Read Saluan 1 TAWARIKH 26 Bible Online

1 TAWARIKH 26 - Saluan bible

1 TAWARIKH 26

¹Aiya na pombagian nu aha mian Lewi anu monjagai Laigan nu Tumpu. Anu lengkat mae hi aha sa'anakan i Korah, i Meselemya na tiniju' anak i Korah lengkat mae hi auwan i Ebyasaf. Ia kino anak aha 7 na mo'ane anu tinulismo i daputan ka' binatukakon i tatusan nu umun nu aha: i Zakharia, i Yediael, i Zebaja, i Yatniel, i Elam, i Yohanan, i Elyo'enai.

⁴ Ka' mule' suele i Obed-Edom. Ia nubalakati nu Tumpu Allah ko anaknyo mo'ane aha 8 na anu tinulismo i daputan binatukakon i tatusan nu umun nu aha: i Semaya, i Yozabad, i Yoah, i Sakhar, i Netaneel,

⁵i Amiel, i Isakhar tiba i Peuletai.

⁶I Semaya anak tumpe i Obed-Edom kino anak mo'ane aha 6: i Otni, i Refael, i Obed, i Elzabad, i Elihu tiba i Semakhya; iwi-iwi' to mia-mian anu talasanggo hi aha sa'anakan, kalana aha toto babaani, anu talalo hondo baani aijo'mo i Elihu tiba i Semakhya.

⁸Anu binee'an kalaja monjaga aijo' aha mae sa'anakan i Obed-Edom nombee' mae aha 62 na to momo'ane anu toto babaani.

⁹Aha mae sa'anakan i Meselemya nombee' mae 18 na mian anu toto babaani.

¹⁰Anu nolengkat mae hi aha sa'anakan i Merari tiniju' aijo'mo i Hosa. Ia kino anak mo'ane aha opat: i Simri (ia misa' anak tumpe panyo i hangkatmo nu tuumanyo binau polaya').

¹¹I Hilkia, i Tebalya, tiba i Zakharia. Iwi-iwi' aha 13 na mian anu ingala hi auwan i Hosa na anu tinimbali ponjaga Laigan nu Tumpu.

¹²To mia-mian anu monjagai Laigan nu Tumpu binagi-bagi motumpu-tompuk ingala hi sa'anakan mae nu aha. Aha mule' suele binee'an kalaja i Laigan nu Tumpu susumo mian nu Lewi sangga'at.

¹³Batu-batu aha sa'anakan mae mau aha sa'anakan mae anu manjoo' na miannyo maumo anu ola sangkiding na miannyo, otolukakon onde da osumbu' pa' i sabatan daka' iya mae na ponjagaan nu aha.

¹⁴I Selemya nongkona sabatan daka' sasu kabete'an. I Zakharia anaknyo anu saja' ma'ima' na mombee'i pokinde' nongkona i sabatan daka' sasu utara.

¹⁵I Obed-Edom nongkona i sabatan daka' sasu selatan ka' to ana-anaknyo binee'an kalaja monjagai to guda-gudang ponguna'an posadiaon.

¹⁶I Supim tiba i Hosa nongkona sabatan daka' sasu kinsoban ka' sabatan daka' Syalekhet anu i jalan pindakoan. Kalaja monjagai ingatunmo sumo aijo' na ko'ima'nyo sahingga saja' ko anu monjagai sabatan daka'.

¹⁷Sansina-sinaa i sasu kabete'an aha 6 na ponjaga, i sasu utara aha 4 ka' i sasu selatan aha 4. To guda-gudang anu pongisian posadiaon suele aha 4 na monjagai; toto sa'angu' na gudang ua'aha na monjagai.

¹⁸I Pavilyun sasu kinsoban aha 4 na monjagai i jalan daka' ka' samata-mata i Pavilyun aijo' aha 2 na monjagai.

