Read Saluan 2 TAWARIKH 28 Bible Online

2 TAWARIKH 28 - Saluan bible

2 TAWARIKH 28

¹I Ahas tinimbalimo tomundo tempo'nyo aitu umunnyo 20 mo na taun, ka' ia nompalentahmo i Yerusalem 16 na taun na kinopinnyo. Ia madi' montiho' sonto' anu ma'ima' hi Tomundo Daud, mompolee'nyo mae, panyo nombaumo anu madi' momposanang kinyonyoa nu Tumpu.

²Ia tinumuu'mo susumo to tomu-tomundo nu aha Israel ka' nompalentahmo mian da mombau to pato-patong nu Baal tambaga na o tutuk,

³ka' mompapui kamangian i bangka'nyo nu Himon. Ka' mule' posi anaknyo momo'ane sinombahkonnyomo binau koloban hi pilogot, susumo kabiasa'an anu ma'idek anu saja'mo nubau nu to mia-mian anu i laa'mo nu Tumpu da bolimo jojoong i lipu' Kana'an tempo'nyo mian nu Israel ninsoopmo i lipu' aijo'.

⁴I Ahas nonsombahkonmo koloban ka' nompapui kamangian i tampat anu lewa' ponsombaan pilogot aita' mae i to bungku-bungkutnyo ka' i patu nu to kau-kau' anu toto' tambo-tambok na honnyo.

⁵ Kalana i Tomundo Ahas binaladosa'mo, Tumpu Allah-nyo nompojohokmo ia da pinatundu' nu tomundo Siria anu suele nomboamo mian nu Yehuda manjoo' hondo salaku mian anu i hakop ka' binoa i Damsyik. Tumpu mule' nompojohokmo ia da pinatundu' i Tomundo Pekah anak i Remalya mian nu Israel, anu nompateimo sinansinaa aha 120.000 na suludadu nu aha Yehuda anu toto babaani. Tumpu Allah mompolee' nu aha nompojohokmo iwi-iwi' aijo' da jinadi kalana mian da'isan nu aha Yehuda madi'mo nontapali Tumpu.

⁷Anak i Ahas momo'ane sanggonyo i Maaseya pinateanmo i Zikri suludadu nu Israel anu matangkas na pangkatnyo. I Zikri mule' nompateimo i Azrikam anu mongulus laigan nu tomundo tiba i Elkana wakin i tomundo'.

⁸Maumo to mia-mian nu Yehuda sa'a-sa'angu'mo na bansa tiba bansa Israel, panyo suludadu nu Israel nohakopmo aha 200.000 na to bou-boune ka' to ana-anak, ka' binoamo nu aha i Samaria tiba balang manjoo' hondo na anu pinahuhuakonmo nu aha.

⁹Samian na nabi nu Tumpu sanggonyo i Obed jojoong i kota' Samaria. Tempo'nyo suludadu nu Israel ninsusule'mo mae ka' nomboamo mae aha mian nu Yehuda anu i hakop, i Obed nonsingkabotimo aha salatan aha ninsoopmo i kota'. Ia notatae, “Belemiu nompatundu'mo mian nu Yehuda kalana Tumpu Allah mompolee' nu belemiu nontambuha'imo aha. Panyo Tumpu nohongomo mosia na belemiu nonsansalaimo ka' nompateimo suludadu nu Yehuda haha aijo'.

¹⁰Ka' uuka aiya to mia-mian nu Yerusalem ka' Yehuda kahanda'mo obau nu belemiu botuan! Madi' osumbu' nu belemiu saba' belemiu suele binaladosa'mo hi Tumpu Allah nu belemiu?

¹¹Potombihing mae! To mia-mian anu i hakopmo mae aiya, to utu-utus nu belemiu. Jadi saimo na aha minsusule'. De madi' nutambuha'imo nu Tumpu ka' nu hukumo na belemiu.”

¹²Aha opat na to mia-mian pande nu aha Israel, aijo'mo i Azarya, anak i Yohanan, i Berekya anak i Mesilemot, i Yehizkia anak i Salum, tiba i Amasa anak i Hadlai, suele madi' situju i apaa na anu binaumo nu suludadu anu ninsusule'mo mae aijo'.

¹³Koonyo nu aha, “Boli oboa mae na to mia-mian anu i hakopmo aijo'! Kita binaladosa'mo hi Tumpu, ka' dosa' to haha aijo' talalomo hondo nanjoo' pantasmo na o hukum. Aiya belemiu mombaumo mule' sa'angu' na han anu ola mompaka tuangi kasala'anto.”

