Read Saluan 1 TAWARIKH 24 Bible Online

1 TAWARIKH 24 - Saluan bible

1 TAWARIKH 24

¹ I Harun kino anak mo'ane aha opat; i Nadab, i Abihu, i Eleazar, tiba i Itamar. I Nadab tiba i Abihu sinilakamo momona nompala'imo tuuma nu aha, ka' mule' madi' kino anak. Kalana aitu i Eleazar tiba i Itamar to utu-utus nu aha i hangkatmo binau Imam. I Daud nombagimo lee' mae i Harun tinompu-tompuknyomo na mian ka' pinosi bee'anmo kalaja apaa na, hi santompuk obau. Nombagi tompukan haha aijo' i Daud tinulungan i Zadok lee' mae i Eleazar ka' i Ahimelekh lee' mae i Itamar.

⁴Lee' mae i Itamar binagi ualu' na tompukannyo, panyo lee' i Eleazar binagi sampulu' ka' anom na tompukannyo kalana lee' mae i Eleazar manjoo' na mo'ane anu salaku tu'anyo i sa'angu' na auwan.

⁵Kalana maumo lee' mae i Eleazar kabai lee' mae i Itamar daagi' ko anu ko pangkatnyo mokalaja i Laigan nu Tumpu ka' to pola-polaya' nu agama sahingga nombagi apaa na anu okalaja binuangakon onde.

⁶Lee' mae i Eleazar ka' lee' mae i Itamar nobolo-bolos toto samian na nontoluk onde, lantas toto samian na sanggo nu a aha tinulis nu gulutulis samian, sanggonyo i Semaya anak i Netaneel mian nu aha Lewi. Iwi-iwi' aijo' binau i ahop nu tomundo' ka' to mia-mian anu ko pangkatnyo, i Imam Zadok, i Ahimelekh anak i Abyatar ka' to tu'a-tu'anyo nu auwan aha mae tompukan mian nu Lewi.

⁷Aiya na nomon lengkat hi anu momona sampe tinoka hi anu mihi-mihinyo, aijo'mo aha anu mokalaja anu binagi nu ondean kona hi aha anu uampulu' ka' opat na tompukannyo aijo': 1. Yoyarib — 13. Yesua 2. Yedaya — 14. Sekhanya 3. Harim — 15. Elyasib 4. Seorim — 16. Yakim 5. Malkia — 17. Hupa 6. Miyamin — 18. Yesebeab 7. Hakos — 19. Bilga 8. Abia — 20. Imer 9. Hezir — 21. Yakhim 10. Hapizes — 22. Gamul 11. Petahya — 23. Delaya 12. Yehezkiel — 24. Maazya.

¹⁹Sanggo nu to mia-mian haha aijo' tinulismo ka' binatukakonmo i kalaja anu nu bau nu aha toto santompuk na mobolo-bolos minsoop i Laigan nu Tumpu mongatun anu monsombah Tumpu susumo anu ingatunmo i Harun mompolee' mae nu aha, montuluti anu pinalentahkonmo nu Tumpu, Tumpu Allah nu Israel.

²⁰Ka' mule' sangga'at na aha lee' mae i Lewi daagi' mule' pinosoop na to tu'a-tu'anyo nu sa'angu' na auwan aijo'mo: i Yehdeya, lee' mae i Amram anu daagi' mae tusanannyo nu lee' i Subael; i Yisia, lee' mae i Rehabya; i Yahat, lee' mae i Yizhar tiba i Yokameam to ana-anak i Hebron binatukakon i tatu-tatusan nu umunnyo; i Samir, lee' mae i Uziel, anu daagi' mae tusanannyo nu lee' i Mikha; i Zakharia, lee' mae i Uziel, anu daagi' mae tusanannyo nu lee' i Yisia utus i Mikha; i Mahli, i Musi tiba i Yaazia, lee' mae i Merari.

²⁷I Yaazia kinoa nak mo'ane aha totolu': i Syoham, i Zakur tiba i Hibri.

²⁸I Mahli kino anak mo'ane ua'aha sanggonyo i Eleazar tiba i Kish. I Eleazar madi' kino anak mo'ane panyo i Kish na kino anak mo'ane ahi' samian sanggonyo i Yerahmeel.

³⁰Anak mo'ane i Musi aha totolu': i Mahli, i Eder tiba i Yerimot. Aijo'mo na to au-auwan hi tulunan nu bansa Lewi.

³¹De ahamo na mongala bahagian mokalaja, toto samian na tu'anyo nu sa'angu' na auwan tibaa samian na utusnyo ise' mo'ane montoluk onde susumo anu binaumo nu to julu-julu mae nu aha sangga'at aijo'mo to ima-imam lee' mae i Harun. Montoluk onde aijo' nusakisi i Tomundo' Daud tiba i Zadok, i Ahimelekh ka' to tu'a-tu'anyo nu to sa'angu' na auwan hi aha tompukan mae nu to imi-imam ka' hi aha tompukan mae nu aha Lewi.