Read Saluan EZRA 10 Bible Online

EZRA 10 - Saluan bible

EZRA 10

¹Hau-haunyo i Ezra binalado'a ka' i humangmo ka' nongakuimo dosa' i ahop nu Laigan nu Tumpu, manjoo' hondo na mian nu Israel tinokamo sinihuk mau to momo'ane, kabai to boboune, ka' to ana-anak. Tinikubanmo nu aha na ia ka' singkapmo nolotando' na i humang.

²Lapas aijo' i Sekhanya anak i Yehiel aha sa'anakan mae i Elam, nompoto'imo hi Ezra, “Kami binaladosa'mo hi Tumpu kalana nongosoaimo boune nu bansa anu i salipu'an mae. Maumo sumo aijo' Israel boli pe'e susa'.

³Imbo' da kita basumpa' hi Tumpu Allah, ka' olaa'tomo na boune haha aijo' iwi-iwi' tiba to ana-anak nu aha. Otulutimo mami na pokinde' nu belento iwi-iwi' ka' pokinde' nu mian haha aijo' sangga'at anu mompajuli palentah nu Tumpu Allah. Kami montulutimo Atulan nu Tumpu Allah.

⁴Belentomo ahi na montantukan kaputusan. Kami totu-totu'u montulungimo belento. Tantukanmo na kaputusan boli bata-bata sampe jadi totu-totu'u.”

⁵Jadi i Ezra nompalentahmo. Pinalentahnyomo na to kapa-kapala nu imam, to mia-mian nu Lewi ka' to mia-mian nu Israel sangga'at da basumpa' salaku tanda saba' apaa na anu tinaloakonmo i Sekhanya nubaumo nu aha.

⁶Noko basumpa' na aha, nambamo na i Ezra lengkat aijo' i ahop nu Laigan nu Tumpu ka' nambamo nokiijo' i i tampat kajojoongan i Yohanan anak i Elyasib ka' i nale'mo pihi-pihi i kiijo'. Ia madi'mo nongka'oho' nongkaan ka' nonginum kalana talalomo hondo sinusa' na nompo'inau'akon kalakuan ma'idek anu binaumo nu aha to mia-mian anu toho'mo binoa i Babel.

⁷Lapas aijo' pinaha polelemo hi songko-songko na Yerusalem ka' Yehuda da opoto'i hi iwi-iwi' na mian anu ninsusule'mo mae lengkat i Babel pinomboan aha, da sihuk mae i Yerusalem.

⁸De ihe na madi' toka i uno nu tolunsinaa aiya, o'ala na halata'nyo iwi-iwi' ka' ia madi'mo oposoop bubuu' sangko gampa. Apaa na anu binebakonmo aijo' tinekengmo nu to polo-polaya' nu aha mian da'isan.

⁹Salatan tinolunsinaamo kinakonamo i tanggan uampulu'mo, bitu'on ko osio'nyomo, iwi-iwi' na to momo'ane anu jojoong i da'erah Yehuda ka' Benyamin tinokamo i Yerusalem ka' sinihukmo i popasan nu Laigan nu Tumpu. Tempo'nyo aitu tinudunmo na ujan mabohos hondo. Iwi-iwi' na mian ilangkungkunanmo kalana mobakin hondo, panyo kalana penting hondo na aha sihuk aijo'.

¹⁰Lantas i Ezra tinuminjomo ka' notataemo hi aha. Ia notatae, “belemiu binaladosa'mo ka' nompaka sala'mo na Israel kalana nongosoaimo boune bansa anu i salipu'an.

¹¹Kalana aijo' akuimo na dosa' nu belemiu hi Tumpu, Tumpu Allah anu nusombah nu mompolee' to ka' obau apaa na anu momposanang kinyonyoa nu Tumpu. Opimpali na mian nu aha salipu'an anu jojoong i lipu'to, ka' laa'mo na to bengke-bengkele' nu belemiu haha atina' anu ingosoan nu belemiu hi bansa sangga'at.”

¹²Mian haha aijo' nontaamimo hoso-hoson, “Otulutimo mami na pokinde' nu Belento.”

¹³Lantas po'ule' mule' tinaloakon nu aha, “Panyo anu tinoka aiya manjoo' hondo ka' ujan talalo hondo mabohos. Kami madi'mo moko ala tuminjo i sambiha'nyo susumo aiya. Ka' mule' aiya misa' palakala anu timbali opoko ala o ulus sansinaa kabai uansinaa, kalana manjoo' hondo na anu aiya hi kami na nombaumo dosa' susumo aijo'.

¹⁴De timbali da to pola-polaya mami na jojoong pe'e i Yerusalem mongulus palakala aijo'. Lantas toto samian anu jojoong kota' mami, anu ko bengkele'nyo bansa nu aha salipu'an, atina' na toka mae i sa'angu' na tempo' anu otantukan, tiba to pola-polaya' nu aha, ka' to mia-mian kopian nu aha i kota' nu aha toto samian.

