Read Saluan 2 TAWARIKH 17 Bible Online

2 TAWARIKH 17 - Saluan bible

2 TAWARIKH 17

¹I Yosafat tinimbalimo tomundo nu aha Yehuda nombolosakonmo tuumanyo i Asa, ka' ia binala'usahamo da mahoson na mongewa Israel.

²Ia nompaha pojoongmo suludadu i iwi-iwi' na kota' anu ko bentengnyo i da'erah Yehuda ka' i to kota-kota' anu i sambiha' nu kota Yehuda, ka' mule' i to kota-kota' anu ingalamo nu tuumanyo i da'erah Efraim.

³Tumpu nombalakatimo i Yosafat kalana apaa na anu binaumo nu tuumanyo aijo'mo na binaunyo; ia madi' monsombah Baal,

⁴panyo monsombah Tumpu Allah. Ia montuluti iwi-iwi palentah nu Tumpu Allah, ka' kantumuu'annyo madi' sumo to tomu-tomundo nu Israel.

⁵Tumpu nombalakatimo i Yosafat sahingga nahosonmo na ia salaku tomundo i Yehuda. Iwi-iwi' na mian da'isan nombee'imo palasen hi ia sahingga ia kinayamo ka' ingangga'anmo nu mian.

⁶Daka-daka' hondo na kinyonyoanyo montuluti palentah nu Tumpu ka' nongideimo tampat ponsomban pilogot ka' iwi-iwi' na patong Pilogot Boune Asyera kiijo' i Yehuda.

⁷I taun kototolu'nyomo na ia nompalentah, ia nompalentahmo to mia-mian anu ko pangkatnyo matangkas da mompogulu' to atu-atulan nu Tumpu hi songko-songko na kota Yehuda. Aha aijo'mo: i Berhail, i Obaja, i Zakharia, i Netaneel ka' i Mikha.

⁸Aha sinangaluan nu mian Lewi aha osio', ka' ua'aha na imam. Mian nu Lewi haha aijo' aijo'mo, i Semaya, i Netanya, i Zebaya, i Asael, i Semirabot, i Yonatan, i Adonia, i Tobia, tiba i Tob-Adonia. Ua'aha na imam aijo', aijo'mo: i Elisama, tiba i Yoram.

⁹Aha namba noyaya nomboamo kitab Atula nu Tumpu nu aha, binoa i iwi-iwi' na kota i da'erah Yehuda ka' nompogulu'mo mian da'isan kiijo' mae.

¹⁰Binaumo nu Tumpu na kalaja'an iwi-iwi' anu mompaha'ohani Yehuda da nabuhukmo na mahampate mongewa i Tomundo Yosafat.

¹¹Lengkat mae hi aha mian nu Filistin ia nohumpakmo manjoo' hondo na salaka ka' palasen sangga'at, ka' anu lengkat mae hi aha mian nu Arab 7.700 na domba ka' 7.700 na mee'.

¹²Sumo aijo' na i Yosafat sansinaa toka sansinaa mompaka pintuangmo na kakuasa'annyo. I songko-songko na Yehuda pinaha bauannyomo benteng ka' to kota-kota' ponguna'an anu o kaan.

¹³Tinambunnyomo na anu o kaan manjoo' hondo i kota haha aijo'. I Yerusalem pinojoongnyomo na to sulu-suludadu anu toto tangka-tangkas na pangkatnyo ka' to babaani,

¹⁴toto samian ko posi to sulu-suludadunyo anu ingala mae i sa'angu' na tulunan nu aha sa'anakan. I Adna talenga' nu suludadu anu lengkat mae hi aha sa'anakan tulunan i Yehuda. Ia mongkapalai aha 300.000 na suludadu.

¹⁵Ko ohua'nyo i Yohanan; ia mongkapalai aha 280.000 na suludadu.

¹⁶Ko totolu'nyo i Amazia anak i Zikri; ia mongkapalai aha 200.000 na suludadu. (I Amazia mian anu ola montulu-tulungi panyo palesaya hi Tumpu.)

¹⁷Anu mongkapalai aha mae sa'anakan to tulu-tulunan mae nu bansa Benyamin aijo'mo, i Elyada, suludadu anu baani hondo. Ia mongkapalai 200.000 na suludadu, iwi-iwi' ko pana' ka' kanta,

¹⁸ko ohua'nyo aijo'mo i Yosabad; ia mongkapalai aha 180.000 na suludadu ka' iwi-iwi' na aha ko toongon bau pahampate.

¹⁹Ahamo na binee'an kalaja jojoong i Yerusalem. Ka' mule' i tomundo nompojoongmo to sulu-suludadu sangga'at i benteng haha aijo' anu i da'erah Yehuda.