Read Saluan 2 TAWARIKH 10 Bible Online

2 TAWARIKH 10 - Saluan bible

2 TAWARIKH 10

¹I Rehabeam nambamo i Sikhem kalana iwi-iwi' na mian da'isan nu aha Israel sasu Utara sinihukmo i kiijo' kahanda'mo mohangkat ia da bau tomundo.

²Tempo'nyo aitu i Yerobeam anak i Nebat daagi' kiijo' mae i Mesir kalana nopalaimo, nompala'imo i Tomundo Salomo. Salatan i hongonyomo na lele i Rehabeam ia po'ule'mo ninsusule' i Israel.

³Mian da'isan sasu Utara nolagamo i Yerobeam, lantas aha hingga-hinggat tiba ia nambamo nangadap hi Rehabeam. Aha notatae,

⁴“I Salomo tuuma nu Belento Tomundo nompokolonimo kolonon anu maboat hondo hi kami. De belento Tomundo mompolaing mae kolonon mami ka' mongga'ai mae kasansalaan mami, kami tulutmo hi belento Tomundo.”

⁵Tinaaman i Rehabeam, “Pe'e ahi' da ku tutugi. Po'ule'je toka mae i sinaa ko itolunnyo.” Jadi ninsusule'mo na mian haha aijo'.

⁶Lantas i Rehabeam nompoitamo pokinde' hi to tu'a-tu'anyo anu toho'mo saja' nompokinde'i i Salomo tuuma i Rehabeam. “Mosia na bau pontaamingku mian haha aijo'?” na koonyo i Rehabeam. “Mosia na pokinde' miu?”

⁷Tinaaman nu aha, “De belento Tomundo kahanda' mombau anu ma'ima' hi mian da'isan, ka' momposanang kinyonyoa nu aha, taami na aha ma'i-ma'ima' desumo aijo' yo aha tulu-tulutan hi belento Tomundo sampe toka sidu-sidutu'.”

⁸Panyo pokinde' nu to tu'a-tu'anyo haha aijo' madi' pinajulian i Rehabeam. Ola mule' ahi' ia namba hi to oli-olitau gondounyo ka' anu uuka aiya montulungi ia.

⁹Hi aha na pinompokilawannyo, “Mosia na pokinde' nu belemiu hi belengku da bau pontaamingku mian da'isan anu nompoitamo da ku polaing na kolonon nu aha?”

¹⁰Tinaaman nu aha, “Sumo uuka na belento Tomundo mompoto'i hi aha, ‘Mau akumo na anu madi' hondo mahoson, panyo akumo na lebe mahoson molingkudui tuumangku.

¹¹Tuumangku nombee'imo kolonon anu maboat hondo hi belemiu, panyo aku mombee'i kolonon anu lebe maboat mule'. Ia mondoke belemiu nu pompohos, panyo aku mondoke belemiu nu pompohos anu ko hii'nyo besak!’ ”

¹²Tinoka kino itolunnyo i Yerobeam ka' iwi-iwi' na mian haha aijo' po'ule'mo namba nangadap hi Tomundo Rehabeam, susumo anu pinalentahkonnyomo.

¹³Madi' pokakana tiba pokinde' nu to tu'a-tu'anyo, mian da'isan anu tinokamo hi ia aijo', labot kinadaloakonnyo nu potatae anu ma'idek.

¹⁴Susumo pokinde' nu to oli-olitau, aijo'mo na pinoto'inyo, “Tuumangku nombee'imo belemiu kolonon anu maboat, panyo mule' kolonon anu ku bee' aijo' na lebe maboat mule'. Ia nondoke' belemiu nu pompohos, panyo aku mondoke belemiu nu pompohos anu ko hii'nyo besak!”

¹⁵Apaa na anu pinoita nu mian da'isan madi' pinajuliannyo. Panyo aijo' memang katantuanmo nu Tumpu Allah. Apaa na anu pinoto'imo nu Tumpu hi Nabi Ahia mian nu Silo mongkona i Yerobeam anak i Nebat memang tionyo ahi jadi.

¹⁶ Salatan mian da'isan aha Israel nontoamo taalu' i tomundo madi' mongka'oho' mohongo-hongo aha, i loboo'akonnyomo nu aha daka-daka', “Bau apaa na kita mompajuli i Daud ka' lee'nyo: Aha madi' toho' nombau apa-apaa anu mingguna hi kita. Mian da'isan Israel, imbo' na kita paha pinsusule'mo! Pojohok na i Rehabeam mosi ulus butongnyo aijo'!” Sahingga ninsusule'mo na mian da'isan aha Israel,

¹⁷ka' i Rehabeam tinimbalimo tomundo ola mompalentah da'erah Yehuda.

¹⁸Maumo sumo aijo' na i Tomundo Rehabeam, panyo daagi' ahi' nompalentah i Adoniram, anu mongkapalai mian anu mokalaja jalan da o hakop na mian da'isan. Panyo pinahambunu'akonmo nu aha na ia nu batu sahingga sinilakamo. I Rehabeam pe'e me ise-ise', panyo ia noko ala nopalai, ka' nalia-lia' sinumake' i karetanyo ka' nopalaimo namba i Yerusalem.

¹⁹Sinaa aitu mian da'isan sasu Utara kalaja'an Israel saja'mo notomuhuk madi'mo mohongo-hongo to tomu-tomundo lee' mae i Daud.