¹⁵Tiba jalan anu sumo aijo' Tumpu Allah madi'mo motambuha' hi kita kalana palakala aiya.” Mau samian madi'mo ko anu kinakabalatan i tanga'an aijo' me i Yonatan anak i Asael ka' i Yahzeya anak i Tikwa, ka' ua'aha na mian nu Lewi na monsangaja'i aijo'mo i Mesulam ka' i Sabetai.

¹⁶Mian haha aijo' anu binoamo i Babel panyo ninsusule'mo mae na tataap ahi' sabole-bole mombau tanga'an anu pinoto'imo aijo', kalana aijo' i Imam Ezra nompile'imo tino pia-piangkuka na mian nu mongkapalai aha sa'anakan lantas nontulismo sanggo nu aha. I tanggan sa'angu' bitu'on anu ko sampulu'nyomo, aha nontampu'unimo nongulus ka' nonselidiki palakala aijo'.

¹⁷Tinotolu' na bitu'on na aha nongulus palakala nu to momo'ane anu nongosoaimo to boboune nu aha bansa anu i salipu'an.

¹⁸Aiya na daputan nu to mia-mian anu ko bengkele'nyo bansa nu aha anu i salipu'an: TO IMA-IMAM, dinaputanakon hi aha anu bubuu' mae aha sa'anakannyo: Aha sa'anakan mae i Yesua tiba to utu-utusnyo, to ana-anak i Yozadak: i Maaseya, i Eliezer, i Yarib ka' i Gedalya.

¹⁹Aha nojanji'mo mongga'atakonmo bengkele' nu aha, lantas aha nonsombahkonmo domba lakinyo anu okolobanakon bau pongampuni dosa' nu aha.

²⁰Aha sa'anakan mae i Imer: i Hanani ka' i Zebaya.

²¹Aha sa'anakan mae i Harim: i Ma'aseya, i Elia, i Semaya, i Yehiel tiba i Uzia.

²²Aha sa'anakan mae i Pasyhur: i Elyo'enai, i Ma'aseya, i Ismael, i Netaneel, i Yozabad tiba i Elasa.

²³TO MIA-MIAN NU LEWI: i Yozabad, i Simei, i Kelaya, (biasa osanggohi i Kelita), i Petahya, i Yuda tiba i Eliezer.

²⁴Anu lewa' manyanyi: i Elyasib. Aha anu monjagai sabatan daka' Laigan nu Tumpu: i Salum, i Telem tiba i Uri.

²⁵To mia, mian nu aha Israel sangga'at: Aha sa'anakan mae i Pares: i Ramya, i Yezia, i Malkia, i Miyamin, i Eleazar, i Malkia tiba i Benaya.

²⁶Aha sa'anakan mae i Elam: i Matanya, i Zakharia, i Yehiel, i Abdi, i Yeremot tiba i Elia.

²⁷Aha sa'anakan mae i Zatu: i Elyo'enai, i Elyasib, i Matanya, i Yeremot, i Zabad tiba i Aziza.

²⁸Aha sa'anakan mae i Bebai: i Yohanan, i Hananya, i Zabai tiba i Atlai.

²⁹Aha sa'anakan mae i Bani: i Mesulam, i Malukh, i Adaya, i Yasub, i Seal tiba i Yeramot.

³⁰Aha sa'anakan mae i Pahat-Moab: i Adna, i Kelal, i Benaya, i Ma'aseya, i Matanya, i Bezale'el, i Binui tiba Manasye.

³¹Aha sa'anakan mae i Harim: i Eliezer, i Yisia, i Malkia, i Semaya, i Simeon, i Benyamin, i Malukh tiba i Semarya.

³³Aha sa'anakan mae i Hasum: i Matnai, i Matata, i Zabad, i Elifelet, i Yeremai, i Manasye tiba i Simei.

³⁴Aha sa'anakan mae i Bani: i Ma'adai, i Amram, i Uel, i Benaya, i Bedeya, i Keluhu, i Wanya, i Meremot, i Elyasib, i Matanya, i Matnai, i Ya'asai.

³⁸Aha sa'anakan mae i Binui: i Simei, i Selemya, i Natan, i Adaya, i Makhnadbai, i Sasai, i Sarai, i Azareel, i Selemya, i Semarya, i Salum, i Amarya tiba i Yusuf.

⁴³Aha sa'anakan mae i Nebo: i Yeiel, i Matica, i Zabad, i Zebina, i Yadai, i Yo'el tiba i Benaya.

⁴⁴Iwi-iwi' na aha haha aijo' nongosoaimo boune nu aha anu i salipu'an. Sahingga boune haha aijo' gina'atakonmo ka' i laa'mo tiba to ana-anak nu aha.