Read Saluan 2 TAWARIKH 31 Bible Online

2 TAWARIKH 31 - Saluan bible

2 TAWARIKH 31

¹Salatan lamean ilapasmo, mian da'isan iwi-iwi' nambamo i batu-batu kota' nu Yehuda lantas nohobo'akonmo tugu nu pilogot, mompahahobo'akon, iwi-iwi' na patong anu pinotinjo ponsombaan Pilogot boune Asyera, ka' nongideimo iwi-iwi' na mezbah ka' tampat anu lewa' ponsomban pilogot. Sumo aijo' mule' na aha nombau tampat sangga'at i da'erah Yehuda, ka' suele i da'erah Benyamin, Efraim ka' Manasye. Lapas aijo' aha ninsusule'mo i tampat nu aha toto samian.

²I Tomundo Hizkia po'ule'mo nohangkat gombuan nu to ima-imam ka' mian nu Lewi ka' pinosi bebee'an kalaja na aha. Anu nu kalaja nu aha aijo'mo: monsombahkon koloban anu opotunu, ka' koloban anu bau pompodame, mongatun anu monsombah i Laigan nu Tumpu, ka' mompuji' ka' mule' montalima kase hi Tumpu iyaya mae na tampat anu kiijo' i Laigan nu Tumpu.

³ Binatang, anu i tomundo posi potuu'onnyo binee'nyomo pa' sangkuka na opalalui na okolobanakon anu opotunu de subumo ka' de mamalomo ka' mule' koloban anu osombahkon i sinaa nu Sabat, i lamean molame'akon Bitu'on Bu'ou ka' mule' i lamean anu molame'akon sangga'at susumo anu tinulismo i uno nu kitab atulan nu Tumpu.

⁴ Ka' mule' i tomundo nompalentahmo da mian anu jojoong i Yerusalem momboa mae anu osombahkon, anu tinantukanmo bau bagi nu to ima-imam ka' aha mian nu Lewi, da aha timbali mokalaja totu-totu'u mongatun kalaja i Lagian nu Tumpu susumo anu tinulismo i uno nu atulan nu Tumpu.

⁵Kalana palentah aijo' binebakonmo, mian nu Israel nomboamo mae i Laigan nu Tumpu apa-apaa na anu binee'mo nu aha aijo'mo isi nu ale' nu aha anu momona ingala, aijo'mo: labu, anggur, lanya' nu zaitun, juu' nu uwani', ka' isi nu ale' sangga'at. Ka' mule' aha suele nomboamo mae sambagian anu ingala i sampulu' na bagian na halata' nu aha.

⁶Iwi-iwi' na mian anu jojoong i to kota-kota' nu Yehuda nomboamo mae sambahagian na potuu'on nu aha anu ingala i sampulu' na bagian na sapi', ka' domba nu aha, ka' mule' manjoo' hondo na balang sangga'at lantas sinombahkonmo nu aha iwi-iwi' hi Tumpu Allah nu aha.

⁷Apa-apaa na anu binee'mo nu aha nontampu'unimo mae binoa nu aha i bitu'on kototolu'nyomo ka' sabole-bolemo mae tinoka na aha nomboa sangkutnyo tinoka i bitu'on kopopitu'nyomo.

⁸Salatan tinoamo na konjo'nyo apaa na anu binee'mo nu aha aijo', i Tomundo Hizkia ka' to mia-mian anu ko pangkatnyo nompuji'mo Tumpu ka' nompuji'mo mian da'isan aha mian Israel, mian anu pinalesayamo hi Ia.

⁹Salatan i tomundo nombisalakonmo hi to ima-imam ka' hi mian nu Lewi apa-apaa na anu binee'mo nu mian,

¹⁰I Imam Daka' Asarya lee' mae i Zadok notataemo, “Salatanmo pe'e mian da'isan nomboamo mae anu osombahkon haha aijo' i Laigan nu Tumpu, kami madi'mo kinakulangan i anu o kaan, panyo nolabimo sahingga daagi' manjoo' na kaanon mami anu pinosadia. Iwi-iwi' aijo' i humpak mami kalana binalakatanmo nu Tumpu na mian anu pinalesayamo hi ia.”