¹⁹Sumo aitu na nongatun anu monjagai kona hi aha sa'anakan mae i Korah ka' hi aha sa'anakan mae i Merari.

²⁰To mia-mian sangga'at kona hi tulunan nu bansa Lewi binee'an kalaja montoa pakakas anu opake i Laigan nu Tumpu, ka' anu pino'una' i gudang, apa-apaa na anu binee' nu mian hi Tumpu Allah.

²¹I Ladan anak mo'ane i Gerson; ia nombee' mae tino pia-piangkuka na tompukan nu mian sa'anakan, tibamo i kiijo' na aha sa'anakan mae i Yehiel anaknyo.

²²To ana-anak i Yehiel, aijo'mo i Zetam tiba i Yo'el, binee'an kalaja montoa gudang iwi-iwi', ka' montoongi doi anu kiijo' i Laigan nu Tumpu.

²³Lee' i Amram, i Yizhar, i Hebron tiba i Uziel suele nohumpak pombagian kalaja.

²⁴I Sebuel aha sa'anakan mae i Gersom, anak i Musa monjagai pakakas anu pino'una' i Laigan nu Tumpu.

²⁵Ia daagi' mae mongkona julu i Silomit de o tuus mae hi Eliezer utus i Gersom. Lundu-lunduannyo nu lee' mae i Eliezer toka-toka hi Selomit sumo uuka: i Eliezer, i Rehabya, i Yesaya, i Yoram, i Zikhri, i Selomit.

²⁶I Selomit tiba to julu-julunyo monjagai ka' montoa iwi-iwi' apaa na anu nu bee' ka' nu sombahkon i Tomundo' Daud, ka' anu nu bee' nu to tu'a-tu'annyo nu auwan, ka' to pola-polaya' nu auwan, ka' to sulu-suludadu anu toto tangka-tangkas na pangkatnyo.

²⁷Iwi-iwi' na anu nu bee' mae nu aha aijo' to bala-balang anu nu pahuhuakon mae tempo'nyo aha mamba mahampate sambagian na nusombahkon nu aha i Laigan nu Tumpu anu samata-mata opake i Laigan nu Tumpu,

²⁸jadi osaisanggo-sanggomo, i Salomo ka' to utu-utusnyo na monjagai ka' montoa iwi-iwi' apaa na anu binee'mo da opake samata-mata i Laigan nu Tumpu, tibamo iwi-iwi' na anu sinombahkon i Tomundo' Saul, ka' mule' i Abner anak i Ner, ka' mule' i Yoab anak i Zeruya. Lantas binee'mo i Nabi Samuel hi Tumpu.

²⁹Lee' i Yizhar, aijo'mo i Kenanya ka' to ana-anaknyo binee'an kalaja mongatun sulat nu negara ka' kalaja momputusi palakala i Israel.

³⁰Iwi-iwi' na ulusan nu agama ka' ulusan nu pamalentahan anu i Israel sasu kinsoban baunyo nu Yordan binee' hi Hasabya, ka' hi aha 1.700 na julunyo mae: iwi-iwi' na to mia-mian anu toto tala-talasanggo lee' mae i Hebron.

³¹Polaya' nu lee' mae i Hebron aijo'mo i Yeria. Tinoka i taun ko patompulu'nyomo kapamalentahan i Tomundo' Daud sinelidikanmo ka' i humpakmo na aha taalu' daagi' ko to sulu-suludadu anu toto babaani jojoong i Yazer, i da'erah Gilead.

³²Iwi-iwi' na ulusan nu agama ka' pamalentahan i Israel sasu kabete'an Kaunyo Yordan — aijo'mo da'erah tulunan nu aha bansa Ruben, Gad ka' sambagian tulunan mae nu bansa Manasye — binee'mo hi aha 2.700 na to tu'a-tu'anyo nu julu mae i Yeria, iwi-iwi' mian anu toto tala-talasanggo anu pinile'anmo i Tomundo' Daud.