Read Saluan 2 TAWARIKH 16 Bible Online

2 TAWARIKH 16 - Saluan bible

2 TAWARIKH 16

¹I taun ko tolumpulu'nyomo ka' anom na i Tomundo Asa nompalentah Yehuda, i Baesa tomundo nu aha Israel nontumbuhimo Yehuda ka' nonjagaimo hoso-hoson kota Rama da madi'mo ko kajalanan mosabat ka' minsoop i da'erah Yehuda.

²Jadi i Tomundo Asa nongalamo mosoni' ka' salaka anu kiijo' pino una' i Laigan nu Tumpu ka' i laigan nu tomundo, lantas pinakatunyomo binoa i Damsyik hi Benhadad tomundo nu Siria ka' pinotunnyomo sumo uuka,

³“Imbo' da kita mompaha bela' susumo anu binaumo nu to tu'a-tu'anyo nu beleyum ka' to tu'a-tu'anyo nu belengku. Aiya pinakatungkumo na mosoni', ka' salaka salaku bau palasen, ka' nongendei belento Tuan da bolimo mompahasumbu' tiba i Baesa tomundo nu aha Israel da ia po'ule'mo monsule'akon gombuan nu suludadunyo aiya i da'erangku.”

⁴I Bengadad setuju i sale' aijo' lantas nonsaimo to sulu-suludadu nyo anu toto tangka-tangkas na pangkatnyo hingga-hinggat tiba suludadu nu aha da mambamo montumbuhi to kota-kota nu Israel. Aha nompatundu'mo kota Iyon, Dan, Abel-Bet-Maakha ka' iwi-iwi' na kota' anu pompo'una'an anu o kaan kiijo' mae i Naftali.

⁵Salatan i hongomo i Baesa na lele aijo' ia madi'mo nonjagai hoso-hoson kota' Rama panyo pinala'iannyomo na kota' aijo'.

⁶Lantas i Tomundo Asa nontipaha'imo to mia-mian songko-songko i da'erah Yehuda da mamba mongato batu ka' kau' anu pinake i Baesa i kota Rama pinompohosonnyo kota aijo'. Batu ka' kau' haha aijo' pinakemo i Asa pinompohosonnyo kota Geba ka' Mizpa.

⁷Tempo'nyo aitu i Nabi Hanani tinokamo hi Tomundo Asa ka' nompoto'i, “Kalana beleyum taha'imanmo hi tomundo Siria, ka' misa'mo hi Tumpu Allah nu beleyum. Jadi beleyum madi'mo moko ala mompatundu' suludadu nu Israel.

⁸Te kinolilimanmo na Sudan ka' Libia anu manjoo' hondo na suludadunyo ka' manjoo' na karetanyo anu bau pahampate ka' suludadunyo anu monsake'i ajahan? Panyo maumo sumo aijo' Tumpu nombee'i ka'untungan nahampate na belemiu nompatundu' aha, kalana beleyum samata-mata taha'iman hi Ia.

⁹Tumpu na montoa songko-songko na dunia ka' mombee'i kahosonan kona hi to mia-mian anu tulu-tulutan hi ia. Beleyum nombaumo apa-apaa anu sala', kalana aijo' otampu'uni uuka aiya beleyum saja'mo monta'up pahampatean.”

¹⁰Potatae i Nabi Hanani aijo' nonsaduakonmo da i Asa pinusamo hondo, sahingga pinosoopnyomo na nabi aijo' i uno nu talungku'. Tempo'nyo aitu suele nonsakisamo na i Asa pa' aha sangkuka na miannyo anu nu palentah.

¹¹Iwi-iwi' apaa na anu tinimbalimo tempo'nyo i Asa nompalentah lengkat pe'e momonanyo sampe ia madi'mo nompalentah tinulismo i uno nu kitab Sisikon nu To tomu-tomundo Yehuda ka' Israel.

¹²I taun kino tolumpulu'nyomo ka' osio' na i Asa nompalentah ia kinonamo nu panyakit anu mahan hondo i tengkenyo ua-uambiha'. Maumo sumo aijo' ia madi'mo nomoita tulung hi Tumpu, panyo ola ahi' hi dokoten.

¹³Salatan ingohua'mo na taun ia sinilakamo.

¹⁴Bangke'nyo pinokonan pakuli' to lampa-lampa na binau, ka' anu toto noho-nohong, lantas i lamunmo i pinolamunan to tomu-tomundo i kota' Daud. Ka' salaku binau pongadati ia, mian da'isan nontambunmo kau' manjoo' hondo ka' pinapuan, sahingga moaknyo daka' hondo.