¹¹I Tomundo nompalentahmo, sahingga aha nomposadiamo pa' sangkuka na gudang koko Laigan nu Tumpu,

¹²lantas ingisimo nu aha iwi-iwi' apaa na anu binee'mo nu mian ka' sambahagian mule' na anu ingala, i sampulu' na bahagian, iwi-iwi' aijo' pino'isimo i gudang haha aijo'. Aha mian nu Lewi samian sanggonyo i Konanya, binee'an kalaja monjagai, ka' i Simei utusnyo ise' na suele i hangkat montulungi ia.

¹³Aha mule' nongkapalai 10 na mian nu Lewi sangga'at anu binee'an kalaja aijo'mo: i Yehiel, i Azazya, i Nahat, i Asael, i Yerimot, i Yosabad, i Eliel, i Yismakhya, i Mahat, tiba i Benaya. Iwi-iwi' aijo' i hangkat kalana nontuluti apaa na anu pinoto'imo i Tomundo Hizkia ka' i Imam Daka' Azarya.

¹⁴I Kore anak i Yimna, mian nu aha Lewi anu tinimbalimo kapala nu anu monjagai Sabatan Daka' sasu Kabete'an Laigan nu Tumpu, binee'anmo kalaja labot montalima apa-apaa na anu nubee' nu mian anu osombahkon hi Tumpu lantas mombagi-bagiakon.

¹⁵I to kota'-kota' sangga'at anu kajojoongan nu to ima-imam, i Kore nu tulungi nu to mia-mian nu Lewi sangga'at aijo'mo: i Eden, i Minyamin, i Yesua, i Semaya, i Amarya, tiba i Sekhanya. Balang anu o kaan aijo' obagi pokakana hi aha bubuu' tulunan nu aha bansa Lewi, mau anu langkai'mo kabai anu daagi' Olitau otoa i kalaja anu nubau nu aha ka' otoa i gombuan nu aha.

¹⁶Iwi-iwi' na to momo'ane anu umun nu aha tolumpulu'mo na taun mokiita', anu obee'imo kalaja mobolo-bolos sansinaa toka sansinaa i Laigan nu Tumpu, suele obee'i bagian toto samian otoa i kalaja anu nubau nu aha ka' mule' otoa i gombuan nu aha.

¹⁷To ima-imam anu aha sa'anakan mae pinosi daputanakon, ka' mian nu Lewi anu umunnyo 20 mo na taun mokiita' pinosi daputanakon otoa ikalajanyo anu nubau nu aha ka' mule' otoa i gombuan nu aha.

¹⁸Aha iwi-iwi' dinaputanakonmo tiba to ana-anak ka' bengkele' nu aha, ka' mian sangga'at anu daagi' hi aha salaigan, kalana aha suele otuntut sabole-bole mombau kalaja anu tinantukanmo tionyo nubau nu aha anu samata-mata mokalaja anu osombahkon hi Tumpu.

¹⁹Lee' mae i Harun na to ima-imam anu jojoong iyaya mae na kota ka' iyaya mae na padang anu madi' majo'on i kota' haha aijo' binee'anmo kalaja mombagi-bagiakon anu o kaan hi iwi-iwi' na to momo'ane anu minsoop hi auawan nu to ima-imam ka' ka' hi batu-batu mian anu dinaputanakon na tulunan nu aha Lewi.

²⁰I songko-songko na Yehuda, pinojalanmo i Tomundo Hizkia na ka'adilan, ka' kajujunan ka' momposanang kinyonyoa nu Tumpu Allah-nyo.

²¹Apa-apaa na anu tinanga'annyomo obau, pinoko ala nyomo binau kalana kapentingan nu Laigan nu Tumpu ka' mule' montuluti to atu-atulan nu Tumpu, binaunyomo nu kinyonyoa totu-totu'u kalana ia totu-totu'u mongka'ima'i Tumpu Allah-nyo.