Read Saluan 1 TAWARIKH 5 Bible Online

1 TAWARIKH 5 - Saluan bible

1 TAWARIKH 5

¹ I Ruben aijo'mo na anak tumpe i Yakub. Panyo kalana i Ruben nompatiduhusimo sala'samian na ambuhue' nu tuumanyo, sahingga sanggo nu ambuhue' aijo' madi'mo na'ima', mokonyo' aijo' haknyo salaku anak tumpe madi'mo binee' hi ia, panyo binee'mo hi Yusuf. Maumo sumo aitu, panyo anu baani hondo na lee' i Yakub misa' i Yusuf panyo tulunan nu bansa Yehuda. Ka' anu momona tinimbali tomundo' hi aha mian nu Israel iwi-iwi' aijo'mo nolengkat mae hi tulunan nu bansa Yehuda aijo'.

³I Ruben anak tumpe i Yakub kino anak mo'ane aha opat: i Henokh, i Hezron tiba i Karmi.

⁴ Aiya na lundu-lunduannyo mae nu lee' i Yo'el: i Semaya, i Gog, i Simei, i Mikha, i Reaya, i Baal tiba i Beera. I Beera aijo'mo na polaya' nu aha tulunan nu bansa Ruben tempo'nyo ia i hakop i Tiglat-Pileser tomundo' nu Asyur, ka' binoamo i lipu' tampat pinompojoongan aha.

⁷I uno nu sisikon tinulis suele na to kapa-kapala nu aha sa'anakan i Ruben; aijo'mo i Yeiel, i Zakharia,

⁸tiba i Bela anak i Azas, makumpu i Sema lengkat mae hi aha sa'anakan i Yo'el. Tulunan nu bansa anu jojoong i Aro'er ka' i da'erah lengkat i Aro'er sasu Utara sampe tinoka i Nebo ka' Baal-Meon.

⁹Aha manjoo' hondo na potu'on i da'erah Gilead. Mokonyo' aijo' aha jinojoongmo i da'erah sasu kabete'an sampe tinoka i padang anu mateges, kinojo'onnyo tinoka-toka i kaunyo nu Efrat.

¹⁰Tempo'nyo i Tomundo' Saul, tulunan nu bansa Ruben nontumbuhimo ka' nompatundu'mo mian nu Hagri i sasu kabete'an Gilead, lantas jinojoongmo i lipu' aijo'.

¹¹I sasu Utara da'erah tulunan nu bansa Ruben jinojoongmo na tulunan nu bansa Gad i tano' nu aha Basan, kojo'onnyo sampe tinoka i Salkha, i sasu kabete'an.

¹²I Yo'el anu nolengkat mae hi tulunan nu bansa Gad, aijo'mo na mompolee' mae nu aha anu talasanggo, ka' i Safam aijo'mo na mompolee' nu aha sa'anakan anu nomor ko ohua'nyo. I Yaenai tiba i Safat aijo'mo na mompolee' mae nu aha sa'anakan sangga'at kiijo' i Basan.

¹³Mian sangga'at hi aha tulunan nu bansa Gad ninsoopmo hi aha sa'anakan anu aha popitu' aijo'mo: i Mikhael, i Mesulam, i Syeba, i Yorai, i Yakan, i Ziya tiba i Eber.

¹⁴Aha lee' mae i Abihael anak i Huri. Lundu-lunduannyo mae nu tundulan nu aha, o tundun sule-sule' sumo uuka: i Abihael, i Huri, i Yaroah, i Giled, i Mikhael, i Yesisa, i Yahdo, i Bus.

¹⁵Anu mongkapalai aha sa'anakan haha aijo' aijo'mo i Ahi anak i Abdiel, makumpu i Guni.

¹⁶Aha jinojoong i da'erah Basan ka' i Gilead, ka' iwi-iwi' na kota' i da'erah aijo' ka' mule' i songko-songko na padang hemput i da'erah Samron.

¹⁷Tundulan aiya binau tempo'nyo i Yotam tinimbalimo tomundo' nu Yehuda, ka' i Yerobeam tomundo' nu Israel.

¹⁸Anu ninsoop tulunan nu bansa Ruben, i Gad tiba tulunan nu bansa anu i sasu kabete'an kaunyo nu Yordan, aha 44.760 na suludadu anu pinogolu'mo ka' nonsumbu'mo nontoongo kanta, bajak tiba pana'.

¹⁹Aha nahampate nongewa tulunan nu aha Yetur Nafis ka' Nodab, aijo'mo na tulu-tuluan nu bansa Hagri.

²⁰Suludadu haha aijo' palesaya hi Tumpu Allah ka' nomoitamo tulung hi Ia, sahingga pinopoi'mo nu Tumpu na anu pinoita nu aha ka' nombee'imo ka'untungan nahampate na aha mian nu Hagri haha aijo' tiba anu nonsangaja'imo aha.

²¹Kalana aha nahampate aijo' sinitujuanmo nu Tumpu Allah, sahingga manjoo' na sampo bali' nu aha anu pinateanmo nu aha. Aha mule' nohakopmo ka' nomboamo aha 100.000 na mian ka' nompahuhuakonmo 50.000 na unta, 250.000 na domba, ka' 2.000 na keledai. Lapas aijo' aha jinojoongmo i da'erah aijo' sampe tinokamo na tempo'nyo nu bansa Israel i hakopmo ka' binoamo i lipu' pinompojoongan.

²³Sambagian na tulunan nu bansa Manasye jojoong i da'erah Basan, kojo'onnyo toka-toka i Baal-Hermon sasu utara, Senir, tiba bungkutnyo nu Hermon. Aha nompaka pajo'onmo.

²⁴Aiya na to kapa-kapala nu aha sa'anakan: i Hefer, i Yisei, i Azriel, i Yeremia, i Hodawya tiba i Yahdiel. Aha aijo' to sulu-suludadu anu baani hondo.

²⁵Mian nu Israel madi'mo nontuluti Tumpu Allah anu osombah nu mompolee' nu aha. Aha nohikumo Ia ka' nonsombahmo to pilo-pilogot nu bansa anu i laa'mo nu Tumpu Allah, sahingga nompala'imo lipu' Kana'an.

²⁶ Kalana aijo' Tumpu Allah nompotuka'mo hi kinyonyoa i Pul tomundo' nu aha Asyur, sahingga i lambanannyomo tinumbuhan na lipu' aijo'. I Pul suele salakumo i Tiglat-Pileser. Lantas aha tulunan nu bansa Ruben, Gad, tiba tulunan nu bansa Manasye anu i sasu kabete'an Kaunyo nu Yordan binoamo nu aha salaku anu i hakop ka' mambamo pinojoong nu aha i Halah, i Habor, i Hara, ka' sa'angu' na tampat koko Kaunyo Gozan. I Kiijo' mae aha tinataapmo na jinojoong sampe sinaa uuka aiya.