Read Saluan 2 TAWARIKH 36 Bible Online

2 TAWARIKH 36 - Saluan bible

2 TAWARIKH 36

¹Mian da'isan nu aha Yehuda nompile'imo ka' nohangkatmo i Yoahas binaumo tomundo i Yerusalem nombolosakonmo i Yosia tuumanyo.

²I Yoahas umunnyo 23 mo na taun tempo'nyo ia tinimbalimo tomundo nu Yehuda, ka' ia nompalentahmo i Yerusalem 3 bulan na kinopinnyo.

³ I Nekho tomundo nu Mesir nohakopmo ia ka' nomboamo i Yoahas i Mesir, lantas pinalentahnyomo na Yehuda mombayan hasin konjoo'nyo 3.400 kilogram na salaka, ka' 34 kilogram na mosoni'. Lapas aijo' i hangkatnyomo na i Elyakim utus i Yoahas binau tomundo ka' binali'annyomo na sanggo i Elyakim sinanggohanmo i Yoyakim. Lapas aijo' i Yoahas binoanyomo i Mesir.

⁵ I Yoyakim umunnyo 25 mo na taun tempo'nyo ia tinimbalimo tomundo nu Yehuda, ka' ia nompalentahmo Yerusalem 11 na taun na kinopinnyo. Ia binaladosa'mo hi Tumpu Allah-nyo.

⁶ Tempo'nyo i Nebukadnezar tomundo nu aha Babel nongkuasaimo Yehuda, i hakopnyomo na i Yoyakim ka' pinungunyomo nu lante' besak ka' binoanyomo i Babel.

⁷Sambagian na to bala-balang anu mahan na olinyo i uno nu Laigan nu Tumpu binoamo i Nebukadnezar ka' pino'una'nyomo i laigan nu tomundo kajo-kajojoongannyo kiijo' i Babel.

⁸Sisikon sangga'at mongkona i Yoyakim, tibamo iwi-iwi' na anu binaunyomo ka' apa-apaa na anu mahumimi' ka' anu toto ide-idek apa-apaa na anu binaunyomo tinulismo i kitab Sisikon nu to Tomu-tomundo Israel ka' Yehuda. I Yoyakim anaknyo momo'ane na binaumo tomundo mombolosakon ia.

⁹I Yoyakim umunnyo 18 mo na taun tempo'nyo ia tinimbalimo tomundo nu Yehuda, ka' ia nompalentahmo i Yerusalem 3 bulan ka' 10 na sinaa na kinopinnyo. Ia suele binaladosa'mo hi Tumpu.

¹⁰ Tempo'nyo taun bu'ou tinokamo mule' i Tomundo Nebukadnezar nomboamo i Yoyakim namba i Babel salaku mian anu i hakop, ka' to bala-balang anu mahan na olinyo i Laigan nu Tumpu suele binoanyomo. Lapas aijo' i Nebukadnezar nohangkatmo i Zedekia baabo' i Yoyakhin, binaumo tomundo nu Yehuda ka' Yerusalem.

¹¹ I Zedekia umunnyo 21 mo na taun tempo'nyo ia tinimbalimo tomundo nu Yehuda. Ia nompalentah i Yerusalem 11 taun na kinopinnyo.

¹²Ia suele binaladosa'mo hi Tumpu Allah-nyo. Ia madi' mongka'oho' mongakui kasala'an ka' madi' montuluti anu nu poto'i i Nabi Yeremia, anu nompoto'imo potunon nu Tumpu hi ia.

¹³ I tomundo Nebukadnezar nompakisamo i Zedekia da basumpa'mo i uno nu sanggo nu Tumpu Allah tukoonyo da ia tulu-tulutanmo hi Nebukadnezar. Panyo mamanga ahi i Zedekia notomuhukmo hi Nebukadnezar. I Zedekia pinanggagamo hi Tumpu, Tumpu Allah Israel. Ia madi'mo mongka'oho' mompala'i dosa'nyo ka' madi'mo poule' palesaya hi Tumpu.

