Read Saluan 1 TAWARIKH 22 Bible Online

1 TAWARIKH 22 - Saluan bible

1 TAWARIKH 22

¹Sahingga notataemo na i Daud, “I tampatmo aiya na tionyo ahi pompopontinjoan Laigan nu Tumpu Allah. Ka' i Mezbahmo aiya na mian nu Israel tionyo ahi' monsombahkon koloban nu aha hi Tumpu.”

²I Tomundo' Daud nompoki posihukmo iwi-iwi' na mian anu i salipu'an mae anu jinojoongmo i lipu' Israel, lantas binee'annyomo kalaja na aha. Sambagian na aha mompa'at batu da bau Laigan nu Tumpu.

³Da mombau paku' ka' hensel anu opokona i sabatan daka' haha aijo' i Laigan nu Tumpu, i Daud nolimu'mo besak manjoo' hondo. Ia mule' nolimu'mo manjoo' hondo na tambaga, sahingga madi'mo pilenje tinimbang.

⁴Hi aha mian nu Tirus ka' Sidon, ia nompotuunmo manjoo' hondo na kau' lontio' nu Libanon.

⁵Binaumo i Daud na iwi-iwi' aijo' kalana tinutugannyomo sumo uuka: “Aku tionyo ahi momposadiamo apaa na anu opalalui de mombaumo Laigan nu Tumpu. Kalana i Salomo anaku momo'ane daagi' olitau ka' ma'isa ko anu nu pisumbu-sumbu', padahan Laigan nu Tumpu anu obauje aijo' tionyo ahi' ma'ima' hondo ka' talasanggo i songko-songko na dunia.” Sahingga ma'isa pe'e sinilaka na ia, ia momposadiamo manjoo' hondo na talakonannyo anu kahanda' obau Laigan nu Tumpu aijo'.

⁶I Daud nolagamo anaknyo momo'ane, i Salomo, ka' nompalentahmo ia da mombaumo Laigan nu Tumpu Allah anu osombah nu mian nu Israel.

⁷ Koonyo i Daud hi Salomo, “O anaku, pininmo na aku ko kahanda' mombau sa'angu' na laigan bau pongadati Tumpu Allah-ngku.

⁸Panyo pinoto'imo nu Tumpu tukoonyo aku talalomo lewa' nahampate ka' saja'mo nompatei manjoo' hondo na mian. Kalana aitu ia madi' mompobee' aku mompotinjo laigan bau ponsomban Ia.

⁹Maumo sumo aijo', ia binalajanji'mo hi belengku sumo uuka: Beleyum saidi' mae mohumpakmo samian na anak mo'ane anu mompalentahje ka' madi'mo ko anu lewa' mae monsampo bali', kalana Ku tulungimo na ia, sahingga madi'mo ko anu mamba mae mompahampateakon ia. Ia osanggohi i Salomo kalana de daagi' ia na mompalentah, Aku saja' mombee'i ia ka'ima'an nu lipu' ka' ka'amanan i songko-songko na Israel.

¹⁰Anakmo nu beleyum aijo' momo'ane na mombau laigan bau ponsomban Aku. Ia timbalimo anak-Ku ka' Aku timbalimo tuumanyo. Kasuhanganku mompalentah Israel saja' sabole-bole hi lee'nyo sampe toka sidu-sidutu'.”

¹¹Lantas po'ule' pinoto'i i Daud, “Uuka aiya, anaku o' amalakon da Tumpu Allah nu beleyum saja' montulungi beleyum. Ka' O' amalakon na beleyum da moko ala mompotimbali laigan nu Tumpu anu obau aijo' susumo anu jinanji'-Nyomo.

¹²Ka' bisa-bisa' Tumpu Allah nu beleyum mombee'i kapandean hi beleyum ka' monsumbu' mompalentah Israel susumo anu i uno nu atulan-Nyo.

¹³ De beleyum montuluti iwi-iwi' palentah anu binee'mo nu Tumpu hi Musa anu ogunakon hi bansa Israel, beleyum moko ala mompotimbali laigan aijo'. Beleyum tionyo ahi' totu-totu'u na kinyonyoa ka' baani. Boli mabuhuk na mongahopi maumo pa'apaa.

¹⁴Mongkona Laigan nu Tumpu aijo' aku binalausahamo totu-totu'u nolimu' 3.400 na ton nu mosoni' ka' 34.000 na ton nu salaka, aitu pe'e nolabimo. Ka' mule' daagi' ko tambaga ka' besak anu madi'mo opoko bilang na konjoo'nyo. Kau' ka' batu suele pinosadiangkumo, panyo daagi' ahi' beleyum montuangi.

¹⁵Manjoo' na mian anu mokalaja hi beleyum. Daagi' ko miana nu moko ala mokalaja i pongkekean batu daagi' ko tukang kau' tukang batu, ka' manjoo' hondo na tukang anu monsumbu' montutuk,

¹⁶mosoni', salaka, tambaga, ka' besak. Jadi sampamo lia-lia' otampu'uni! O'amalakon da Tumpu montulungi beleyum.”

¹⁷Lantas i Daud nompokaumo iwi-iwi' na to pola-polaya' nu Israel da montulungi i Salomo.

¹⁸Ia notatae, “Tumpu Allah nu belemiu montulungimo belemiu ka' nombee'imo kadamean ka' ka'amanan i songko-songko na lipu'. Ia nombee'imo kahosonan aku sahingga noko alamo nompatundu' iwi-iwi' bansa anu naipuan mae jinojoong i lipu' aiya. Tempo' uuka aha tinundu'mo hi beleyum ka' hi Tumpu.

¹⁹Jadi tionyo ahi' belemiu palesaya ka' mohongo-hongo Tumpu Allah nu belemiu i uno nu kinyonyoa totu-totu'u ka' i uno nu kantumuu'an nu beleyum. Tampu'unimo na mombau laigan anu bau ponsomban Tumpu, da Peti' Palajanjian-Nyo ka' iwi-iwi' na pakakas sangga'at anu opake samata-mata de monsombahmo Tumpu, opo'una'mo i kiijo'.”