Read Saluan EZRA 6 Bible Online

EZRA 6 - Saluan bible

EZRA 6

¹Lapas aijo' i tomundo Darius, nompalentahmo da nonsilidiki sulat anu pini-pininmo na nompo'una' i Babel.

²Panyo tulisan anu i humpakmo mongkona han aijo' misa i Babel, panyo i kota' ahi' Ahmeta i da'erah Media. Tulisan aijo' tinulis i sulat anu i lulun ka' onyi'nyo sumo uuka,

³“I taun momona salatan i Tomundo Kores nompalentahmo, pinalentahkonnyomo da Laigan nu Tumpu kiijo' i Yerusalem po'ule'mo obau salaku tampat pomboan nu mian anu osombahkon ka' pompapuan koloban. Kotangkasnyo nu laigan aijo' tionyo ahi' 27 na meten ka' ko bolanyo suele 27 na meten.

⁴Te bau mompimpi'nyo sumo uuka na mombau: de totolu'mo mokiita' na lapisan nu batu opokonaimo salapis na kau'. Ongkosnyo, kas nu kalaja'an na montanggungi.

⁵Ka' mule' pakakasnyo mosoni' ka' salaka anu opake i Laigan nu Tumpu anu ingalamo i Tomundo Nebukadnezar kiijo' i Yerusalem ka' binoanyomo i Babel, tionyo ahi' po'ule' osule'akon i tampatnyo momona.”

⁶Lapas aijo' i Darius nompakatumo sulat bau pinontaaminyo sumo uuka, “Toka hi belento Tatnai, gubernur nu Propinsi Efrat sasu Kinsoban, ka' hi Syetar-Boznai ka' mule' to mia-mian anu bapangkat hi pamalentah Efrat sasu Kinsoban. Boli mompoposia mian nu Yahudi haha aijo',

⁷ka' boli montewa' mombaumo Laigan ponsomban nu aha Tumpu. Pobee'mo na gubernur Yehuda ka' to pola-polaya' nu aha Yahudi po'ule'mo mombau Laigan aijo'.

⁸Ka' mule' aiya ku palentah na Belemiu to utu-utus da otu lungi na aha mokalaja mombau Laigan aijo' sumo uuka na mongatun: Iwi-iwi' na pombayan anu mokalaja Laigan aijo', tionyo ahi' o'ala i hasin nu negara propinsi Efrat sasu Kinsoban ka' tionyo ahi' bau pombayan mian haha aijo' boli otanda'i pin.

⁹Ka' mule' mau mo pa'apaa na anu nupalalui nu to ima-imam kiijo' i Yerusalem, susumo pa' sapi' lakinyo anu daagi' bata'nyo, domba lakinyo ka' anak nu domba anu okolobanakon salaku osombahkon hi Tumpu Allah anu mongkuasai suluga', ka' suele gandum, timuson, anggur, tiba lanya' nu zaitun, tionyo ahi' obee' hi aha sansina-sinaa madi' timbali okolilimi.

¹⁰Bau na aijo' iwi-iwi' da aha monsombahkonmo koloban anu momposanaang Tumpu Allah anu mongkuasai suluga', da nupoitakon nu aha balakat na aku ka' to ana-anaku mo'ane.

¹¹Ku palentah sumo aiya da ihe na madi' mohongo-hongo palentah aiya, saba' obubut na ohi' nu laigannyo sangkau, otajomi na puusnyo lantas osusukakonmo i butongnyo nu mian aijo' sampe lampasan. Laigannyo tionyo ahi' otataki ka' ohunyo baumo pongalinan duhehe.

¹²O' amalakon da Tumpu Allah anu nompile'imo Yerusalem salaku tampat bau ponsomban Ia, mompatei batu-batu tomundo kabai bansa anu baani molanggai palentah aiya, ka' mongkahanda'i mongidei Laigan nu Tumpu kiijo' i Yerusalem, Aku, i Darius nombee'mo palentah aiya. Obau na palentah aiya ma'i-ma'ima'.”

¹³Palentah i Tomundo Darius aijo' binau i Tatnai ma'i-ma'ima', salaku gubernur Efrat sasu Kinsoban, tiba to sanga-sangalunyo i Syetar-Boznai.

¹⁴ Ka' mule' sinampusan nu to nabi-nabi aijo'mo i Hagai ka' i Zakharia, to pola-polaya' nu Yahudi nontusakonmo kalaja mombau Laigan nu Tumpu aijo'. Nalia' hondo na aha nombau Laigan aijo' susumo koonyo nu palentah nu Tumpu Allah Israel ka' palentah i Kores, i Darius, ka' i Artahsasta, to tomu-tomundo nu Persia haha aijo'.

¹⁵Laigan nu Tumpu aijo' tinimbalimo kinonamo i tanggan kototolu'nyona bitu'on Adar i taun ko anomnyomo na i Tomundo Darius nompalentah.

¹⁶Lapas aijo' ilame'akonmo nu mian Israel haha aijo', to ima-imam, to mia-mian nu Lewi ka' iwi-iwi' mian anu toho'mo binoa i Babel, nomposawe'imo ka' nondo'akonmo Laigan nu Tumpu aijo'.

¹⁷I lamean aijo' aha nonsombahkonmo hi Tumpu 100 na sapi' lakinyo, 200 na domba lakinyo ka' 400 na anak nu domba. Bau koloban pongampuni dosa' sinombahkonmo sampulu' ka' ohua' na mee' lakinyo, anu tinanggungkan mae hi aha totosa'angu' natulunan nu bangsa Israel sa'angu'na mee' lakinyo.

¹⁸Lapas aijo' ingatunmo nu aha mogombu-gombu na anu mokalaja mobobolosan i Laigan nu Tumpu, ka' binagi-bagimo hi to ima-imam ka' hi to mia-mian nu Lewi susumo koonyo n atulan anu tuli-tulis i kitab i Musa, panyo aha nombagi aijo' tinoa ahi' na aha anu pantas montoongi kalaja aijo'.

¹⁹ I tanggan sampulu'mo ka' opat bitu'onnyomo momona taun anu aitu mule', to mia-mian anu ninsusule'mo mae lengkat i Babel pinomboan aha nolame'akonmo Paskah.

²⁰Iwi-iwi' na to ima-imam ka' mian nu Lewi nombaumo atulannyo momposusi' butong nu aha sahingga inganggap nu aha binelesi'mo. Lapas aijo' to mia-mian nu Lewi nongkolotmo binatang haha aijo' anu okolobanakon i Paskah kona hi aha to ima-imam, kona hi aha Lewi, kona hi iwi-iwi' mian sangga'at anu toho'mo binoa i Babel.

²¹Koloban haha aijo' okaan nu aha Israel iwi-iwi' mian anu minsusule'mo mae lengkat i Babel pinomboan aha ka' mian anu jojoong i lipu' aijo', anu nompala'imo kantumuu'an anu moko baladosa', ka' tinokamo monsombah Tumpu, Tumpu Allah Israel.

²²Ingipitun na kinopinnyo na aha binalame-lame' nolame'akon Lamean Roti anu Madi' ko Raginyo. Aha sinanangmo hondo kalana pino'ima'mo nu Tumpu na kinyonyoa i Tomundo Asyur, nongkanonongimo aha sahingga nontulungimo aha po'ule' nombau Laigan nu Tumpu, Tumpu Allah Israel.