Read Saluan EZRA 9 Bible Online

EZRA 9 - Saluan bible

EZRA 9

¹Salatan iwi-iwi' aijo' binaumo, pa' aha sangkuka na aha to tu'a-tu'anyo nu Israel tinokamo mae hi belengku. Pinoto'i nu aha tukoonyo mian da'isan nu aha Israel, tibamo to ima-imam, ka' to mia-mian nu aha Lewi madi' mosi po'iwi' da boli maninggalo' hi to bansa-bansa anu jojoong i kiijo', aijo'mo bansa Amon, Moab, Mesir, Kana'an, Het, Feris, Yebus ka' Amosi. Aitu mule' to ima-imam ka' to mia-mian nu aha Lewi suele nombaumo kalakuan anu ma'idek anu binaumo nu bansa haha aijo'.

²To momo'ane nu aha no'osoamo tiba to boboune nu bansa anu lengkat mae i salipu'an, sahingga mian anu samata-mata anumo nu Tumpu madi'mo tinontilis. Pakalaus anu momonanyo hondo nombau aijo' atina'mo to tu'a-tu'anyo ka' anu kopangkat i Israel.

³Nohongo aijo', aku nompele-pele'mo hondo sahingga binea-beakumo na baju'ku ka' binubutankumo na ubaku ka' jangkutku lantas sinumuhangmo panyo kinyonyoangku talalomo ina'idekan.

⁴Aku sinainsuhangmo susumo aijo' sampe malom ponsombahkonanmo koloban. Lantas tinokamo na to mia-mian nontikubi aku. Aha nabuhukmo hondo kalana nonginau'mo apaa na anu pinokemakon nu Tumpu Allah Israel mongkona dosa' nu to mia-mian anu ninsusule'mo mae lengkat i pinomboan aha.

⁵Salatan malom-malom koloban sinombahkonmo, aku tinuminjomo aijo' i kinasuhanganku anu lewa' kinasusa'anku ka' tiba baju' anu nobea-beakmo, aku tinolodadupumo ka' nompotalamo lima nokii ta' hi Tumpu Allah-ngku.

⁶Aku notataemo, “O Tumpu Allah-ngku, aku aiya ma'ambang na momposindahakon ubaku i ahop nu belento. Dosa' mami tinumambunmo aita' i ubak mami sahingga nonsulungmo langit.

⁷Daagi' pe'e tempo'nyo mae nu mompolee' mami sampe tempo' uuka aiya, kami mian anu pinalesayamo hi belento binaladosa'mo hi belento. Mokonyo aijo' kami, to tomu-tomundo, ka' to ima-imam mami, pinatundu'mo nu to tomu-tomundo anu i salipu'an. Kami pinateanmo pinahuhuanmo, ka' binoamo salaku mian anu i hakop. Kami talalomo hondo ingambangan, sumomo balu-balu'nyo nu sinaa aiya.

⁸Panyo uuka aiya, o Tumpu Allah mami, belento ma'isa pinin na nongkalibosimo kami. Belento nompobebasmo pa' aha sangkuka na mian aiya hi kami da madi'mo obotuani da tumuu'mo bilahi i tampat anu susi' aiya. Belento nombee'imo kantumuu'an bu'ou hi kami.

⁹Tempo'nyo kami daagi' binotuanan, belento madi' nompojohok kami. Belentomo na nontulungi kami da kinalibosanmo nu to tomu-tomundo Persia ka' pinobee'mo tumuu' ka' po'ule'mo mombau Laigan nu belento anu ohunyo na daagi' aijo'. Belento nonjagaimo kami aiya i Yehuda ka' i Yerusalem.

¹⁰Panyo uuka aiya, o Tumpu Allah, salatan han haha aijo' jinadimo apaamo na anu otaloakon mami. Kami po'ule' mule' madi' nombau apaa na anu pinalentahkonmo nu belento,

¹¹anu binee'mo nu Belento hi kami, pipinoto'imo mae nu to nabi-nabi to posa-posaihon nu Belento. Aha nompoto'imo hi kami tukoonyo tano' anu kahanda'mo o joongi mami aijo' madi'mo sinusi' kalana iwi-iwi' na mian anu monjoongi lengkat pe'e i pusnyo sa'angu' toka i pusnyo sa'angu' nombaumo anu mahumimi' ka' nahenyumo.

¹² Kami tinewa'mo nu nabi haha aijo' da bolimo mogogalo'an na mo'osoa tiba mian haha aijo', kabai montulungi aha da timbali bilahi kabai da mohumpakmo kantumuu'an anu lebe ma'ima'. De totu-totu'u kami tulu-tulutan, kami mohumpakmo kahosonan ka' mongkaanmo hasin nu tano' aijo' ka' baumo bahagian nu lee' mami sampe toka sidu-sidutu'.

¹³Kami binaladosa'mo ka' madi'mo nontapali atulan nu Belento ka' belento nohukumo kami. Panyo osumbu' mami, o Tumpu Allah mami, saba' hukuman anu binea'mo nu belento aijo' madi' pokakana na koboat-nyo tiba anu sabenannyo halus otalima mami padahan ola mule' ahi' pinosalamat nu Belento na kami.

¹⁴Jadi, te daagi' talakana' mule' na kami madi' montuluti palentah nu belento haha aijo' ka' mo'osoa mogogalo'an tiba to mia-mian anu ma'idek na kinyonyoanyo haha aijo? De kami mombau mule' han ijo' tantu otambuha'imo nu Belento sahingga opateimo na kami ingko-ingkot ka' madi'mo ko anu opotumuu' maumo ola samian.

¹⁵O Tumpu, Tumpu Allah Israel, belento adin panyo maumo sumo aitu opobee' ahi' nu Belento na kami tumuu'. O akui mami na kasala'an mami hi belento; kami madi'mo ko hak toka mangadap hi ahop nu Belento.”