento Tomundo'? Kadaka' tionyomo ahi' mombilang mian? Boli-boli kalana kasalahan aijo' songko-songko na bansa mongoa'imo ideknyo!”

⁴Panyo i tomundo' sabole-bolemo ahi' nontoongi palentahnyo aijo', jadi i Yoab nambamo nonsongkohi Israel tinoka-toka i kampung anu toto ise-ise', lapas aijo' po'ule'mo ninsusule' i Yerusalem,

⁵ka' tokamo pinoto'inyo hi tomundo' Daud sangkuka na mian anu binilangmo aijo'. Konjoo'nyo nu to momo'ane anu timbali ohangkat bau suludadu 1.100.000 na mian nu Israel ka' 470.000 na mian nu Yehuda.

⁶Panyo tulunan nu aha bansa Lewi ka' tulunan nu aha bansa Benyamin madi' ninsoop i bilangan aijo'. I Yoab madi' nombilang aha kalana ia madi' situju na mompojalan palentah i tomundo' aijo'.

⁷Tumpu Allah madi' sanang na mombilang aijo' sahingga Ia nohukumo aha mian nu Israel.

⁸Lantas binalado'amo na i Daud, “O Tumpu Allah', aku talalomo binaladosa'! Ampuniakon mae na aku kalana anu binaungkumo aijo' talalo hondo ponga'.”

⁹Tumpu nompoto'imo hi nabi Gad da iaje na mompoto'i hi Daud.

¹⁰“Lako'mo ka' poto'i hi Daud totolu' na anu nu pile'i. Maumo pa' apaa na nu pile'i Ku bee'mo.”

¹¹Lantas nambamo na i Gad hi Daud, ka' nompoto'i potuunon nu Tumpu aijo', tukoonyo, “Iya na anu nu pile'i nu Belento Tomundo':

¹²Lipu' aiya nu tokaimo mae nu balaa' kasusa'an i anu okaan totolu' na taun na kopinnyo, kabai belento Tomundo' lewa' mopalai nu loloi' nu sampo bali' kopinnyo totolu' na bitu'on, kabai songko-songko na lipu' aiya tolunsinaa na kopinnyo na nu tumbuhi nu Tumpu nu bajak-Nyo aijo'mo panyakit anu molele, ka' malaekat-Nyo mombo'a kasilakan toka yayamae.”

¹³Tinaman i Daud; “Beh! Silakamo na Aku! Panyo'i, de mememule nu hukum nu Tumpu anu daka na liibos-Nyo.”

¹⁴Tumpu nontokakon balaah panyakit hi mian nu Israel, sahingga 70.000 na mian sinilaka.

¹⁵Lapas aitu Tumpu nonsai mule mae samian na malaikat tinoka kijo i ohani pongututan gandum i Arauna mian nu Yebus. Tumpu nombaliimo tanga'annyo. Mohukum bansa aijo ia notatae hi malaikat; sukupo! Belentimo!

¹⁶I Daud nontoa mule malaikat ata i kalangan olot nu langit tiba katano'an totoong na bajak i limanyo nu malaikat mongkahanda'i mohopu'i Yerusalem. Nontoa aitu na i Daud tiba o tana tanasnyo anu lewa mompimpin mian laayat anu temponyo aitu hau-haunyo pake-pake na hude kalung bau tanda nompele pele'o singkap tindolo da dupu no kayong i tano.

¹⁷I Daud binala doamo, ia notatae, “Oh Tumpu, Aku sinala'o Aku anu nompokaumo anu lako monsesus. Bansa aiya madi kosalah oh Tumpu Allangku. Hukum mae na aku ka kami sambonua, panyo pojo'onakon na balaa' himian anu palesaya hikita Tumpu.”

¹⁸Lapas aijo malaikat nu Tumpu nompokaumo i Gad mompotoiakon hi Daud da ia moliba mokita i tampat pongututan gandum i Arauna, mompotinjo mezbah hi Tumpu.

¹⁹Lapas aitu nambamo na i Daud nombatuki palentah nu Tumpu anu pinotoiakon i Gad.

²⁰I tampat pongututan gandum i Arauna dagi ko anaknyo aha opat tomomo'ane hau haunyo mongutut gandum, nontoa malaikat aijo aha opat na anak aitu nopadekao nitatampung.

²¹Tinoa i aranua na i Tomundo Daud tinokamo nambamo siningkabotannyo ka tinolo dadupu i ahopnyo.

²²I Daud no tatae hi ia, “Aku mompotinjo mezbah i tampat ayah bau anu nu Tumpu. Da balaa aiyah belentimo. Mokonyo aitu pobaluko na tano ayah hiyau. La, potoi pa sangkuka na olinyo da ku bayan.”

²³“Tinaman i Arauna alamo Tuan,” “baumo apa apaa Tuan apa na anu maima aya! Na to sapi-sapi bau koloban anu opo tunu ka kau pontunuan, alamo na aya papan pongututan, ka paka ala na aya gandum bau palasombahan ku be'o iwi-iwi na atina boli pilenje o pai bayan kita Tuan.”

²⁴Panyo tinaman i Tomundo' Daud, “Boli' tatap kuoli yayamo na olinyo aku madi mongkaoho mompalasombahkan hi Tumpu apaa na anu nu beleyum kabai anu la tutuk ku alamo.”

²⁵Sahingga binayan i Tomundo' Daud hi Arauna 600 na doi salaka pinonggoli tampat aijo.

²⁶Lapas atu i Tomundo' Daud nompotinjomo saangu na mezbah hi Tumpu, ka nom-palasombahkan koloban anu opotunu ka koloban pompodame lapas aijo binala do'amu na i Tomundo' Daud, do'anyo aijo tinaman nu Tumpu tiba adu anu tinudun lengkat i langit nompapui koloban-koloban ata i mezbah aijo.

²⁷Lantas pinokaumo nu Tumpu na malaikat poule nomposalung bajaknyo malaikat mule nombatukmo palentah nu Tumpu aijo.

²⁸Salatan tinoa i Tomundo' Daud, Tumpu nontamimo do'anyo kalana palasom-bahanyo aijo; ia nompaka palasombahkan mule koloban i mezbah aijo.

²⁹Temponyo aitu kema nu Tumpu anu binau i Musa kijo i padang bola tiba mezbah bau pompounaan koloban anu opotunu dagi kijomae i tampat ibadat anu kijo i Gibeon.

³⁰Panyo i Daud madi bani no kijo lako me binasisik tiba Tumpu kalana ia mabuhuk, i bajak nu malaikat nu Tumpu.