Read Saluan 2 TAWARIKH 14 Bible Online

2 TAWARIKH 14 - Saluan bible

2 TAWARIKH 14

¹Salatan sinilakamo na i Tomundo Abia ka' i lamunmo i pinolamunan to tomu-tomundo i kota' Daud, i Asa anaknyo momo'ane na i hangkatmo binau tomundo pinombolosi ia. Tempo'nyo i Asa nompalentah lipu' nu Yehuda madi'mo ko anu lewa' mamba mae mompahampateakon, sinampulu' na taun na kinopinnyo.

²I Asa saja' momposanang kinyonyoa nu Tumpu Allah-nyo, kalana ia saja' mombau anu ma'ima' ka' saja' adin.

³Pinaha alinannyomo iwi-iwi' na mezbah nu bansa sangga'at ka' iwi-iwi' na tampat ponsomban pilogot. Anu lewa' ototon pontandai pilogot pinaha ideannyomo, ka' to pato-patong nu pilogot Boune Asyera tinua'akonnyomo.

⁴Mian da'isan nu aha Yehuda lewa'mo pinoto'inyo da tumuu' mombatuki pongka'oho' nu Tumpu, Tumpu Allah nu mompolee' nu aha, ka' tulu-tulutan hondo i pangajalan ka' palentah-Nyo iwi-iwi'.

⁵Iwi-iwi' na tampat ponsomban pilogot ka'tampat pompapuan kamangian anu i uno nu iwi-iwi' na kota Yehuda pinaha alinanyomo. Sahingga madi'mo lewa' ko anu mompoposia kalaja'annyo aijo', tempo'nyo ia na nompalentah.

⁶Sahingga ia noko alamo nombau benteng i kota Yehuda iwi-iwi'. Pa' sinagkuka na taun na kinopinnyo madi'mo toho' nahampate kalana binee'anmo nu Tumpu kadamean hi ia.

⁷I Asa nompoto'imo hi mian da'isan nu aha Yehuda, “Sahanyo kota' to iwi-iwi' opaha paganmo nu mesen tiku-tikup da mahoson ka' obauimo laigan toto tangka-tangkas, ka' sabatannyo anu toto daka-daka' ka' opokonai supatnyo anu mahoson hondo. Kita nongkuasaimo lipu' aiya kalana kita nontulutimo pongka'oho' nu Tumpu Allah anu osombah-nto. Ia nompotuu'mo kita ka' nonjagaimo da madi'mo ko anu mompoposia mae lipu'to aiya songko-songko.” Sahingga aha nontampu'unimo nombau ka' nompomingkotmo kalaja aijo' mai-ma'ima'.

⁸Suludadu i Tomundo Asa aha 300.000 na mian nu Yehuda anu ko toongon kanta ka' talombo', ka' aha 280.000 na mian nu Benyamin anu ko toongon kanta, pana' ka' hihisnyo. Aha iwi-iwi' to sulu-suludadu anu toto babaani ka' anu pinogulu'mo ima-ima'.

⁹Daagi' kino minsan samian na aha bansa Sudan sanggonyo i Zerah nontumbuhimo Yehuda, gombuan nu suludadunyo 1.000.000 na mian, ka' 300 na kareta anu bau pahampate. Aha tinokamo mae i Meresa.

¹⁰Sahingga nambamo na i Asa nongahopi i Zerah, ka' ua'aha aijo' bubu'mo nongatun suludadu nu aha i Bangka'nyo nu Zefata koko Meresa.

¹¹Lantas i Asa binalado'amo hi Tumpu Allah-nyo, “O Tumpu, olamo belento na timbali montulungi mian anu madi' mahoson mongewa anu mahoson. Tulungi mae na kami uuka aiya, O Tumpu Allah mami! Samata-mata olamo hi belento na patisehan mami, ka' hi sanggo nu Belento na kami nambamo mahampate mongewa gombuan nu suludadu anu manjoo' hondo aiya. O Tumpu belentomo na Tumpu Allah mami. Boli opobee' na butong nu Belento nu patundu'mo nu samian na manusia.”

¹²Lantas i Asa ka' suludadu nu aha Yehuda nontumbuhi suludadu nu aha Sudan. I hungku'anmo nu Tumpu na suludadu nu aha Sudan, sahingga aha nopalaimo.

¹³I Asa ka' suludadunyo nololoi'mo aha tinoka-toka i Gerar. Aha suludadu nu Sudan manjoo' hondo na anu sinilakamo sahingga suludadu nu aha madi'mo noko ala gawe kalana i hopu'an mo nu Tumpu, ka' suludadu nu Yehuda lewa'mo nompahuhuakon manjoo' hondo na to bala-balang nu aha. Lapas aijo' suludadu nu aha Yehuda lewa'mo nongidei kota' iwi-iwi' i da'erah songko-songko Gerar, kalana pinotimbalimo nu Tumpu na mian anu jojoong i kiijo' nabuhukmo. Suludadu nu aha Yehuda lewa'mo nompahuhuakon isi nu kota haha aijo', ka' manjoo' hondo na balang i humpak nu aha.

¹⁵Aha mule' nontumbuhimo kemah nu to mia-mian anu ko potuu'on ka' binoamo nu aha na domba ka' unta manjoo' hondo. Lapas aijo' aha ninsusule'mo i Yerusalem