Read Saluan 2 TAWARIKH 24 Bible Online

2 TAWARIKH 24 - Saluan bible

2 TAWARIKH 24

¹I Yoas umunnyo 7 mo na taun tempo'nyo ia binaumo tomundo nu Yehuda, ka' ia nompalentahmo i Yerusalem pinatompulu' na taun na kinopinnyo. Tinanyo sanggonyo i Zibya mian nu kota Bersyeba.

²Tempo'nyo i Imam Yoyada daagi' tutuu', i Yoas daagi' saja' nombau anu momposanang kinyonyoa nu Tumpu.

³I Yoyada nompile'iakonmo ua'aha na boune da bau bengkele' i Yoas, ka' aha nohumpakmo to ana-anak mo'ane ka' boune.

⁴Salatan nompalentahmo pa' sangkuka na taun na kinopinnyo, i Yoas nontantukanmo da Laigan nu Tumpu opoko'ima'imo.

⁵To ima-imam ka' mian nu Lewi pinalentahnyomo da mamba hi to mia-mian anu jojoong i to kota-kota' Yehuda molimu' doi hi mian iwi-iwi' bau pompoko'ima'i Laigan nu Tumpu, sataun toka sataun. Ia nompokaumo aha da sampa obau na kalaja aijo'.

⁶ Kalana aitu i laganyomo na i Imam Yoyada, polaya' nu aha, ka' pinoto'inyomo, “Te misa' i Musa posaihon nu Tumpu nompokaumo mian da'isan da mombayan hasin bau pongongkosi Kemah nu Tumpu? Uuka aiya kadaka' to mia-mian nu Lewi haha aijo' madi' o sekeli nu Belento Tuuma da molimu' hasin hi mian da'isan i Yehuda ka' i Yerusalem?” (

⁷To mia-mian anu monsangaja'i i Atalya, boune anu ma'i-ma'idek na kinyonyoanyo aijo', nongideimo Laigan nu Tumpu, ka' manjoo' na to bala-balang anu opake monsombah Tumpu Allah pinakemo nu aha monsombah Baal.)

⁸Sahingga pinalentahmo i tomundo da mian nu Lewi mombau kas ise-ise' pongisian doi ka' opo'una' i ahop nu sabatan daka' i Laigan nu Tumpu.

⁹I songko-songko na Yerusalem ka' Yehuda binebakonnyomo da iwi-iwi' na mian tionyo ahi' momboa mae hasin anu obee' hi Tumpu, susumo anu pinoto'imo i Musa tionyo ahi' o bayan.

¹⁰Apaa na anu binebakonnyomo aijo' nomposanangmo kinyonyoa nu mian da'isan ka' mule' to pola-polaya' nu aha. Lame-lame' na aha nongisi doi pombayan hasin nu aha i kas aijo'.

¹¹Sansina-toka sansinaa kas aijo' nuboa nu aha to mia-mian Lewi anu mokalaja hi tomundo da opalesa na kas aijo. De kas aijo' mobuki'mo gulutulis nu Negara ka' anu mowakili i Imam Daka' mongalamo doinyo, lantas kas aijo' po'ule' mule' osule'akon i tampatnyo momona. Sumo aijo' na nubau nu aha sansinaa toka sansinaa ka' manjoo' hondo na doi i humpak.

¹²Lapas aijo' i tomundo ka' i Yoyada nombee'mo doi aijo' hi to mia-mian anu mongkapalai kalaja mompokopiani Laigan nu Tumpu aijo'. Lantas mian haha aijo' nontamboimo tukang batu, tukang kau' ka' tukang tutuk pakakas da mombaumo pakalajaan aijo'.

¹³Sahingga nontampu'unimo na tukang haha aijo' mompokopiani Laigan nu Tumpu aijo'. Aha iwi-iwi' nokalajamo sahingga Laigan aijo' nahosonmo ka' na'ima'mo susumo momonanyo.

¹⁴Salatan kalaja aijo' ningkotmo, mosoni' ka' salaka, labinyo binee'mo hi tomundo ka' hi Yoyada. Lantas mosoni' ka' salaka aijo' anu pinakemo binau to paka-pakakas anu bau kapentingan i Laigan nu Tumpu Allah, umpamanyo: to paka-pakakas anu opake de monsombahmo Tumpu, anu opake i koloban anu opotunu, to lea-lean pompapuan kamangian ka' to mangko-mangko'. Tempo'nyo i Imam Yoyada daagi' tutuu', koloban anu opotunu daagi' tataap osombahkon i Laigan nu Tumpu.

