Read Saluan NEHEMIA 1 Bible Online

NEHEMIA 1 - Saluan bible

NEHEMIA 1

¹Aiya na anu pinoto'imo i Nehemia anak i Hakhalya mongkona hahan anu binaunyomo. I Bitu'an Kislew kinakonamo i taun kino uampulu'nyomo na i Artahsasta nompalentah salaku Tomundo nu Persia, aku, i Nehemia kiijo' mae i Susan puso nu kota' kalaja'an.

²Tempo'nyo aitu, utusku i Hanani tinokamo lengkat mae i Yehuda tiba pa' aha mae sangkuka na mian. Lantas pinokilawangkumo na aha pa' mosiamo na kalebanyo nu Yerusalem ka' aha mian nu Yehuda anu ninsusule'mo mae lengkat i Babel pipinomboan aha.

³Aha nonsisikmo tukoonyo nu aha mian haha aijo' anu toho'mo binoa i Babel panyo ninsusule'mo mae i tano' kinahampean nu aha aijo', tempo' uuka aiya tumuu' sansala ka' saja'mo nu popoambang nu bansa sangga'at anu i salipu'an, anu kiijo' mompaha ohani tiba aha. Pakalaus mule' pagan mesen nu kota' Yerusalem daagi' hondo ma'idek ka' nosungke-sungkehetmo ka' iwi-iwi na tumbannyo anu toto daka-daka' ma'isa ahi' pinokopianan salatanmo pe'e pinapuan tempo'nyo naipuan mae.

⁴Salatan i hongongkumo na lele aijo', aku sinumuhangmo ka' i humang. Pa' piniansinaa na kopinnyo na aku saja' sinusa'. Aku lajangmo binapuasa' ka' binalado'a hi Tumpu Allah,

⁵“O Tumpu Allah anu daka' na kuasanyo kiita' i Suluga'. Belento Tumpu Allah anu Daka' na kuasa nu belento, ka' kami mangadap hi belento mabuhuk hondo. Belento sabole-bole monginau' kami ka' saja' sabole-bole montoongi apaa na anu jinanji'mo nu Belento hi mian anu mongka'ima'i belento ka' sabole-bole montuluti palentah nu Belento.

⁶Toakon mae na aku O Tumpu, ka' potombihingakon mae na do'angku anu ku potoka hi ahop nu Belento sinaa ka' pihi kona hi aha mian Israel, posaihon nu belento haha aitu. Aku mangakumo saba' kami, mian nu Israel binaladosa'mo; aku ka' to mompo-mompolee'ku binaladosa'mo suele.

⁷Kami pinagagamo hi belento, ka' nolanggaimo iwi-iwi na palentah nu Belento. Kami madi'mo nombau apaa na koonyo nu Atulan haha aijo' anu binee'mo mae nu Belento hi kami aijo'mo anu pipinotokamo i Musa posaihon nu Belento aijo'.

⁸ O Tumpu, o'inau' na potatae nu Belento anu tinaeakonmo i Musa apaa na anu pinalentahkonmo nu Belento, tukoonto, de kami mian nu Israel madi' tulu-tulutan hi belento, kami obagi-bagimo nu Belento mamba i bansa-bansa sangga'at.

⁹ Panyo de kami po'ule'mo mohongo-hongo belento ka' montulutimo palentah nu Belento iwi-iwi', saba' kami anu nobagi-bagimo aijo' po'ule'je oposihuk nu Belento, maumo kami kiijo'mo mae i puusnyo nu dunia. Lantas sinuleakontomo mae nu Belento na kami i tampat anu pinile'anmo nu Belento da bau tampat ponsomban belento.

¹⁰O Tumpu, kami aiya to posa-posaihon nu Belento, mian anu pinalesayamo hi belento anu pinosalamatmo nu Belento nu kuasa ka' kahosonan nu Belento anu daka' hondo.

¹¹Potombihingakon mae na do'angku ka' do'a nu posaihonto iwi-iwi' sangga'at, anu mongka'oho' moholomati belento. Tulungiakon mae o Tumpu sinaa aiya da posaihon nu belento aiya nukalibosi mae i tomundo.” Tempo'nyo aitu kalajangku anu nu inum i tomundo memongulus.