Read Saluan 1 TAWARIKH 25 Bible Online

1 TAWARIKH 25 - Saluan bible

1 TAWARIKH 25

¹Anu mongatun de monsombahmo Tumpu, i Tomundo' Daud ka' to pola-polaya' nu aha mian nu Lewi nompile'imo sa'anakan mae i Lewi aijo'mo: i Asaf, i Heman, tiba i Yedutun. Aha binee'an kalaja mompotoka potuunon nu Tumpu Allah ka' okuti'akon kasapi', gambus ka' simbal. Anu molaya' aha de monsombahmo Tumpu ka' mosia na atulannyo toto sangahan pinile'anmo ka' tinompu-tompukmo na mian sumo uuka:

²Aha opat na anak mo'ane i Asaf: i Zakur, i Yusuf, i Netanya tiba i Asarela. Polaya' nu aha i Asaf, anu mompotoka potuunon nu Tumpu Allah, de nupokaumo i Tomundo'.

³Aha anom na anak mo'ane i Yedutun: i Gedalya, i Zeri, i Yesaya i Simei, i Hasabya tiba i Matica. Polaya' nu aha aijo'mo tuuma nu aha, aha mompotoka potuunon nu Tumpu okuti'akon kasapi ka' onyanyiakon nu aha nu nyanyian pompuji' Tumpu ka' pontalima kase hi Tumpu.

⁴Aha sampulu' ka' opat na anak i Heman: i Bukia, i Matanya, i Uziel, i Sebuel, i Yerimot, i Hananya, i Hanani, i Eliata, i Gadalti, i Romamti-Ezer, i Yosbekasa, i Maloti, i Tir tiba i Mahaziot.

⁵I Tomundo' ko posi nabinyo aijo'mo i Heman. Tumpu nombee'imo aha sampulu' ka' opat na anak to momo'ane haha aijo', ka'aha totolu' na anak boune i Heman kalana Tumpu nonjanji'mo mombee'i pangkat anu talasanggo hi ia.

⁶Iwi-iwi' na anak i Heman haha aijo' mompahaikakon musik simbal kasapi' ka' gambus anu molaya' aijo'mo tuuma nu aha ka' aijo' opahaikakon de monsombahmo Tumpu i Laigan nu Tumpu. I Asaf, i Yedutun tiba i Heman binee'an kalaja susumo anu pinoto'imo i tomundo'.

⁷Aha uampulu' ka' opat na anak mo'ane nu aha haha aijo' ka' to julu-julu nu aha aijo'mo anu toto pande-pande i musik anu pinogulu'mo. Aha iwi-iwi' 228 na mian.

⁸Anu montantukan pa'ihemo na mohumpak bahagian, aha iwi-iwi' montoluk onde — mau anu olitau mau anu tu'anyomo mau anu monsumbu'mo hondo mau anu sala'je montampu'uni balagulu'.

⁹Aha 228 na mia haha aijo' binagi 24 na tompukannyo binatukakonmo hi auwan nu aha toto sa'angu'. Toto sa'angu' na tompukannyo aha 12 na mian, anu mongkapalai samian. Aiya na sanggo nu aha anu tinolukakonmo onde: 1. i Yusuf lengkat mae hi aha auwan i Asaf — 13. i Subael 2. i Gedalya — 14. i Matica 3. i Zakur — 15. i Yeremot 4. i Yizri — 16. i Hananya 5. i Netanya — 17. i Yosbekasa 6. i Bukia — 18. i Hanani 7. i Yesarela — 19. i Maloti 8. i Yesaya — 20. i Eliata 9. i Matanya — 21. i Hotir 10. i Simei — 22. i Gedalti 11. i Azareel — 23. i Mahaziot 12. i Hasabya — 24. i Romamti-Ezer.