Read Saluan 2 TAWARIKH 11 Bible Online

2 TAWARIKH 11 - Saluan bible

2 TAWARIKH 11

¹Salatan i Tomundo Rehabeam tinokamo i Yerusalem, ia nomposihukmo suludadu aha 180.000 na anu otaha'imani lengkat mae hi tulunan nu bansa Yehuda ka' Benyamin da mamba mompahampateakon mian nu Israel anu po'ule'mo mompohoson kakuasaannyo hi aha to tulu-tulunan nu bansa i sasu Utara Israel.

²Panyo Tumpu nonsaimo i Nabi Semaya,

³da mompotokakon potunon sumo uuka hi Rehabeam ka' hi iwi-iwi' mian anu hi aha tulunan nu bansa Yehuda ka' hi Benyamin,

⁴“Boli mompahampateakon to utu-utus nu belemiu mian nu Israel. Pinsusule'mo! Apaa na anu jinadimo aijo' memang kahanda'-Kumo.” Jadi tinulutanmo nu aha na palentah nu Tumpu, ka' madi'mo sinida na namba nompahampateakon i Yerobeam.

⁵I Rehabeam jinojoongmo i Yerusalem ka' nompalentahmo mian da mombau benteng i iwi-iwi' na kota' i da'erah Yehuda ka' Benyamin aijo'mo: kota' Betlehem, Etam, Tekoa,

⁶Bet-Zur, Sokho, Adulam,

⁸Gat, Mares, Zif,

⁹Adoraim, Lakhis, Azeka,

¹⁰Zora, Ayalon ka' Hebron.

¹¹Ia nompohosonmo kota' haha aijo' anu binauanmo benteng ka' nompojoongmo samian na kapala nu suludadu toto sa'angu' na kota' na mongkapalai gombuan nu suludadu. Toto sa'angu' an kota' aijo' tinoukannyomo nu kaanon, lanya' nu zaitun ka' anggur,

¹²tiba kanta ka' talombo'. Tiba jalan anu sumo aijo' da'erah Yehuda ka' Benyamin tinataapmo i uno nu kakuasa'annyo.

¹³To ima-imam ka' mian nu Lewi lengkat mae i da'erah Israel iwi-iwi' nambamo nosa'angu' hi Rehabeam.

¹⁴Mian nu Lewi haha aijo' nompala'imo mae padang hemput ka' tano' nu aha ka' nolalinmo namba i Yehuda ka' Yerusalem, kalana i Yerobeam ka' to tomu-tomundo anu nombolosakonmo ia madi'mo mompobee' aha mokalaja salaku imam nu Tumpu.

¹⁵ I Yerobeam nosi hangkatmo to ima-imam anu mokalaja i iwi-iwi' na tampat ponsomban pilogot ka' monsombahmo to tinu-tinumpu ka' patong sapi' anu pinosi baunyo.

¹⁶To mia-mian anu nolengkat mae hi tulunan nu bansa Israel iwi-iwi', anu totu-totu'u kahanda' monsombah Tumpu, Tumpu Allah Israel, nolalinmo namba i Yerusalem, nombatukimo mian nu Lewi haha aijo', da timbali monsombahkon koloban hi Tumpu, Tumpu Allah anu sinombah nu mompolee' nu aha.

¹⁷Tiba jalan anu sumo aijo'mo kalaja'an Yehuda nompaka pahosonmo. Tinotolu' na taun na kinopinnyo na aha nontinjohakon i Rehabeam nompalentah anak mo'ane i Salomo aijo', ka' tinumuu'mo susumo tempo'nyo i Tomundo Daud nompalentah ka' i Tomundo Salomo.

¹⁸I Rehabeam no'osoa tiba i Mahalat, tuuma i Mahalat i Yerimot anak mo'ane i Daud, tinanyo i Abihail, anak i Eliab makumpu i Isai.

¹⁹Aha kino anak totolu' na mo'ane: i Yeus, i Semarya tiba i Zaham.

²⁰Lapas mule' i Rehabeam po'ule'mo no'osoa tiba i Maakha anak i Absalom. Aha kino anak opat na mo'ane: i Abia, i Atai, i Ziza, ka' i Selomit.

²¹I Rehabeam bengkele'nyo aha 18, ka' silabo'nyo aha 60, aha 28 na anak to momo'ane, ka' aha 60 na anak to boboune. Iwi-iwi' na bengkele'nyo ka' silabo'nyo haha aijo', anu talalo hondo nu ka'ima'i i Maakha.

²²Aijo' na sababnyo i Abia anak i Maakha lebe nu kanonongi molingkudui anaknyo iwi-iwi', sahingga i Abiamo na pinile'annyo nombolosakon ia binau tomundo.

²³Pande hondo na i Rehabeam nombee'i pangkat to ana-anaknyo momo'ane ka' nompokalajamo aha i iwi-iwi' na kota' anu ko bentengnyomo i songko-songko na da'erah Yehuda ka' Benyamin. Ia nombagiimo aha anu o kaan manjoo' hondo, ka' nontoukaimo anu bau bengkele' nu aha suele manjoo' hondo.