Read Saluan NEHEMIA 2 Bible Online

NEHEMIA 2 - Saluan bible

NEHEMIA 2

¹Daagi' kino sansinaan, salatan ingopatmo na bitu'on noko lapas na aijo', kinakonamo i bitu'on Nisan, tempo'nyo i Tomundo' Artahsasta hau-haunyo mongkaan, aku nontawa'imo anggur ia, ohupku madi'mo binikas. Ma'isa toho' aku tinoa madi' bikas i ahop i tomundo' susumo sinaa aitu.

²Kalana aitu pinokilawanyomo na aku, “Kadaka' beleyum ku toa sinusa'mo hondo, padahan madi' masakit? Tantu daagi' ko apa-apaa anu madi' nu ka'ima'i nu kinyonyoa nu beleyum.”

³ Aku tinolokengkengmo, lantas tinaamankumo, “Tumuu'akon na belento Tomundo' sampe toka sidu-sidutu'! Mosia sampe aku susa' na kinyonyoangku, kalana kota' tampat pinolamunan mompolee'ku tempo' uuka aiya tampatnyo notoyo'mo ka' sabatan kiijo' anu toto daka-daka' imadi'anmo kalana pinapuanmo nu apu.”

⁴Pinokilawamo i tomundo', “Jadi, apaamo na anu nu ka'ima'i?” I uno nu kinyonyoangku, aku binalado'amo hi Tumpu Allah anu daka' na kuasanyo kiita' i suluga',

⁵lantas aku notataemo hi tomundo', “De sanang na belento Tomundo' ka' halala' na belento mombee' mae anu ku kakaase aiya, sai mae na aku mamba i tano' nu Yehuda da po'ule' mombau kota' anu pinolamunanmo mompolee'ku.”

⁶Lantas i tomundo' anu hau-haunyo suha-suhang bebe-bebe' tiba Bengkele'nyo nompopo'i'mo apaa na anu pinoitangkumo. Pinokilawanyomo mae hipian na kopinnyo mae na aku jojoong kiijo' mae, ka' hipian na po'ule' mae minsusule', jadi pinoto'ingkumo hi ia na tanggan anu tinantukankumo.

⁷Lapas aijo' aku nompoitamo sulat anu toka obee' hi to gube-gubernur kiijo' i Propinsi Efrat sasu Kinsoban da aha madi' monsusa'i aku mamba toka-toka' i Yehuda.

⁸Ka' mule', aku nompoitamo sulat anu toka obee' hi Asaf, anu monjagai alas nu kalaja'an, da nu potoukai kau' bau tumban nu sabatan daka' i benteng koko Laigan nu Tumpu, ka' anu opake i pagan mesen nu kota', ka' mule' anu bau laigan kajojoonganku. Iwi-iwi' na anu pinoitangkumo aijo' pinopo'imo i tomundo' kalana Tumpu Allah nontulungimo aku.

⁹Tiba pa' aha sangkuka na suludadu anu matangkas na pangkatnyo ka' suludadu biasa anu nonsake'i ajahan, anu pinalentah i tomundo' nonsangalui aku, nambamo na aku i Efrat sasu Kinsoban. Tinoka kiijo' mae sulat i tomundo' aijo' binee'kumo hi to gube-gubernur.

¹⁰Panyo salatan i Sanbalat, mian nu Bet-Horon tiba i Tobia mian anu ko pangkatnyo lengkat mae i Amon, nohongomo aku tinokamo mae kalana kapentingan nu aha bansa Israel, aha nompele-pele'mo ka' aha pinusamo.

¹¹Aku tinokamo i Yerusalem, lantas nilawemo tinolunsinaa.

¹²Pa' piniansinaamo i kiijo' madi' pinoto'ingku maumo pa' hi he na Tumpu Allah nonsaimo aku. Da po'ule'mo mombau kota' Yerusalem. Dodododopnyo pihi-pihi aku nobulamo ka' nongende pa' aha sangkuka na mian bau sangalungku mamba i sambiha' nu kota'. Keledai na kinasake'anku misa' binatang sangga'at na sinake'an.

¹³Daagi' pihi-pihi, tempo'nyo aitu kami nompala'imo kota' notulu Sabatan Daka' Bangka'nyo sasu Kinsoban. Kami nambamo nompatui sasu Salatan, nokiijo' i Sabatan Daka' Duhehe montulu Mata nu Uee Naga. Kami i lumajang aijo' lewa'mo pinalesangku na anu singkapmo na'idek na pagan mesen nu kota' ka' mule' tinoangkumo na sabatan daka' iwi-iwi' anu pinapuanmo nu apu.

¹⁴Lapas aijo' lengkat mae i sasu Kinsoban kota' aijo' kami nambamo lau-laus i sasu utara, aijo'mo Sabatan Daka' mamba i Uee anu Mompinsopi mokiita', ka' Kolam i Tomundo'. Panyo i kiijo' madi' ko kajalanan nu keledai anu kuku sake'i, kalana talalo manjoo' na tambulan nu anu nohobo'mo.

¹⁵Jadi kami nokaiyongmo i Bangka'nyo nu Kidron ka' namba mule' pihi-pihi aitu ka' nompalesamo pagan mesen nu kota'. Ilapas na aijo' kami nobalikmo ka' ninsusule'mo i kota' nontulu Sabatan Daka' Bangka'nyo.

¹⁶Mau pe'e samian madi' ko anu nonsumbu'-sumbu' na to tu'a-tu'anyo nu mian da'isan pa' noyo na aku namba, ka' pa'apaa na anu ku kahanda'imo ku bau. Kalana sampe tempo'nyo aitu aku ma'isa nompoto'i apa-apaa hi to mia-mian sangko bansangku, mau hi to ima-imam kabai hi totu'a-tu'anyo, kabai hi to mia-mian anu bapangkat, ka' maumo pa' hi he anu saidi' mae mombau hingga-hinggat kota' Yerusalem.

¹⁷Panyo mamanga ahi' pinoto'ingkumo hi aha, “Soba toa na kita sinansalamo sumo aiya! Yerusalem me himpupuknyo ka' sabatannyo anu toto daka-daka' pinapuanmo nu apu. Imbo' da kita po'ule'mo mombau pagan mesen nu kota' Yerusalem da kita bolimo lewa' o'alu.”

¹⁸Lantas sinisikumo hi aha mosia na Tumpu Allah nontulungimo aku ka' apaa na anu pinoto'imo i tomundo' hi belengku. Tinaaman nu aha, “Imbo' da otampu'unintomo na mombau kota!” Lantas nosadiamo na aha da montampu'unimo mombau kota'.

¹⁹Salatan tanga'an mami sinumbu'mo i Sambalat, i Tobia tiba i Gesyem, mian nu Arab kinokojoanmo nu aha ka' pinopo'ambangmo nu aha na kami. Koonyo nu aha, “Apaa na anu kahanda'mo obau miu? Pa' belemiu motomuhutmo hi tomundo?”

²⁰Tinaamanku, “Tumpu Allah anu daka' na kuasanyo kiita' i Suluga' na montulungi kalaja mami da tionyo ahi' timbali. Kami aiya to posa-posaihon-Nyo ka' kami montampu'unimo mombau kota'. Panyo belemiu madi'mo ko hak kabai daagi' ko halata' miu maumo pa'apaa aiya i Yerusalem. Pakalaus mule' de ko mian monsisik mongkona Yerusalem, sanggo nu belemiu madi'mo lewa' osanggo.”