Read Saluan 2 TAWARIKH 15 Bible Online

2 TAWARIKH 15 - Saluan bible

2 TAWARIKH 15

¹Roh nu Tumpu Allah nongkuasaimo i Nabi Azarya anak i Obed,

²Sahingga ia nambamo hi Tomundo' Asa, ka' notatae, “Belento o Tomundo' Asa tiba iwi-iwi' mian anu jojoong i Yehuda tiba mule' Benyamin' potombihing mae! Tumpu ohani hi belento de belento ohani hi Ia. De belemiu momoita pokinde' hi Tumpu, tantu nu bee'imo. Panyo de belemiu madi' montapali Ia, Ia mule' ahi' madi' suele montapali belemiu.

³Pininmo hondo na Israel madi' tinulu-tulutan hi Tumpu Allah anu totu'u, madi'mo ko atulan anu tionyo ahi' o tuluti ka' madi'mo ko to ima-imam anu mompotiju' aha.

⁴Panyo salatan aha nu tokaimo nu kasusa' ana ha momoitamo tulung hi Tumpu Allah Israel. Aha momoitamo pokinde'-Nyo, ka' nu bee'imo ahi' pokinde'.

⁵Tempo'nyo aijo' mian madi'mo sanang na mamba moyaya kalana i sinin na lipu' saja'mo sida na pahampatean.

⁶Bansa sangga'at monsakisamo bansa sangga'at, kalana pinotokamo nu Tumpu na pahampatean anu sidamo hondo hi aha.

⁷Panyo belemiu tionyo ahi' saban na kinyonyoa ka' baani ahi'. Apaa na anu nu usahakon aijo' mingkaliangan.”

⁸Salatan i hongomo i Asa na potatae i Azarya anak i Obed aijo', binaanimo na kinyonyoanyo, pinaha alinnyomo na bapilogotan anu aijo' i lipu' Yehuda, ka' Benyamin tiba anu kiijo' i to kota-kota' anu pinatundu'nyomo anu aita' mae i bungkutnyo nu Efraim. Lantas pinoko ima'annyomo na mezbah nu Tumpu anu kiijo' i popasan nu Laigan nu Tumpu.

⁹Manjoo' na mian nu aha Efraim, Menase, ka' Simeon, naninggalumo hi Asa, ka' jinojoongmo i da'erah kalaja'anyo kalana tinoamo nu aha na Tumpu montulungi ia. I Asa nompalentahmo mian haha aijo' iwi-iwi' tiba aha mian da'isan nu Yehuda ka' Benyamin,

¹⁰da sihuk i Yerusalem. Sahingga sinihukmo na aha i bitu'on ko totolu'nyo, i taun ko sampulu'nyomo ka' olima' na i Asa nompalentah.

¹¹Sinaa aijo' aha nonsombahkonmo koloban hi Tumpu 700 na sapi' ka' 7.000 na domba anu i humpak pinahuhuakon mae nu aha namba nahampate.

¹²Aha binalajanji'mo hi Tumpu, koonyo nu aha, aha totu-totu'u mo na kinyonyoa tumuu' mombatuki pongka'oho' nu Tumpu. Tumpu Allah nu mompolee' nu aha.

¹³Maumo pa' ihe anu tu'anyomo kabai anu ma'isa tu'anyo to momo'ane kabai to bou-boune anu madi' tumuu' mombatuki pongka'oho' nu Tumpu tionyo ahi' ohukumo opatei.

¹⁴Notataemo na aha daka-daka' binasumpa' hi Tumpu koonyo nu aha nu toongimo nu aha dodo-dodo na janji' aijo'. Lapas aijo' aha lewa'mo nolo'ais ka' lewa'mo nompuuhi tolompet.

¹⁵Iwi-iwi' na aha mian da'isan Yehuda ilame'mo kalana aha binasumpa'mo totu-totu'u na kinyonyoa. Sinanangmo na aha monsombah Tumpu, ka' Tumpu mule' nontalimamo aha. Pino'ima'-Nyomo na ka'ada'an sahingga madi'mo ko anu lewa' mae mompoposia i da'erah nu aha.

¹⁶Lantas pinobelentinyomo na kele'nyo i Maakha da madi'mo bapangkat salaku Totina anu mombee'i sonto', kalana ia nombaumo patong nu pilogot anu masala' bau pongadati pilogot boune Asyera, anu mompolumba' sosu'anon. I hobo'akonmo i Asa ka' ingideannyomo na patong aijo' ka' pinapuannyomo i Bangka'nyo Kidron.

¹⁷Maumo madi' ingko-ingkot na tampat ponsomban pilogot i lipu' aijo' ingidean i Asa, panyo ia tataap tinulu-tulutanmo hi Tumpu i uno nu kantumuu'annyo.

¹⁸Iwi-iwi' na mosoni' ka' salaka ka' mule' balang sangga'at anu i humpak pinahuhuakon i pahampatean anu nu tuumanyo ka' mule' anunyo suele pino una'nyomo i Laigan nu Tumpu da baumo anu nu Tumpu.

¹⁹Sampe tinoka i taun kinotolumpulu'nyomo ka' olima' na i Asa nompalentah madi'mo toho' kino anu lewa' mae nompahampateakon i lipu' aijo'.