¹⁴Ka' mule' Laigan nu Tumpu anu tinantukanmo nu Tumpu bau ponsomban butong-Nyo pinohumimi'mo nu to pola-polaya' Yehuda, to ima-imam; ka' mian da'isan, kalana aha suele nonsombahmo pilogot ka' nombatukimo kabiasa'an nu kantumuu'an anu baladosa' tiniho i bansa-bansa anu mompaha'ohani aha.

¹⁵Tumpu, Tumpu Allah nu mompolee' nu aha, saja'mo nonsai mian-Nyo da mompokinde'i mian anu pinalesayamo hi Ia kalana nukanonongi na aha ka' Laigan-Nyo.

¹⁶Panyo aha madi' nontapali to mia-mian anu sinai mae Tumpu Allah aijo', ka' lewa' mongkokojoi to nabi-nabi-Nyo ka' madi'mo nontapali potatae-Nyo. Ahennyo Tumpu notambuha'mo hondo hi aha sahingga madi'mo daagi' ko jalan anu nubau nu aha da madi'mo mohumpak hukuman.

¹⁷ Tumpu nompotuka'mo kinyonyoa i tomundo Babel da montumbuhimo aha. Tomundo aijo' nompateimo mian nu Yehuda anu toto oli-olitau ka' toto lalangkoyang tibamo aha anu kiijo' i Laigan nu Tumpu. Mau pe'e samian madi' ko anu kinalibosannyo, mau anu langkai'mo ka' bengkele'mo, kabai anu daagi' olitau ka' langkoyang, to momo'ane kabai to boboune, anu masakit kabai anu madi' masakit. Aha iwi-iwi' binee'mo nu Tumpu Allah hi tomundo Babel.

¹⁸To paka-pakakas i Laigan nu Tumpu, ka' to bala-balangnya anu mahan na olinyo, ka' suele balang kakaya'an nu tomundo, ka' anu nu to mia-mian anu ko pangkatnyo mokalaja hi tomundo, iwi-iwi' pinahuhuakonmo i tomundo Babel aijo' lantas binoanyomo i Babel.

¹⁹ Pagan mesen nu kota Yerusalem i hobo'akonnyomo ka' pinapunyomo na kota aijo', tibamo Laigan nu Tumpu ka' iwi-iwi' na laigan nu tomundo tibamo sinin na balangnyo anu mahan na olinyo anu daagi' kiijo' i iwi-iwi' i laigan nu tomundo.

²⁰Mian da'isan anu madi' pinatean pinaha boanyomo i Babel. Kiijo' mae aha binaumo posaihonnyo ka' mule' nubaumo posaihon nu lee'nyo saidi' mae sampe kalaja'an nu Persia nompalentahmo.

²¹ Sumo aijo'mo na tinimbali susumo apaa na anu pinoto'imo nu Tumpu hi Yeremia tukoonyo lipu' aijo' timbalimo tano' mateges 70 taun na kopinnyo salaku bau pombolosi taun-taun Sabat anu madi'mo kinali-kalinga.

²²Taun anu momonanyo salatan i Kores nompalentahmo, tomundo nu Persia, Tumpu nombaumo apaa na anu pinoto'inyomo hi Nabi Yeremia. Tumpu nompotuka'mo hi kinyonyoa i Kores da ia mombebakonmo palentah anu obasa'akon toka hi songko-songko na kalaja'annyo. Onyi'nyo sumo uuka:

²³ “Sumo uuka na palentah i Kores, tomundo nu Persia! Tumpu, Tumpu Allah anu mongkuasai suluga' nompotimbalimo aku tomundo mompalentah songko-songko na dunia, ka' nompokaumo aku da mombau laigan-Nyo i Yerusalem anu i da'erah Yehuda. Jadi, komiu iwi-iwi' anu tinimbalimo mian anu pinalesayamo hi Tumpu Allah tionyo ahi' minsusule'mo kiijo' mae! O' amalakon da Tumpu Allah nu belemiu monjagai belemiu.” 97