¹⁴Sahingga mian anu i hakop mae haha aijo' binoamo nu suludadu haha aijo' ka' mule' to bala-balang anu pinahuhuakon mae nu aha binoamo hi mian da'isan ka' hi to kapa-kapala nu aha.

¹⁵Lantas aha opat na to mia-mian pande haha aijo' nongulusmo anu i hakopmo mae aijo'. Pinaha bagi-bagianmo nu aha baju' anu pinahuhuakon mae nu aha aijo' hi to mia-mian anu i hakop mae aijo', iya na anu palalu mohumpak bagi. Ka' mule' aha pinaha bagi-bagian sapatu, anu o kaan, ka' anu o inum. To mia-mian anu binelaonmo pinakuli'an nu lanya' zaitun. Anu madi'mo moko ala lumajang pinosake' i keledai lantas iwi-iwi' na mian anu i hakop aijo' binoamo i Yerikho, kota anu manjoo' hondo na kau' kurma, da moko ala minsusule' i kampung nu aha Yehuda. Lapas aijo' mian nu Israel ninsusule'mo i Samaria.

¹⁶To mia-mian nu Edom nontumbuhi mule' Yehuda ka' nohakopmo mae manjoo' hondo na mian. Kalana aijo' i Tomundo Ahas nonsale'imo i Tiglat-Pileser, tomundo nu Asyur da monsai mae suludadu montulungi ia.

¹⁸Tempo'nyo aitu mule' mian nu Filistin nontumbuhimo to kota-kota i da'erah anu i tengkenyo nu bungkutnyo sasu kinsoban ka' i da'erah sasu selatan Yehuda. Aha nongkuasaimo kota' Bet-Semes, Ayalon, ka' Gederot, tiba kota' Sokho, Timna ka' Gomzo ka' mule' kampung toto ise-ise' anu mompaha ohani kota' totolu' haha aijo', lantas jinojoongmo i kiijo'.

¹⁹Kalana tomundo nu Yehuda i Ahas nohikumo Tumpu, ka' madi'mo nompalentah mian da'isan susumo anu pantas ahi' nu bau, sahingga Tumpu nompotokamo mae kakuasa'an i Yehuda.

²⁰I Tomundo Asyur tinoka mae misa' da montulungi i Ahas, panyo ola mule' ahi' nomposusa' ia.

²¹Ingalamo i Ahas na mosoni' anu i Laigan nu Tumpu, anu i laigan nu tomundo, ka' i laigan nu to pola-polaya' nu mian da'isan, lantas binee'nyomo hi tomundo Asyur, panyo aijo' mule' madi' ahi' kinogunanyo hi ia.

²²I uno nu han anu talalomo hondo sinusa' aijo', i Ahas ola mule' ahi' nompaka baladosa'mo hi Tumpu.

²³Ia nosi silakaimo butongnyo ka' miannyo kalana nonsombahkonmo koloban hi to pilo-pilogot nu aha mian Siria anu nompatundu'mo ia. Ia binapikin, “To pilo-pilogot nu Siria nontulungimo to tomu-tomundo' nu Siria, jadi de aku nonsombahkon koloban hi aha, tantu nutulungimo nu aha na aku.”

²⁴Lantas ingalanyomo na pakakas iwi-iwi' i Laigan nu Tumpu ka' ingideannyomo. Lantas tinumbannyomo na Laigan nu Tumpu, ka' ia nombau to mezbah-mezbah i songko-songko na Yerusalem.

²⁵I batu-batu kota' ka kampung toto ise-ise' hi aha Yehuda ia nombaumo tampat anu lewa' ponsomban pilogot ka' pompapuian kamangian anu osombahkon hi to pilo-pilogot nu bansa sangga'at. Kalana ia nombaumo anu sumo aijo', sahingga Tumpu, Tumpu Allah nu mompolee'nyo nontambuha'imo ia.

²⁶Sisikon sangga'at mongkona mosia na ia nompalentah ka' iwi-iwi' na anu binaunyomo lengkat pe'e mae momonanyo sampe ia madi'mo nompalentah tinulismo i kitab Sisikon nu to Tomu-tomundo Yehuda ka' Israel.

²⁷ I Ahas sinilakamo ka' i lamunmo i Yerusalem, panyo misa' i pinolamunan to tomu-tomundo'. I Hizkia anaknyo momo'ane na tinimbalimo tomundo nombolosakon ia.