Read Saluan 2 TAWARIKH 33 Bible Online

2 TAWARIKH 33 - Saluan bible

2 TAWARIKH 33

¹I Manasye tempo'nyo 12 taunmo na umunnyo ia tinimbalimo tomundo nu Yehuda, ka' ia nompalentahmo Yerusalem 55 na taun na kinopinnyo.

² Ia binaladosa'mo hi Tumpu kalana nombatukimo hahan anu ma'idek anu saja' nubau nu to bansa-bansa sangga'at, anu i laa'mo nu Tumpu bolimo jojoong i Kana'an tempo'nyo mian nu Israel ninsoopmo i lipu' aijo'.

³Tampat bau ponsombaan pilogot anu ingideanmo i Hizkia tuumanyo, po'ule' mule' binaunyo. Ia nombaumo to mezbah-mezbah bau ponsomban Baal, ka' mule' ia nombaumo patong nu Pilogot boune Asyera ka' mule' nonsombahmo mandala'.

⁴ Pinoto'imo nu Tumpu tukoonyo sampe toka sidu-sidutu' Yerusalem aijo'mo na tampat ponsomban Ia. Panyo kiijo' mae i Laigan nu Tumpu aijo', binaumo i Manasye na mezbah bau ponsomban to pilo-pilogot.

⁵Ohu-ohua' na popasan nu laigan nu Tumpu aijo', binaunyomo na mezbah bau ponsombaan mandala'.

⁶To ana-anaknyo sinombahkonnyomo salaku koloban anu opotunu i Bangka'nyo nu Hinom. Ia mule' binasandomo, da monsumbu' alati'nyo nu mandala' pangalahuan, ka' binalatapamo hi to roh-roh anu ma'idek. Ia binala dosa'mo hondo hi Tumpu, sahingga nonsaduakonmo da tinambuha'anmo nu Tumpu.

⁷ Patong nu pilogot pino'una'nyomo i uno nu Laigan nu Tumpu, padahan tampat aijo' polo'mo pinoto'i nu Tumpu Allah hi Daud ka' hi Salomo anaknyo momo'ane, “Laigan-Ku i Yerusalem aiya, anu pinile'an-Kumo hi anu sampulu' ka' ohua' na da'erah tulunan nu aha Israel aijo'mo na tampat anu tinantukanmo bau tampat ponsomban Aku sampe toka sidu-sidutu'.

⁸De mian nu Israel montuluti iwi-iwi' na palentah-ngKu ka montuluti to atu-atulan anu binee'mo i Musa posaihon-Ku aijo' hi aha, saba Aku madi' mompojohok aha olaa' da madi'mo jojoong i lipu' anu binee'kumo hi mompolee' nu aha.”

⁹I Manasye nonsaduakonmo mian da'isan nu Yehuda sahingga nombaumo iwi-iwi na dosa' anu lebe ma'idek nolingkuduimo dosa' anu binaumo nu to bansa-bansa anu i laa'mo nu Tumpu nompala'i Kana'an tempo'nyo mian anu pinalesayamo hi Tumpu nompinsoopimo lipu' aijo'.

¹⁰Tumpu nompisala'imo i Manasye tiba miannyo anu nu palentah, panyo aha madi' mohongo-hongo.

¹¹Mokonyo aijo' pinotokamo mae nu Tumpu na to tale-talenga'nyo nu suludadu nu aha Asyur nontumbuhi Yehuda. I Manasye i hakop nu pongkakait lantas pinungumo ka' binoamo i Babel.

¹²Tempo'nyo ia nonta'upmo kasansalan aijo', ia nongakuimo kasala'annyo hi Tumpu Allah-nyo ka' ia binalado'amo nongkakaasemo da otulungi na ia.

¹³Tumpu Allah nohongomo do'a i Manasye ka' po'ule'mo nonsule'akon ia namba i Yerusalem da po'ule' mule' mompalentah. Kalana apaa na anu jinadimo hi Manasye aijo' sahingga ia pinalesayamo hondo-hondo tukoonyo taalu' memang Tumpu aijo'mo na Tumpu Allah.