¹⁵I Yoyada umunnyo i nantan ka' salatan ia sinilakamo umunnyo 130 mo na taun.

¹⁶Ia i lamun i pinolamunan to tomu-tomundo i kota' Daud salaku bau pongadati apa-apaa na anu binaunyomo hi Tumpu Allah, hi Laigan nu Tumpu, ka' hi mian Israel anu pinalesayamo hi Tumpu.

¹⁷Salatan i Yoyada sinilakamo, i Yoas sinale'anmo ka' nohongo-hongomo to pola-polaya' nu Yehuda sahingga ia madi'mo nompajuli pangajalan i Yoyada.

¹⁸Sahingga mian da'isan madi'mo nonsombah Tumpu i Laigan nu Tumpu, Tumpu Allah mompolee' nu aha, panyo nonsombahmo pilogot ka' to pato-patong Pilogot boune Asyera. Dosa' nu aha aijo' nonsaduakonmo da Yoyada ka' Yerusalem tinambuha'anmo nu Tumpu.

¹⁹Tumpu nonsaimo to nabi-nabinyo da mompokinde'i aha da po'ule' palesaya hi Tumpu, panyo mian da'isan madi'mo mongka'oho' mompotombihing.

²⁰ Lantas i Zakharia anak i Imam Yoyada kinuasanmo nu Roh nu Tumpu Allah. I Zakharia nokiijo'mo i ahop nu mian da'isan, ka' notatae daka-daka', “Tumpu Allah nompoto'imo, ‘Kadaka' belemiu madi'mo mohongo-hongo apaa na anu ku palentahkon ka' mosi pateimo butong nu belemiu. Belemiu madi'mo mompajuli Aku, sahingga Aku suele madi'mo mompajuli belemiu!’ ”

²¹Panyo mian da'isan sinangaja'mo monggagakon i Zakharia, ka' i Tomundo Yoas suele nosangaja'mo tiba kasangaja'an aijo'. Ia madi'mo nonginau' kanonongan anu binaumo i Yoyada tuuma i Zakharia hi ia. Pinalentahmo i tomundo, sahingga i Zakharia pinahambunu'akonmo nu batu sampe sinilakamo i popasan nu Laigan nu Tumpu. Salatan ia kahanda'mo mompoputus nyawanyo, i Zakharia daagi' notatae, “Ku amalakon da Tumpu montoa mae kalakuan ka' mombalosakon beleyum!”

²³I taunmo aijo' kakona loonumo nu sinaa sangga'at, Suludadu nu Siria tinokamo mae nontumbuhi Yehuda ka' Yerusalem. Pinaha pateanmo nu aha iwi-iwi' na to pola-polaya' ka' manjoo' hondo na balang anu pinahuhuakonmo nu aha ka' binoamo i Damsyik.

²⁴Suludadu nu Siria madi' manjoo', panyo pinojohokmo nu Tumpu na aha da mompatundu' suludadu nu Yehuda anu lebe manjoo' aijo', kalana mian nu Yehuda madi'mo nompajuli Tumpu Allah mompolee' nu aha. Tiba jalan anu sumo aijo' na Tumpu nohukum i Tomundo Yoas.

²⁵I Yoas binelaonmo ka' mahanmo hondo na sakitnyo. Salatan suludadu nu aha sampo bali' ninsusule'mo, ua'aha na anu ko pangkatnyo mokalaja hi ia sinangaja'mo. Pinateanmo nu aha na ia aijo' i kinahoyotannyo, salaku balosnyo ia nompateimo anak i Imam Yoyada. I Tomundo Yoas i lamun i Kota' Daud, panyo misa' i pinolamunan to tomu-tomundo. (

²⁶To mia-mian anu nosangaja' nompatei ia aijo'mo i Zabad anak i Simeat boune nu aha Amon, tiba i Yozabad anak i simrit boune nu aha Moab.)

²⁷Sisikon mongkona to ana-anak i Yoas, ka' mule' mongkona hahan anu madi' ma'ima' hi ia, ka' mosia na ia nompokopianimo Laigan nu Tumpu iwi-iwi' aijo' tinulismo i uno nu Kitab anu nontutuhakonmo Kitab nu to Tomu-tomundo. I Amazia, anak mo'ane i Yoas tinimbalimo tomundo nombolosakon tuumanyo.