Read Saluan 2 TAWARIKH 20 Bible Online

2 TAWARIKH 20 - Saluan bible

2 TAWARIKH 20

¹Madi' pinin ilapas na aijo' suludadu nu Moab ka' Amon, hingga-hinggat tiba anu monsangaja'i aha aijo'mo suludadu nu aha Meunim, nontumbuhimo Yehuda.

²Sahingga tinokamo na anu nomboa mae lele aijo' hi Tomundo Yosafat, “Manjoo' hondo na suludadu nu Edom tinokamo nolengkat mae i Santoa nu Ambai Mate montumbuhimo belento Tomundo. Pinatundu'mo ka' ingalamo nu aha na Hazezon-Tamar.” (Hazezon-Tamar sumo-sumomo En-Gedi, panyo sinanggohanmo nu sanggo sangga'at).

³I Yosafat nabuhukmo lantas ia binalado'amo nompoita pokinde' hi Tumpu. Lapas aijo' pinalentahkonnyomo da iwi-iwi' na mian da'isan bapuasa'.

⁴Toto sa'angu' na kota i da'erah Yehuda, miannyo nambamo i kota Yerusalem momoita tulung hi Tumpu.

⁵Aha hingga-hinggat tiba to mia-mian anu jojoong i Yerusalem sinilimu'mo i popasan nu Laigan nu Tumpu anu sala'je binau. I tomundo Yosafat tinuminjomo i ahop nu aha,

⁶ka' binalado'amo daka-daka' na notatae, “O Tumpu, Tumpu Allah nu mompolee' mami! Belento Tumpu Allah kiita' i suluga' ka' mompalentah iwi-iwi' na bansa i dunia aiya. Daka' hondo na kuasa nu belento, ka' madi' opoko hungku'i; madi' ko mian anu moko ala mongewa belento.

⁷ Belentomo na Tumpu Allah mami. Tempo'nyo mian anu palesayamo hi belento, bansa Israel tinokamo i lipu' aiya, i laa'mo nu Belento na to mia-mian anu tempo'nyo aitu jojoong i aiya. Lantas binee'mo nu Belento na lipu' aiya hi lee' i Abram, bela' nu Belento, da ahamo na tumpunyo sampe toka sidu-sidutu'.

⁸Aha jinojoongmo aiya ka' nombaumo sa'angu' na laigan bau ponsomban belento. Nusumbu' nu aha,

⁹tukoonyo de aha o hukumo kalana aha nombaumo dosa', ka' aha nupahampateakonmo mae nu mian, panyakit anu molele, kabai kasusa'an i anu o kaan tokamo mae, aha timbali toka hi belento ka' tuminjo i ahop nu laigan ponsomban aiya. Maumo aha i uno nu kasusa'an aha timbali balado'a hi belento, ka' belento mohongo ka' montulungi aha.

¹⁰ Uuka aiya bansa Amon, Moab ka' Edom montumbuhimo mae kami. Tempo'nyo mompolee' mami tinokamo lengkat mae i Mesir, belento madi' mompobee' jojoong i lipu' aiya na bansa haha aijo'. Sahingga mompolee' mami nongala jalan nompolilit madi' nompatei bansa Amon, Moab ka' Edom aijo'.

¹¹Uuka aiya sumo aijo'mo na bansa haha aijo' mombau kami. Aha kahanda'mo molaa' kami da madi'mo jojoong i lipu' aiya anu binee'mo nu Belento hi kami.

¹²Belentomo na Tumpu Allah mami! Hukumo na aha, kalana kami aiya madi' moko ala mongewa suludadu anu talalo hondo manjoo' aijo', anu kahanda'mo montumbuhi mae kami. Madi'mo osumbu' mami pa' mo sia na mombau, kalana aijo' kami toka hi belento momoita tulung.”

¹³Hau-haunyo aijo' to momo'ane nu Yehuda iwi-iwi', hingga-hinggat tiba to bengke-bengkele' nu aha ka' to ana-anak nu aha tinuminjomo koko Laigan nu Tumpu.

¹⁴I totonga' nu mian da'isan haha aijo' daagi' ko samian na mian nu Lewi sanggonyo i Yahasiel. Ia anak i Zakaria lengkat mae hi aha sa'anakan i Asaf, daagi' mae mongkona lee' i Benaya, i Yeiel, i Matanyo. Tempo'nyo aijo' i Yahaziel kinuasanmo nu Roh nu Tumpu i,

¹⁵ ka' ia nompoto'imo, “Belento Mian Daka' Anu Talasanggo ka' to utu-utus iwi-iwi'. Koonyo nu Tumpu, boli belemiu bata-bata kabai mabuhuk na mongewa suludadu anu da'isan haha aijo'. Kalana anu mahampate misa' belemiu, panyo Tumpu Allah.

¹⁶Dodop salatan aha mindakomo montulu jalan mapindako kiijo' i Zis, tumbuhimo na aha. Belemiu mompahadupamo tiba aha i pusnyo nu bangka'nyo mongahopimo padang mateges koko Yeruel.

¹⁷Belemiu madi' palalu mahampate na mongewa aha saidi' mae. Lako'mo i tampat anu pinotiju'mo hi belemiu ka' tanda'imo i kiijo'. Otoamo nu belemiu na Tumpu mombee'imo ka'untungan mahampate hi belemiu. O mian anu jojoong i Yehuda ka' i Yerusalem, boli bata-bata kabai mabuhuk. Ahoppimo na pahampatean aijo', nutulungimo nu Tumpu na belemiu!”

