Read Saluan EZRA 1 Bible Online

EZRA 1 - Saluan bible

EZRA 1

¹ Taun momonanyo salatan i Kores tomundo nu Persia nompalentahmo. Tumpu nombaumo apaa na anu pinoto'i-Nyomo hi Nabi Yeremia. Kinakeha'mo nu Tumpu na kinyonyoa i Kores da nombee'mo sulat palentah anu binasa'akonmo hi songko-songko na kalaja'an. Onyi'nyo sumo uuka:

² “Aiya na palentah i Kores tomundo nu Persia. Tumpu, Tumpu Allah anu mongkuasai suluga' nompotimbalimo aku tomundo mompalentah songko-songko na dunia ka' nombee'imo aku kalaja mombau laigannyo i Yerusalem i da'erah Yehuda.

³Ku' amalakon da Tumpu Allah monjagai ka' montoa belemiu anu tinimbalimo mian anu pinalesayamo hi Ia. Belemiu tionyo ahi' minsusule'mo i Yerusalem ka' po'ule'mo pombau Laigan nu Tumpu, Tumpu Allah Israel. Tumpu Allah anu jojoong i Yerusalem.

⁴De daagi' ko mian anu pinalesayamo hi Ia i tampat pinomboan mae aiya mompalalui pontulungi da moko ala minsusule' saba' to au-auwan anu mompaha ohani ia tionyo ahi' mombee'i bau pontulungi. Aha tionyo ahi' mombee'i ia salaka ka' mosoni', ka' anu bau mantu i jalan ka' binatang anu pomposake'an boaon ka' mule' apa-apaa na anu osombahkon i Laigan nu Tumpu kiijo' i Yerusalem.”

⁵Lapas aijo' to kapa-kapala nu aha toto sa'anakan mae nu tulunan Yehuda ka' Benyamin, to ima-imam ka' to mia-mian nu aha Lewi, ka' toto samian anu pinotuka'mo nu Tumpu Allah na kinyonyoanyo, mosadiamo ninsusule' i Yerusalem ka' po'ule'mo mombau Laigan nu Tumpu.

⁶Iwi-iwi' na Laigan anu mompaha ohani aha nontulungimo ka' nombee'mo pakakas susumo umpamanyo salaka tiba mosoni', ka' mule' anu bau mantu i jalan, binatang anu pomposake'an boaon, halata' sangga'at ka' apa-apaa na anu osombahkon i Laigan nu Tumpu.

⁷I Kores nonsabatakonmo to mangko-mangko' ka' to gala-galas anu u'utu mae opake i Laigan nu Tumpu kiijo' mae i Yerusalem. Balang haha aijo' ingatomo mae i Tomundo Nebukadnezar ka' pino'una'nyomo i laigan nu pilogotnyo, aijo'mo posi pilogotnyo.

⁸Anu mongulus balang haha aijo' i Mitredat na binee'an i Kores kalaja, ia kapala anu mongulus kakaya'an nu kalaja'an. Lantas i Mitredat nondaputanakonmo balang haha aijo' da opakatu hi Sesbazar, gubernur nu Yehuda.

⁹Aiyamo na daputannyo: mangko' mosoni' 30 na angu'annyo anu opake de monsombahkonmo apa-apaa hi Tumpu, mangko' salaka 1.000 na angu'annyo anu opake monsombahkon apa-apaa hi Tumpu, mangko' sangga'at 29 na angu'annyo, mangko' toto ise-ise' mosoni' na binau 30 na angu'annyo, mangko' toto ise-ise' salaka na binau 410 na angu'annyo, pakakas sangga'at 1.000 na angu'annyo.

¹¹Ka' daagi' mule' ko mangko' mosoni' ka' salaka tiba to bala-balang sangga'at konjoo'nyo 5.400 na angu'annyo. Iwi-iwi' aijo' binoamo i Sesbazar salatan ia tiba to mia-mian sangga'at anu binoa i Babel u'uka mae nambamo lengkat i Babel ninsusule'mo i Yerusalem.