Read Saluan 2 TAWARIKH 3 Bible Online

2 TAWARIKH 3 - Saluan bible

2 TAWARIKH 3

¹ I Tomundo Daud nontantukan tukoonyo Laigan nu Tumpu tionyomo ahi' obau i Yerusalem, i Bungkutnyo nu Moria i tampat pongututan gandum anu i Arauna mian nu Yebus. Mombau Laigan nu Tumpu aijo' tinampu'unanmo i Tomundo Salomo.

²I bitu'on ko ohua'nyo taun ko opatnyomo na ia nompalentah.

³Ko mantannyo nu Laigan aijo' 27 na meten ka' ko bolanyo 9 na meten.

⁴Salipi'nyo sasu ahopnyo ko mantannyo pokakanamo tiba ko bolanyo nu laigan aijo', 9 na meten. Ko tangkasnyo 54 meten. Unonyo nu salipi' aijo' i lapisan nu mosoni' anu ko galo'nyo.

⁵Salipi'nyo anu lebe o'angga'i pinokonan dopi' kau' lontio' anu ma'ima' hondo ka' i lapisan nu mosoni' anu talalo hondo joliotan. Mosoni' anu pinolapisi aijo' binoti-botikan nu gambalan kau' palem ka' gambalan nu lante'.

⁶I Tomundo nombunga-bungai laigan aijo' nu batu mainan anu toto ima-ima' ka' mosoni' anu namba ingala i lipu' Parwaim.

⁷Ia suele nolapisi nu mosoni' pimpi' mesen nu Laigan nu Tumpu aijo', suele to bala-balaknyo, iwi-iwi' na tumban ka' aita i buannyo nu tumban, suele i lapisan. Iwi-iwi' na pimpi' mesen binotibotikan nu gambalan malaekat.

⁸ Salipi'nyo anu osanggohi Salipi'nyo anu Talalo hondo Susi', ko mantannyo 9 na meten ka' ko bolanyo 9 suele na meten, pokakana sumo ko bolanyo nu Laigan nu Tumpu aijo'. Uwampulu' na ton na mosoni' pinake pinolapisi pimpi' mesen iwi-iwi' i Salipi'nyo anu Talalo hondo Susi' aijo',

⁹ka' mosoni' 570 na gram anu obau paku'. Pimpi' mesen i salipi' iwi-iwi' anu aita' mae i buannyo i lapisan suele nu mosoni'.

¹⁰ I Tomundo nompokau mule' to mia-mian anu mokalaja da mombau ohua' na patong malaekat salaka kabai tambaga. Patong haha aijo' olapisi nu mosoni' ka' opotinjo mompaha ohani i uno nu Salipi' anu Talalo hondo Susi' mongahopi sabatan. Toto sa'angu' na malaekat aijo' ko polipiknyo ohua' ka' ko mantannyo toto sa'angu' 2,2 meten. Polipiknyo haha aijo' timboka, sahingga pusnyo nu sa'angu' mompaha kabot tiba puusnyo mule' nu sa'angu' na malaekat aijo' i totonga' nu salipi' ka' puusnyo sangga'at montoka pimpi' mesen i kowi ka' koanan. Jadi polipiknyo haha aijo' timboka 9 na meten na ko mantannyo sumo ko bolaa nu salipi' aijo'.

¹⁴ I Salipi' anu Talalo hondo Susi' pinokonan lalanse' hude lenan, ka' hude sangga'at buhitnyo mobilu', mingkamumu' ka' momea'. Lalanse' aijo' binunga-bungan nu gambalan malaekat.

¹⁵I Tomundo nombau ohua' na ohi' ko tangkasnyo toto sa'angu' 15,5 na meten, lantas pinotinjonyo i ahop nu Laigan nu Tumpu. Toto sa'angu' na ohi' haha aijo' pinokonan dompongnyo aita' i tuu'nyo, ko tangkasnyo 2,2 na meten.

¹⁶Tuu'nyo nu ohi' haha aijo' pino'ima' hondo nu bunga-bunga, tambaga na binau sumo lante inganyam ka' ko mantannyo binau sumo bua' nu dalima 100 na batuannyo.

¹⁷Ohi' haha aijo' pinaha potinjo kowi ka' koanan i sabatan pinsoopan aijo' i Laigan nu Tumpu; anu sasu selatan sinanggohan Yakhin, ka' anu sasu utara sinanggohan Boas.