Read Saluan EZRA 7 Bible Online

EZRA 7 - Saluan bible

EZRA 7

¹Tino pia-piangka na taun na kinopinnyo ilapas na aijo' tempo'nyo i Artahsasta nompalentahmo salaku tomundo nu Persia, daagi' ko samian na mo'ane sanggonyo i Ezra lee' mae i Imam Daka' Harun. Tatu-tatusannyo mae nu mompolee' nu aha lengkat pe'e hi Ezra toka-toka mokiita' hi mompolee'nyo mae sumo uuka: i Ezra i Seraya i Azarya i Hikia

²i Salum i Zadok i Ahitub

³i Amarya i Azarya i Merayot

⁴i Zerahya i Uzi i Buki

⁵i Abisua i Pinehas i Eleazar i Imam Daka' Harun.

⁶I Ezra mian anu nosikolah ka' manjoo' na nusumbu' na atu-atulan anu binee'mo nu Tumpu, Tumpu Allah Israel hi Musa. Kalana i Ezra nubalakati nu Tumpu Allahnyo sahingga binee'anmo i tomundo na ia iwi-iwi' apaa na anu pinoitanyomo. I Taun kopopitu'nyomo na i Tomundo Artahsasta nompalentah, nambamo na i Ezra lengkat i Babel nambamo i Yerusalem tiba aha santompuk na mian Israel aijo'mo aha to ima-imam, mian nu Lewi, to panya-panyanyi, ka' anu monjagai sabatan daka' Laigan nu Tumpu, ka' to mia-mian anu lewa' osai mokalaja.

⁸Aha nompala'imo Babel kinakonamo i tanggan sa'angu' bitu'on anu momonanyo, ka' tinulunganmo nu Tumpu Allah, sahingga tinokamo na aha i Yerusalem i tanggan sa'angu' bitu'on ko olima'nyomo.

¹⁰I Ezra nongkinyonyoaimo hondo monselidiki Atulan nu Tumpu da otulutimo ahi' ka' nongajanakonmo katantuan iwi-iwi' ka' atulannyo hi bansa Israel.

¹¹Aiyamo na sulat anu pininmo na nompo'una' binee'mo i Tomundo Artahsasta hi Ezra, imam ka' mule' mian anu pande hondo monsumbu' Atulan,

¹²“Lengkat hi Tomundo Artahsasta toka hi Imam Ezra, anu pande hondo monsumbu' Atulan nu Tumpu Allah anu mongkuasai suluga'.

¹³Ku palentahkon da iwi-iwi' na imam, mian nu aha Lewi ka' aha mian nu Israel sangga'at anu i songko-songko na kalaja'anku anu kahanda'mo minsusule' i Yerusalem ku pobee'mo minsusule' tiba beleyum Utus.

¹⁴Kalana aku tiba aha popitu anu lewa' mompokinde'i aku nompokaumo belento Utus da minsusule'mo i Yerusalem ka' Yehuda da monselidiki pa' mosia na aha ka' montoa pa' Atulan nu Tumpu Allah anu tinaha'imanakonmo hi beleyum Utus, totu-totu'u otuluti nu aha.

¹⁵Aku tiba to mia-mian anu lewa' mompokinde'i aku monsombahkonmo mosoni' ka' salaka hi Tumpu Allah Israel, Tumpu Allah anu jojoong i Yerusalem. Boamo na atina'anu sinombahkonmo mami.

¹⁶Paka boa mule' na mosoni' iwi-iwi' ka' salaka anu ilimu' nu beleyum Utus hi songko-songko na Babel ka' iwi-iwi' na anu binee'mo nu bansa Israel tiba to ima-imamnyo, da bau kapentingan i Laigan nu Tumpu Allah nu aha kiijo' i Yerusalem.

¹⁷Opake ma'i-ma'ima' na doi aijo' bau pongoli sapi' lakinyo, domba lakinyo, anak nu domba, gandum tiba anggur. Iwi-iwi' aijo' osombahkon i mezbah anu kiijo' i Laigan nu Tumpu kiijo' i Yerusalem.

¹⁸Salaka' ka' mosoni' anu daagi' tontuha' timbalimo opake nu Beleyum utus bau kapalaluan nu Beleyum utus ka' to sanga-sangalu nu Beleyum utus, susumo pongka'oho' nu Tumpu Allah nu Beleyum utus.

¹⁹Bee' iwi-iwi' hi Tumpu Allah kiijo' i Yerusalem na pakakas anu binee'mo hi beleyum Utus da opake de monsombahmo kiijo' i Laigan nu Tumpu Allah.

²⁰Ka' iwi-iwi' na kapalaluan sangga'at anu opake i Laigan nu Tumpu, timbali momoita na Beleyum utus, doi anu o'una' i kas nu kalaja'an salaku sumbangan.

²¹Iwi-iwi' na anu mongulus doi anu o'una' i kas nu kalaja'an i propinsi Efrat sasu Kinsoban ku palentahkon da maumo pa' apaa na anu nu poita i Imam Ezra anu pande hondo i Atulan nu Tumpu Allah anu mongkuasai suluga' obee' hi ia lia-lia', konjoo'nyo sumo uuka:

²²salaka tionyo 3.400 kg, gandum tionyo 10.000 kg, anggur tionyo 2.000 liter, lanya' nu zaituno tionyo 2.000 liter ka' timuson yamo anu opalalui.

²³Opalentah ima-ima' na momposadia apa-apaa anu nupoita nu Tumpu Allah anu mongkuasai suluga', bau kapalaluan i Laigannyo, da Ia madi' pusa hi belengku kabai hi to mia-mian anu mompalentah mombolosakon aku.

²⁴Belemiu madi' timbali mongala hasin hi to ima-imam, mian nu Lewi, to panya-panyanyi, anu monjagai sabatan daka, anu lewa' osai mokalaja, kabai maumo pa' hi he na anu mokalaja i Laigan nu Tumpu.

²⁵Utusku Ezra, pake na kapandean bapikin anu binee'mo nu Tumpu Allah hi Beleyum utus, ka' hangkatmo na to pola-polaya' ka' to mia-mian kopian da mompalentah iwi-iwi' mian anu kiijo' i propinsi Efrat sasu Kinsoban anu tinumuu'mo montuluti Atulan nu Tumpu Allah nu Beleyum utus. Tionyo ahi' Beleyum utus mompogulu'akon Atulan aijo' hi iwi-iwi'na mian anu ma'isa monsumbu'.

²⁶Batu-batu mian anu madi' montuluti Atulan nu Tumpu Allah nu Beleyum utus, kabai to atu-atulan nu kalaja'an, sampa lia-lia' opokonai hukuman silaka, kabai oboa i tano' majo'on, kabai o'ala na halata'nyo, kabai otalungku.’ ”

²⁷Lantas notataemo na i Ezra, “O puji' na Tumpu, Tumpu Allah anu sinombahmo nu mompolee'to! Ia nompotuka' mo hi kinyonyoa i tomundo sahingga ia kinokinyonyoamo mongulus Laigan nu Tumpu kiijo' i Yerusalem.

²⁸Kalana aku tinulunganmo nu Tumpu Allah sahingga aku kinanononganmo i tomundo, to mia-mian anu lewa' mombee'i pokinde' ia ka' to mia-mian anu bapangkat ka' anu balakuasa haha aijo'; Tumpu Allah-ngku nombee'imo kahosonan hi belengku, sahingga aku noko alamo nongendei mae iwi-iwi' tinopia-piangkuka na to pola-polaya' nu aha toto sa'anakan mae bansa Israel, da minsusule'mo i Yerusalem.”