¹⁴Lapas aitu i Manasye nompaka potangkasmo pagan mesen anu i bahagian sambiha'nyo sasu kabete'an, Kota Daud. Tinampu'unannyo mae lengkat i sa'angu' na tampat i Bangka'nyo koko mata nu uee Gihon lau-laus namba sasu Utara tinoka-toka i Sabatan Daka' Ikan ka' bahagian kota' anu osanggohi Ofel. Batu-batu kota' anu ko bentengnyo i Yehuda, samian na talenga' na pinojoongnyo.

¹⁵Pinaha alinannyo na to pato-patong nu pilogot anu nu bansa sangga'at ka' mule' to pilo-pilogot anu pino'una'nyomo i Laigan nu Tumpu. Pinaha tatakannyomo na mezbah nu pilogot anu binau i bungkutnyo kiijo' i Laigan nu Tumpu, ka' i tampat pa' iyaya mae sangga'at i Yerusalem. Iwi-iwi' aijo' pinahaboanyomo i sambiha' nu kota' ka' ingalinnyomo.

¹⁶Lapas aijo' pinokopianannyomo na mezbah tampat ponsomban Tumpu, lantas nonsombahkonmo kiijo' koloban anu bau pompodame ka' koloban bau pontalima kase. Iwi-iwi' na mian nu Yehuda pinoto'inyomo da monsombah Tumpu Allah Israel.

¹⁷Mian da'isan daagi' monsombahkon koloban i tampat ponsomban sangga'at, panyo anu osombahkon aijo' memang osombahkon hi Tumpu.

¹⁸Sisikon sangga'at mongkona i Manasye, ka' mongkona do'anyo hi Tumpu Allah, ka' mule' apa-apaa na anu pinoto'imo nu Tumpu Allah hi ia, nu to nabi-nabi lengkat mae hi Tumpu, Tumpu Allah Israel na nompokau to nabi-nabi da mompoto'i hi aha, iwi-iwi' tinulismo i kitab Sisikon nu to Tomu-tomundo Israel.

¹⁹I Uno nu kitab Sisikon nu to Nabi-nabi tinulismo suele na do'a i Manasye ka' mosia na Tumpu nontaami do'a aijo', ka' mule' sisikon mongkona iwi-iwi na dosa'nyo tempo'nyo ia ma'isa binalatobat, iwi-iwi na tampat bau ponsomban pilogot ka' iwi-iwi na patong Pilogot boune Asyera anu binaunyomo ka' to pilo-pilogot anu nu sombah.

²⁰I Manasye sinilakamo ka' i lamunmo i Laigan nu tomundo'. I Amon anaknyo momo'ane tinimbalimo tomundo nombolosakon ia.

²¹I Amon salatan umunnyo 22 mo na taun ia tinimbalimo tomundo nu Yehuda, ka' ia nompalentahmo i Yerusalem ingohua' na taun na kinopinnyo.

²²Ia suele binaladosa'mo hi Tumpu susumo tuumanyo. Ia nonsombahmo iwi-iwi na pilogot anu sinombahmo nu tuumanyo, ka' nonsombahkonmo koloban hi to pilo-pilogot haha aijo'.

²³Panyo madi' pokakana tiba tuumanyo, i Amon madi' mongaku kasala'annyo ka' madi' po'ule' balatobat ka' monsombah Tumpu; ka' mule' ia na lebe baladosa' molingkudui tuumanyo.

²⁴To mia-mian anu ko pangkatnyo mokalaja hi Tomundo Amon nosangaja'mo mongewa ia ka' nompateimo ia i uno nu laigan nu tomundo'.

²⁵Panyo mian da'isan nu Yehuda nompateimo to mia-mian anu nompateimo i Tomundo Amon aijo', lantas nohangkatmo i Yosia anaknyo binau tomundo.