Read Saluan 2 TAWARIKH 21 Bible Online

2 TAWARIKH 21 - Saluan bible

2 TAWARIKH 21

¹I Yosafat sinilakamo ka' i lamunmo i tampat pinolamunan to tomu-tomundo kiijo' i kota Daud. I Yehoram anaknyo momo'ane na i hangkat binau tomundo nombolosakon ia.

²I Yehoram anak mo'ane i Yosafat, tomundo nu aha Yehuda, ko utusnyo to momo'ane: i Azarya, i Yehiel, i Zakharia, i Azariahu, i Mikhael, tiba i Sefaca.

³Aha nohumpak manjoo' hondo na mosoni', salaka ka' to bala-balang sangga'at anu mahan na olinyo anu ingala nu aha hi tuumanyo, ka' suele toto samian binee'an kota' anu ko bentengnyo i da'erah Yehuda. Panyo kalana i Yehoram anak mo'ane anu tumpenyo, ia ahi' na pinoto'i i Yosafat timbali tomundo.

⁴Salatan ingoa'anmo i Yehoram na ia binatomundo sahosonmo, pinalentahkonnyomo na to utu-utusnyo da opatei iwi-iwi', ka' suele to mia-mian pa' aha sangkuka na anu ko pangkatnyo matangkas.

⁵I Yehoram tinimbali tomundo umunnyo 32 mo na taun, ka' ia nompalentah i Yerusalem 8 taun na kinopinnyo.

⁶Ia nontihomo mosia na kantumuu'an i Tomundo Ahab ka' to tomu-tomundo sangga'at nu Israel, kalana ia no'osoamo tiba samian na anak boune i Ahab. Ia binaladosa'mo hi Tumpu,

⁷ panyo Tumpu madi' mongka'oho' mompatei tomundo lee' mae i Daud, kalana ia nojanji'mo, tukoonyo lee' mae i Daud na tataap sabole-bole mompalentah.

⁸ Tempo'nyo i Yehoram nompalentah, Edom nombaumo gau' kasangaja'an anu ma'idek i kalaja'an Yehuda ka' nosi potinjomo kalaja'an.

⁹Kalana aijo' i Yehoram tiba to tale-talenga'nyo, nambamo nonsake'i to kare-kareta nu aha bau pahampate montumbuhimo Edom. Ia tinikumo nu suludadu i Edom, panyo pihi-pihi aha noko alamo nosabat hi aha anu nontiku aijo' lantas aha nopalaimo.

¹⁰Lengkat i sinaa aijo' i Edom madi'mo daagi' tinulut hi Yehuda. Tempo'nyo aijo' suele kota' Libna nombaumo gau' kasangaja'an anu ma'idek. Iwi-iwi' aijo' jinadimo kalana i Yehoram nohikumo Tumpu, Tumpu Allah anu nusombah nu mompolee'nyo.

¹¹Ka' mule' ia nombaumo to pia-piangkuka na tampat ponsomban pilogot i da'erah anu i bungkutnyo nu Yehuda ka' nonsaduakonmo mian da'isan nu Yehuda ka' nonsaduakonmo mian da'isan nu Yehuda Yerusalem binaladosa'mo hi Tumpu.

¹²Lantas i Yehoram nohumpakmo sa'angu' na sulat anu tinulis i Nabi Elia tempo'nyo ia daagi' tutuu'. Sumo uuka na onyi' nu sulat aijo', “O Tumpu, Tumpu Allah anu sinombah i Daud, mohukumo i Tomundo kalana i Tomundo madi'mo nombatuki kalakuan nu tuuma ka' kai' nu Belento Tomundo.

¹³Panyo ola mule' ahi' belento Tomundo tumuu' susumo to tomu-tomundo nu Israel, ka' nonsaduakonmo mian da'isan nu aha Yehuda ka' Yerusalem madi'mo tinu-tulutan hi Tumpu Allah. Belento Tomundo nombaumo apa-apaa susumo i Tomundo Ahab ka' to aha-aha anu nombolosakonmo ia. Ka' mule' to utu-utus nu Belento Tomundo singkapmo pinatean iwi-iwi' nu Belento Tomundo, pada han aha na lebe ma'ima' molingkudui belento tomundo.

¹⁴Hukuman anu maboat hondo lengkat mae hi Tumpu nongkonamo mian da'isan, to ana-anak tiba to bengke-bengkele' nu belento Tomundo, ka' mongideimo iwi-iwi' na halata' nu Belento Tomundo.

¹⁵I Tomundo suele nukonamo nu panyakit usus anu sansinaa toka sansinaa ko boa-boatnyomo!”

¹⁶Tempo'nyo aitu daagi' ko mian nu Filistin ka' mian nu Arab anu jinojoongmo koko kampung kajojoongan nu mian Sudan i da'erah biwi nu ambai. Tumpu nompotimbalimo kinyonyoa nu mian haha aijo' da mompahampateakonmo i Yehoram.

¹⁷Aha nontumbuhimo Yehuda, nompahuhuakonmo isi nu laigan nu tomundo, lantas i hakopmo ka' binoamo nu aha iwi-iwi' na anak ka' bengkele' i Yehoram, me i Ahazia anaknyo momo'ane anu tampalui'nyo na madi' binoa.

¹⁸Salatan iwi-iwi' aijo' jinadimo, Tumpu nohukumo i Yehoram nu panyakit usus anu madi'mo na'alin.

¹⁹Nongohanimo ohua' na taun na kinopinnyo na ia kinona nu sakit anu kino pintu-pintuangnyomo ahennyo kalana talalomo sinansala ia sinilakamo. Mian da'isan madi' nontambun kau' manjo-manjoo' ka' pinapuan salaku bau pontandai sinusa'mo kalana koanumo sinilaka, susumo anu saja'mo binau nu aha hi mompolee' nu aha.

²⁰Madi' ko samian anu nonsusuai ia sinilakamo. Ia i lamun kiijo' i kota' Daud, panyo misa' i pinolamunan aha to tomu-tomundo. Tempo'nyo ia tinimbalimo tomundo, umun i Yehoram 32 mo na taun, ka' ia nompalentah i Yerusalem 8 na taun na kinopinnyo.