¹⁸Sahingga tinolodadupumo na i Tomundo Yosafat. Iwi-iwi' na mian da'isan suelemo tinolodadupu susumo ia ka' nonsombahmo Tumpu.

¹⁹Lantas to mia-miannu Lewi aha mae sa'anakan i Kehat, ka' i Korah, tinuminjomo, lewa'mo nontaligalai nompuji' Tumpu, Tumpu Allah Israel.

²⁰Dodododopnyo subu-subu hondo, mian da'isan nosabatmo ka' nambamo i da'erah padang mateges koko Tekoa. Salatan aha kahanda'mo mamba, pinotuunmo i Yosafat sumo uuka hi aha, “O mian da'isan Yehuda ka' Yerusalem! Opalesaya na Tumpu Allah nu belemiu, da belemiu moko ala mongewa. O hongo-hongo na pokinde' nu to nabi-nabi nu belemiu da belemiu mohumpak ka'untungan na mahampate!”

²¹Noko lapas na binasale' tiba mian da'isan, pinoto'imo i tomundo na to mia-mian anu manyanyi da mompusokmo baju' anu pokakana na buhitnyo anu saja' opusok de ko apa-apaa obau anu samata-mata ulusan nu agama. Mian anu manyanyi haha aijo' tionyo ahi tuminjo mojiji' ima-ima' i ahop nu jiji'an nu suludadu ka' manyanyi, “O puji' na Tumpu! Kalibosannyo sampe toka sidu-sidutu' madi' ko kamingkotannyo!”

²²Tempo'nyo anu manyanyi haha aijo' lewa'mo na nyanyi hoso-hoson pinotabuntala'mo nu Tumpu na suludadu nu sampo bali' anu montampu'unimo mae nontumbuhi.

²³Suludadu nu Amon ka' Moab montumbuhimo suludadu nu Edom, ka' nompateimo aha iwi-iwi'. Lapas aijo' aha nompaha pate-pateimo samian ka' samian.

²⁴Salatan suludadu nu Yehuda tinokamo i laigan tangka-tangkas pontanggalakonan kiijo' i padang mateges ka' lewa'mo nompotomatakon pa' iya mae na kajojoongan nu sampo bali', aha nontoamo bangke' notanatamo i tano'. Mau pe'e samian na suludadu nu sampo bali' haha aijo' madi'mo ko anu tinumuu'.

²⁵Sahingga i Yosafat tiba to sulu-suludadunyo nambamo nompahuhuakon to bala-balang nu sampo bali'. Aha nohumpak manjoo' hondo na potu'on, talakonan, pakean, ka' to bala-balang sangga'at anu nahan na olinyo. Tinolunsinaamo na aha nontoluki balang haha aijo', panyo daagi' ahi' ko to bala-balang sangga'at anu ma'isa pinoko tolukan, sahingga pinala'ianmo nu aha.

²⁶Tinoka i sinaa ko ipatonnyomo aha iwi-iwi' sinihukmo i Bangka'nyo Pompuji'an, ka' nompuji'mo Tumpu na aha kalana han apaa na anu binau-Nyomo aijo' iwi-iwi'. Mokonyo aijo' bangka'nyo aijo' sinanggohanmo, “Pompuji'an.”

²⁷Lantas iwi-iwi' na suludadu sinule'akonmo i Yosafat nambamo i Yerusalem, aha ilame'mo kalana Tumpu, nompatundu'mo sampo bali' nu aha.

²⁸Salatan tinokamo i kota', aha nojiji'mo na i lumajang nokiijo' i Laigan nu Tumpu ka' mule' kinuti'mo na kasapi ka' tolompet pinuhanmo.

²⁹Iwi-iwi' na kalaja'an sangga'at nabuhukmo salatan aha nohongomo Tumpu nompatundu'mo iwi-iwi' na sampo bali' nu Israel.

³⁰Mokonyo aijo' madi'mo nabuhuk na i Yosafat nompalentah, ka' binalakatanmo nu Tumpu nu kadamean na ia i songko-songko na lipu'.

³¹I Yosafat tinimbalimo tomundo nu Yehuda umunnyo 35 mo na taun, ka' ia nompalentah Yerusalem 25 na taun na kinopinnyo. Tinanyo i Azuba anak i Silhi.

³²Susumo i Asa tuumanyo, i Yosafat suele nombaumo han anu ma'ima' i mata nu Tumpu.

³³Panyo tampat ponsomban pilogot madi' ingideannyo. Mian da'isan suele ma'isa buke-buke' na kinyonyoa nu aha monsombah Tumpu nu mompolee' mae nu aha.

³⁴Sisikon sangga'at mongkona i Yosafat, lengkat pe'e mae momonanyo sampe ia madi'mo nompalentah tinulismo i Tundulan mongkona i Yehu anak i Hanani anu tinulismo i kitab Sisikon nu to Tomu-tomundo Israel.

³⁵Daagi' kino sansinaan i Yosafat tomundo nu Yehuda nobela'mo tiba i Ahazia tomundo nu Israel, anu nombaumo manjoo' hondo na anu ma'idek.

³⁶I Ezion-Geber labuan nu kapan aha nombaumo kapan da opake mamba i Tarsis.

³⁷Panyo i Nabi Eliezer anak i Dodawa anu lengkat mae i kota' Maresa nompokinde'imo i Yosafat, pinoto'inyo, “Kalana belento Tomundo nobela'mo tiba i Ahazia, jadi nu ideimo nu Tumpu na usaha nu Belento Tomundo.” Sahingga na'idekmo na kapan haha aijo' anu binaunyomo sahingga madi'mo daagi' sinida na namba tinalabut.